މާލޭގައި ޓެކްސީ ހިދުމަތްދޭ ހަމައެކަނި އަންހެން ޑްރައިވަރުގެ ކާރަށް ބަޔަކު މިދިޔަ ހަފްތާގެ ހޯމަ ދުވަހުގެ ރޭގަނޑު ގެންލުން ދިނުމާއި ގުޅިގެން އާމްދަނީއަށް ހުރަސްއެޅިފައި ވަނިކޮށް ޔޫތު މިނިސްޓަރު އަހްމަދު މަހްލޫފް އޭނާއަށް އެހީތެރިކަން ފޯރު ކޮށްދީފިއެވެ.
އައިމިނަތް ވަހީދާ (އައިންތު) ކާރުގެ ބިއްލޫރިގަނޑު ފަސްވަނަ ފަހަރަށް ތަޅާލުމައި ގުޅިގެން އައިންތު ވަނީ އެކަން ސޯޝަލް މީޑިއާގައި ހިއްސާކޮށްފައެވެ. އަދި މިނިސްޓަަރ މަހުލޫފު އައިންތުއަށް އެހީތެރިވެދެއްވީ އައިންތުގެ ޕޯސްޓް ފެނިގެން ކަމަށް ވިދާޅުވިއެވެ.
"ރާއްޖެއެމްވީ" އަށް މިކަމުގެ މައުލޫމާތު ދެއްވަމުން މަހުލޫފު ވިދާޅުވީ މި މައްސަލަ މިހާރު ފުލުސް ކޮމިިޝަނަރ އަދި ޖެންޑާ މިނިސްޓްރީ އާއި ހަމައަށް ވެސް ގެންގޮސްފައި ކަމަށެވެ. އަދި މިކަން ކުރާ ބަޔަކު އިނގޭ ކަމަށާއި އަދި މިކަމަކީ ވަރަށް ދަށު ދަރަޖައިގެ އަމަލެއް ކަމަށް ވިދާޅުވިއެވެ. އައިންތުގެ ކާރަށް ގެންލުން ދެމުންދާ މީހާއަށް އަވަސް މުސްތަގުބަލެއްގައި ހައްގު އަދަބު ލިބޭނެ ކަމަށް މިނިސްޓަރ ވިދާޅުވިއެވެ.
މިކަމާއި ބެހޭގޮތުން މައުލޫމާތު ދެމުން އައިންތު ބުނީ މިނިސްޓަރަށް ޕޯސްޓް ފެނުމާ އެކު ނަންބަރ ހޯދާ އައިންތުއަށް ގުޅައި މިނިސްޓްރީއަށް ދިޔުމަށް ދައުވަތު ދިން ކަމަށެވެ. އަދި މަހުލޫފާއި ބައްދަލު ކުރުމުން ކާރު މަރާމާތު ކުރުމަށް ހަރަދުވާނެ އަދަދު އައިންތުއަށް ވަގުތުން ދީފައިވާ ކަމަށް ބުންޏެވެ.
ޗެކް ލިބުމާއެކު ގަރާޖަކުން ކާރު މަރާމާތު ކުރުމަށް ފަހު އާދިއްތަ ދުވަހު ހެނދުނު 6:30 ފެށިގެން ޓެކްސީގެ ހިދުމަތް އަލުން ދޭން ފަށާފައިވާ ކަމަށް އައިންތު ބުންޏެވެ.
އޭނާގެ ކާރަށް މީގެ ކުރިން ގެއްލުން ދީފައި ވަނީ އޭނާގެ ކުރީގެ ފިރިމީހާ އާއި އޭނާގެ ރައްޓެހިން ކަމަށް އައިންތު ވަނީ ތުހުމަތުކޮށްފައެވެ. އަދި މި ހުރިހާ ފަހަރެއްގައި ވެސް އޭނާއަށް ލިބިފައިވާ ގެއްލުމުގެ ބަދަލު ނުލިބޭ ހާލު، އެކަން ކުރި ފަރާތްތަކަށް އަދަބު ދެވިފައި ނުވާ ކަމަށް ވެސް ބުނެ ކަންބޮޑުވުން ފާޅުކުރިއެވެ.
މަހުލޫފު އެހީތެރިކަން ފޯރު ނުކޮށް ދިންނަމަ މި މަހު އޭނާގެ ޚަރަދުތައް ދެކޮޅު ނުޖެއްސުނީސް ކަމަށް އައިންތު ބުންޏެވެ. އަދި އައިންތު ވަނީ މިނިސްޓަރ ވެދެއްވި އެހީއަށް ފައްފަށުން ޝުކުރު އަދާކޮށްފައެވެ.
