މާލޭގެ ޑެޕިޔުޓީ މޭޔަރު ހޮވުން ފަސްކޮށްފި
17 މެއި 2021 | ހޯމަ 07:55މާލޭ ސިޓީ ކައުންސިލްގެ މޭޔަރު ހިމެނޭ ގޮތަށް 19 މެމްބަރުން ތިބޭ
މާލެ ސިޓީ ކައުންސިލްގެ މެޖޯރިޓީ ކާމިޔާބުކުރުމަށްފަހު ބޭއްވި ރަސްމިއްޔާތުގެ ތެރެއިން | މިހާރު
މާލޭ ސިޓީ ކައުންސިލްގެ ޑެޕިއުޓީ މޭޔަރު ކަނޑައެޅުން ފަސްކޮށްފިއެވެ.
މާލެ ސިޓީގެ މޭޔަރ ކަމަށް ހޮވިވަޑައިގެންނެވި ޑރ. މުހައްމަދު މުއިއްޒާއި ސިޓީ ކައުންސިލްގެ މެމްބަރުން ހުވާކުރުމުގެ ރަސްމިއްޔާތު ހޯމަ ދުވަހު ވަނީ ބާއްވާފައެވެ. މާލޭ ސިޓީގެ މޭޔަރު ޑރ. މުހައްމަދު މުއިއްޒު، ސިޓީ ކައުންސިލްގެ ހެޑް އޮފީހުގައި ކުރީގެ މޭޔަރު ޝިފާ މުހައްމަދާ އެކު އިންނެވިއިރު އެހެން ކައުންސިލަރުން ރަސްމިއްޔާތުގައި ބައިވެރިވީ އޮންލައިންކޮށެވެ.
ލާމަރުކަޒީ އުސޫލުން އިދާރީ ދާއިރާތައް ހިންގުމުގެ ގާނޫނަށް ގެނައި ބަދަލާއެކު ކައުންސިލްތަކުގެ ނާއިބު ރައީސުންނާއި އަތޮޅު ކައުންސިލްތަކުގެ ނާއިބު ރައީސުން އަދި ޑެޕިއުޓީ މޭޔަރުން އިންތިޚާބު ކުރާނީ ކައުންސިލަރުންގެ މެދުގައި ނެގޭ ސިއްރު ވޯޓަކުންނެވެ. އެކަން އޮންނަނީ ހުވާ ކުރެއްވުމަށް ފަހު ބާއްވާ ފުރަތަމަ ބައްދަލުވުމުގައެވެ.
ހުވާކުރުމުގެ ރަސްމިއްޔާތުގައި ވާހަކަދައްވަމުން މާލެ ސިޓީގެ މޭޔަރ ޑރ. މުހައްމަދު މުއިއްޒު ވިދާޅުވީ ލޯކަލް ގަވަރމެންޓް އޮތޯރިޓީ (އެލްޖީއޭ) އިން އަންގާފައި ވަނީ ހުރިހާ ކައުންސިލަރުން ބައިވެރިވާ ބައްދަލުވުމެއްގައި ނަގާ ސިއްރު ވޯޓަކުން ޑެޕިއުޓީ މޭޔަރު ހޮވުމަށް ކަމަށެވެ. މާލޭ ސިޓީ ކައުންސިލްގެ ބައެއް މެމްބަރުން މިވަގުތު ތިއްބެވީ ކޮވިޑާ ހެދި ކަރަންޓީންގައެވެ. އެހެންވެ ޑެޕިއުޓީ މޭޔަރު ހޮވުން ފަސްކޮށްފައިވާ ކަމަށް މުއިއްޒު ވިދާޅުވިއެވެ.
ނަމަވެސް ވަކި ތާރީޚެއް ވިދާޅެއްނުވެއެވެ. މާލޭ ސިޓީ ކައުންސިލްގެ މޭޔަރު ހިމެނޭ ގޮތަށް 19 މެމްބަރުން ތިބެއެވެ. އޭގެ ތެރެއިން 12 ގޮނޑި ކާމިޔާބު ކޮށްފައިވަނީ އިދިކޮޅު ކޯލިޝަން ޕީޕީއެމް/ޕީއެންސީ އިންނެވެ. އެ ކޯލިޝަނަށް ސިޓީ ކައުންސިލްގެ މެޖޯރިޓީ ލިބިފައިވާއިރު މިހާރު އެންމެ ބޮޑު ވާދަވެރިކަމެއް އޮތީ ޑެޕިއުޓީ މޭޔަރުގެ މަގާމަށް މެމްބަރަކު ހޮވުމުގައެވެ.
ޑެޕިއުޓީ މޭޔަރު ކަމަށް މިހާތަނަށް ޝައުގުވެރިކަން ފާޅުކުރައްވާފައިވަނީ ވިލިމާލެ ދާއިރާގެ މެމްބަރު ނަހުލާ އަލީ އާއި މާފަންނު ދެކުނު ދާއިރާގެ މެމްބަރު އަބްދުﷲ ނާސިރު އާއި ހުޅުމާލެ ދާއިރާގެ މެމްބަރު މެމްބަރު އިބްރާހިމް ޝުޖާއުގެ އިތުރުން މާފަންނު މެދު ދާއިރާގެ މެމްބަރު އަހުމަދު ނަރީޝްއެވެ. ޑެޕިޔުޓީ މޭޔަރުކަމުގެ ވާދަވެރިކަން ބޮޑުވެފައިވާއިރު ޕާޓީގެ ލީޑާޝިޕްގެ ބައެއް ބޭފުޅުން ޝުޖާ ހޮވަން މަސައްކަތް ކުރާއިރު އަނެއް ބައި ބޭފުޅުން ބޭނުންވަނީ ޑެޕިއުޓީ މޭޔަރަކަށް ނަރީޝް ހަމަޖެއްސުމަށެވެ.
