ވެކްސިން ޖަހާފައިވާ މީހުންނަށް ސައޫދީ އަރަބިޔާއިން ބޭރަށް ދަތުރުކުރުމުގެ ހުއްދަ ސަރުކާރުން ދީފިއެވެ.
ސައޫދީ ސަރުކާރުން މިހުއްދަ ދީފައި ވަނީ، އެގައުމުން ކޮވިޑް ކޭސްތައް ފެނުމާ ގުޅިގެން ދަތުރުފަތުރު ހުއްޓާލިތާ 14 މަސް ފަހުންނެވެ. ސައޫދީ ރައްޔިތުންނަށް ވެކްސިން ދިނުމަށް ކުރިއަށްގެންދާ ޕްރޮގްރާމްގެ ދަށުން މިހާތަނަށް 11.5 މިލިއަން މީހުންނަށް ވެކްސިން ދީފައިވެއެވެ. ހޯމަ ދުވަހު އަމަލުކުރަން ފެށި އާ ގައިޑްލައިނުގައިވާ ގޮތުން ވެކްސިންގެ ދެ ޑޯޒް ފުރޮހަމަކޮށްފައިވާ މީހުންނާއި، ބަލިޖެހި ރަނގަޅު ވެފައިވާ 18 އަހަރުން ދަށުގެ މީހުންނަށް ސައޫދީން ބޭރަށް ދަތުރު ކުރެވޭނެއެވެ.
ސައުދީން ބޭރަށް ދަތުރުފަތުރު ނުކުރެވޭ ގޮތަށް ހަމަޖެއްސީ 2020ވަނަ އަހަރުގެ މާރޗު މަހުގައެވެ.
ބޭރަށް ދަތުުރުކުރާ މީހުން "ތަވައްކަލްނާ" އެޕްލިކޭޝަން މެދުވެރިކޮށް އެމީހެއްގެ ސްޓޭޓަސް އެއާރޕޯޓްގެ އޮފިޝަލުންނަށް ދައްކަން ޖެހެއެވެ. ސައުދީއަށް އެތެރެވާ މީހުން ގޭގައި ކަރަންޓީނު ވުމަށްފަހު ކޮވިޑަށް ޓެސްޓް ކުރަން ޖެހެއެވެ.
އާ އުސޫލުތަކާއެކު ސައޫދީގެ އެއާރޕޯޓްތައް ވަނީ ފުރިފައެވެ. ގައުމުން ބޭރަށް ޗުއްޓީ ހޭދަކުރުމަށް ދާން ބޭނުންވެގެން އެތައް ބަޔަކު ތިބީ ފުރަން ތައްޔާރުވެފައެވެ.
