ރަސްމީ މެޗުތަކުގައި ދެވަނައަށް އެންމެ ގިނަ ލަނޑު ޖަހައިގެން ބްރެޒިލުގެ ލެޖެންޑް ޕެލޭ ހަދާފައިވާ ރިކޯޑު، ޔުވެންޓަސްއަށް ކުޅެމުން އަންނަ ޕޯޗުގަލުގެ ތަރި ކްރިސްޓިއާނޯ ރޮނާލްޑޯ މުގުރާލައިފިއެވެ.

ރޮނާލްޑޯ އެ ރިކޯޑު މުގުރާލީ އިޓާލިއަން ލީގުގައި އާދީއްތަ ދުވަހުގެރޭ ކަލިއާރީ އަތުން ރަށުން ބޭރުގައި 3-1 ގެ ނަތީޖާއަކުން ޔުވެންޓަސް މޮޅުވި މެޗުގައި ހެޓްރިކް ހަދައިގެންނެވެ. އެގޮތުން މި މެޗުގެ 32 މިނެޓު ތެރޭ ހެދި ހެޓްރިކާއެކު، ރަސްމީ މެޗުތަކުގައި ރޮނާލްޑޯ ޖެހި ލަނޑުގެ އަދަދު ވަނީ 770 އަށް އަރާފައެވެ. ރަސްމީ މެޗުތަކުގައި ޕެލޭ ޖަހާފައިވަނީ 767 ލަނޑެވެ.

މި ލިސްޓުގެ އެއްވަނައިގައި ރޮނާލްޑޯ އޮތް ކަމަށް ބައެއް މީޑިއާތަކުން ރިޕޯޓުކުރި ނަމަވެސް، ޗެކް ރިޕަބްލިކުގެ ފުޓްބޯޅަ އެސޯސިއެޝަނުން ހާމަކޮށްފައިވާ ގޮތުން ރަސްމީ މެޗުތަކުގައި އެންމެ ގިނަ ލަނޑު ޖެހުމުގެ ރިކޯޑު އޮތީ އޮސްޓްރިއާ އާއި ޗެކޮސްލޮވާކިއާގެ ކުރީގެ ފޯވާޑް ޔޯސެފް ބިކޭންގެ އަތުގައެވެ. އެގޮތުން އެ އިދާރާގެ ބަޔާނުގައިވާ ގޮތުން ބިކޭން ވަނީ ރަސްމީ މެޗުތަކުގައި 821 ލަނޑު ޖަހާފައެވެ.

ނަމަވެސް "ރެކް.ސްޕޯޓް.ސޮކާ ސްޓެޓިސްޓިކްސް ފެޑެރޭޝަން" އިން ބުނާ ގޮތުން ރަސްމީ މެޗުތަކުގައި ބިކޭން ޖަހާފައިވަނީ 805 ލަނޑެވެ. އެކަމަކު އޭގެ ތެރެއިން 27 ލަނޑަކީ އޭނާ ރެޕިޑް ވިއޭނާގެ ރިޒާވް ޓީމަށް ޖެހި ލަނޑުތަކެއް ކަމަށް ވާތީ، އެ ގުނަން ނުޖެހޭ ކަމަށާއި، އެ ވިސްނުމުގައި ބަލާނަމަ ފުޓްބޯޅައިގައި މި ވަގުތު އެންމެ ގިނަ ލަނޑު ޖަހާފައިވާ ކުޅުންތެރިއަކީ ރޮނާލްޑޯ ކަމަށްވެސް ބައެއް މީޑިއާތަކުން ވަނީ ރިޕޯޓުކޮށްފައެވެ.

އާދިއްތަ ދުވަހުގެރޭ ފޭސްބުކްގައި ހިއްސާކުރި ޕޯސްޓެއްގައި ރޮނާލްޑޯ ވަނީ ދުނިޔޭގެ ރަސްމީ މެޗުތަކުގައި ލަނޑު ޖެހުމުގެ ލިސްޓުގެ ކުރީގައި އޭނާގެ ނަން އޮވެ، ޕެލޭގެ ރިކޯޑު މުގުރާލުމަކީ ދުވަހަކުވެސް އުންމީދުކުރި ކަމެއް ނޫން ކަމަށާއި، މިއީ ލިބިގެންދިޔަ ފަޚުރެއް ކަމަށް ބުނެފައެވެ. އަދި ރޮނާލްޑޯއަށް މަރުހަބާ ކިޔުމަށްފަހު ޕެލޭ ހިއްސާކުރި ޕޯސްޓެއްގައި ވަނީ ރޮނާލްޑޯގެ ހުނަރަށް ތާރީފުކޮށްފައެވެ. އެގޮތުން ރޮނާލްޑޯ ކުޅޭ މެޗުތައް ބަލަން އަބަދުވެސް ޝައުގުވެރިވާ ކަމަށާއި، އޭނާށގެ އަމިއްލަ ރިކޯޑު ރޮނާލްޑޯ މުގުރާލުމުން އެކަމަށް މަރުޙަބާ ކިޔާ ކަމަށްވެސް ވަނީ ބުނެފައެވެ.

ރަސްމީ މެޗުތަކުގައި ރޮނާލްޑޯ 770 ލަނޑު ހަމަކުރިއިރު، އޭގެ ތެރެއިން 668 ލަނޑު އޭނާ ޖަހާފައިވަނީ ކުލަބު ކެރިއަރުގައެވެ. އަދި ޕޯޗުގަލުގެ ޤައުމީ ފުޓްބޯޅަ ޓީމަށް އޭނާ ވަނީ 102 ލަނޑު ޖަހާފައެވެ.

ޕެލޭގެ ރިކޯޑު ރޮނާލްޑޯ މުގުރާލިއިރު، ބްރެޒިލުގެ ރިކޯޑު ފޮތްތަކުން ދައްކާގޮތުގައި ނުރަސްމީ މެޗުތަކާ އެއްކޮށް ޕެލޭ ވަނީ ޖުމްލަ 1،283 ލަނޑު ޖަހައިފަ އެވެ. އެހެންކަމުން އޭނާއަކީ ފުޓްބޯޅަ ތާރީޚުގައި އެންމެ ގިނަ ލަނޑު ޖެހި ކުޅުންތެރިޔާއެވެ.