މަސައްކަތުގެ މާހައުލުގެ ރައްކައުތެރިކަމުގެ ކެމްޕޭން އިފްތިތާހުކޮށްފި އެވެ.
މި ކެމްޕޭން އިފްތިތާހު ކޮށްދެއްވީ ހޮނިހިރު ދުވަހު ދަރުބާރުގޭގައި ބޭއްވި ރަސްމިއްޔާތެއްގައި މާލެ ސިޓީގެ މޭޔަރު ޝިފާ މުހައްމަދު އެވެ.
"ހަނު ނުތިއްބަވާ، ކޮންމެ މީހެއްގެވެސް ޒިންމާ އެބައޮތް" މިޝިއާރުގެ ދަށުން އިފްތިތާހުކުރެވުނު ކެމްޕޭނާއި ގުޅޭގޮތުން ތަޢާރަފެއް ދެއްވަމުން އެޗްޕީއޭގެ ޑިރެކްޓަރ އައިމިނަތު ޝައުފާ ވިދާޅުވީ މި ކެމްޕޭންގެ މަޤްސަދަކީ ރާއްޖޭގައި މަސައްކަތު މާހައުލުން ޖެހޭ ބަލިތަކާއި، އަނިޔާތަކާއި، މި އަނިޔާތަކުން ދުނިޔެ ދޫކުރާ މީހުން އަދި ނުކުޅޭދުންތެރިކަމުގައި އުމުރުހޭދަކުރަން ޖެހޭ ފަރާތްތަކުގެ އަދަދު މަދު ކުރުމަށް މަސައްކަތް ކުރުން ކަމަށެވެ. ޝައުފާ ވިދާޅުވީ މަސައްކަތުގެ މާހައުލުގެ ސަލާމަތާއި ރައްކައުތެރިކަން ކަށަވަރުކުރުމަށް މުއައްސަސާތައް ގުޅިގެން ކޮންމެވެސް ވަރެއްގެ މަސައްކަތްތަކެއް ކުރެވުނު ކަމުގައި ވިޔަސް ޕްލޭންތަކެއް ހެދި ލަނޑުދަނޑިތަކެއް ހާސިލް ކުރުމަށް އެންމެ އެކަށީގެންވާ މަސައްކަތްތަކެއް މިހާތަނަށް ކުރެވިފައި ނުވާ ކަމަށެވެ.
އެކި މުއައްސަސާތަކުން ހެދިފައިހުރި ޤާނޫނުތަކާއި ޤަވާއިދުތައް އެކަށީގެންވާ މިންވަރަށް ތަންފީޒް ކުރުމާއި އެކަމަށް ޚާއްސަ އިސްކަމެއް ދީގެން މަސައްކަތްތަކެއް ކުރެވިފައި ނުވުމުގެ ސަބަބުން ރާއްޖޭގައިވެސް މަސައްކަތުގެ މާހައުލުގެ ނުރައްކައުތެރިކަން ހާދިސަތައް ހިނގުން ކަންބޮޑުވާވަރަށް އިތުރުވެފައިވާކަން ފާހަގަކުރެއްވިއެވެ.
މަސައްކަތު މާހައުލުގައި ހުންނަ ނުރައްކައުތަކަށް ހުށަހެޅި ފުއްޕާމޭގެ ކެންސަރުފަދަ ނުރައްކައުތެރި ބަލިތައް ޖެހުމާއި ފުރާނައަށް ނުރައްކައުވާފަދަ ހާދިސާތައް ހިނގުން އިތުރުވެފައިވާ ކަމަށް ޝައުފާ ވިދާޅުވިއެވެ. އަދި މިފަދަ ނުރައްކައުތަކަށް ހުށަހެޅެނީ ހަމައެކަނި މަސައްކަތްތެރިން އެކަނި ނޫން ކަމަށާއި މުޖުތަމައުގައި ދިރިއުޅޭ ހުރިހާ ފަރުދުންވެސް ހުށަހެޅިގެންދާ ކަމަށެވެ.
މިސާލަކަށް ފައިބަރު މަސައްކަތް ކުރަ ތަންތަނަށް ބައލައިލި ކަމުގައި ވިޔަސް މީހުން ދިރިއުޅޭ ގޯއްޗާއި އިންވެގެން މި މަސއްކޖަތް ކުރާ ރަށްތައް އެބަހުރި، މިމަކުގެ ސަބަބުން އެފަރާތްތައް މިދަނީ އެނުރައްކަލަށް ހުށަހެޅިގެން.އެޗްޕީއޭގެ ޑިރެކްޓަރ އައިމިނަތު ޝައުފާ
މަސައްކަތްތެރިންނާއި މަސައްކަތް ކުރުވާ ފަރާތްތަކާއި ސަރުކާރުގެ މުއައްސަސާތަކާއި ރާއްޖޭގައި ދިރިއުޅޭ އެންމެން އަހުލުވެރިވެ މަސައްކަތުގެ މާހައުލުގެ ސަލާމަތާއި ރައްކައުތެރިކަން ކަށަވަރު ކުރުމަށް އެންމެ ގުޅިގެން މަސައްކަތް ކުރަންޖެހިފައިވާކަން އޭނާ ފާހަގަ ކުރެއްވިއެވެ.
ރައްކައުތެރިކަމުގެ ފިޔަވަޅުތައް އެޅުމަކީ ވަރަށް ޚަރަދު ބޮޑު ކަމެކޭ މިކަމެއް އަޅުގަނޑުމެންނަށް ކުރުމުގައި ދަތިތައް އެބަހުއްޓޭ މިއީ އަޅުގަނޑުމެންނަށް އަބަދުވެސް އިވޭ އަޑެއް. ކޮންސްޓްރަކްޝަން ސައިޓްގައި މަސައްކަތް ކުުރުމުގައި ރައްކައުތެރިކަމުގެ ފިޔަވަޅުތައް ނޭޅުމުގެ ސަބަބުން އެހިސާބުން ހިނގާފައިދާމީހާއަށް މިއަނިޔާތަކަށް ހުށަހަޅި އޭނާގެ ފުރާނެ ގެއްލިގެންދާ ދިއުން ހުއްޓުމަށް މިއަދު މަސައްކަތްތަކެއްކޮށް މިކަމަށް ރަނގަޅު ހައްލުތަކެއް ހޯދަން މިވަނީ ޖެހިފައި.އެޗްޕީއޭގެ ޑިރެކްޓަރ އައިމިނަތު ޝައުފާ
ޝައުފާ ވިދާޅުވީ މަސައްކަތްތެރިންނާއި މެދު އިހުމާލުވާ ފަރާތްތަކާއިމެދު ފިޔަވަޅު އެޅޭނެ ނިޒާމެއް ޤާއިމްކޮށް އެފަރާތްތައް ޒިންމާދާރު ކުރުމަކީ މުހިއްމު ކަމެއް ކަމަށެވެ. މިހާރު ހެދިފައި ހުރި ޤާނޫނުތަކާއި ގަވާއިދުތައް މުރާޖާކޮށް މަސައްކަތްތެރިންނާއި، މުޖުތަމައުގައި ދިރިއުޅޭ އެންމެންގެ ރައްކައުތެރިކަން ހޯދައިދިނުމަކީ އެންމެން ގުޅިގެން ކުރަންޖެހޭ ކަމެއް ކަމަށް އޭނާ ވިދާޅުވިއެވެ.
މި ކެމްޕޭންގައި މީޑިއާތައް މެދުވެރިކޮށް މަސައްކަތްތެރިންނާއި އާންމުންނަށް މައުލޫމާތު ފޯރުކޮށްދިނުމާއި ފަޔަރ ސޭޕްޓީ އަދި ފަސްޓްއެއިޑްފަދަ ގުޅުންހުރި ޓްރެއިނިންތައް ކުރިއަށް ގެންދިއުމާއި، އާންމުން ހޭލުންތެރިކުރުމާއި، މިހާރު ހެދިފައި ހުރި ޤާނޫނުތަކާއި ޤަވާއިދުތައް މުރާޖާ ކުރުމާއި ތަފާސް ހިސާބު އެއްކުރުމާއި، ކަނޑައެޅިފައިވާ ނިޒާމް ހަރުދަނާކުރުންފަދަ ގިނަ ކަންތައްތަކެއް ކުރުމަށް ނިންމާފައިވާ ކަމަށް ވިދާޅުވިއެވެ.