ކޮވިޑް-19 ގެ ޕެންޑަމިކާއި އެކު އެމްޑަބްލިއުއެސްސީގެ ބައެއް ޕްރޮޖެކްޓްތައް ދިގު ދަންމާލަން ޖެހުނު ކަމަށް އެމްޑަބްލިއުއެސްސީގެ މެނޭޖިންގ ޑިރެކްޓަރ ހަސަން ޝާހު ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ޝާހު ވިދާޅުވީ ކޮވިޑް-19 އާ އެކު އެމްޑަބްލިއުއެސްސީއިން ހިންގަމުން ދިޔަ ބައެއް ޕްރޮޖެކްޓްތައް ދިގު ދަންމައިލާން ޖެހުނު ކަމަށާއި، އެހެން ނަމަވެސް އެއްވެސް ޕްރޮޖެކްޓްއެއް ހުއްޓާލައިފައި ނުވާނެ ކަމަށެވެ. އަދި ރައްޔިތުންނަށް އެންމެ ބޮޑަށް ބޭނުން ވާނެ ހިދުމަތްތައް ހުއްޓުމެއް ނެތި ދީފައި ވާނެ ކަމަށް ޝާހު ވިދާޅުވިއެވެ.
ޝާހު ވިދާޅުވީ އެ ކުންފުނިން މި ނިންމުން ނިންމީ ސަރުކާރުގެ އެދުމުގެ މަތިން ކަމަށާއި، ކޮވިޑާއި އެކު ކުންފުނިން ކުރިން ކުރަމުން ގެންދިޔަ ބައެއް ހަރަދުތައް ކުޑަ ކޮށްފައި ވާނެ ކަމަށެވެ.
ޝާހު ވިދާޅުވީ ކޮވިޑްގެ ސަބަބުން އެ ކުންފުނިން އާންމުންނަށް ދެމުން ގެންދިޔަ އެއްވެސް ހިދުމަތަކަށް ބުރު އަރާފައި ނުވާނެ ކަމަށާއި، ފެނާއި ނަރުދަމާގެ ނިޒާމުގައި އެއްވެސް މައްސަލައެއް ދިމާވެފައި ނުވާނެ ކަމަށެވެ. ހާއްސަކޮށް ރައްޔިތުންނަށް ފެނުގެ ބިލް ދެއްކުމުގައި ލުއިތަކެއް ކުންފުނިން ދީފައި ވާނެ ކަމަށާއި، ކުންފުނީގެ ވިސްނުމަކީ އަބަދުވެސް ރައްޔިތުންނާއި ގާތުން ރައްޔިތުންނަށް ފަސޭހަވާނެހެން ހިދުމަތް ދިނުމަށް ކަމަށެވެ.
އޭގެ އިތުރުން ޝާހު ވިދާޅުވީ މާލެ ސަރަހައްދުގެ ފެނުގެ ރައްކާތެރިކަން ކަށަވަރު ކުރުމަށް ކުރިޔަށް ގެންދާ ޕްރޮޖެކްޓްތައް ހުއްޓުމެއްނެތި ކުރިޔަށްދާ ކަމަށާއި، އަދި މިހާރު ވެސް ފެން ލިބުމުގައި ރައްޔިތުންނަށް ދަތިތަކާއި ކުރިމަތިލާން ނުޖެހޭނެ ކަމަށެވެ. އަދި ހާދިސާއެއް ދިމާވި ކަމުގައިވިޔަސް ފެނުގެ ޝޯޓޭޖެއް ދިމާނުވެ ހިދުމަތް ދެވޭނެ ގާބިލިއްޔަތުކަން އެމްޑަބްލިއުއެސްސީގައި މިހާރު ހުރި ކަމަށް ޝާހު ވިދާޅުވިއެވެ.
