ކްލީކް ކޮލެޖުން މަތީ ތަޢުލީމްގެ ޚިދްމަތް ދެމުން އަންނަތާ 2020 ވަނަ އަހަރު ބުރާސްފަތި ދުވަހަށް ވެފައިވާ އިރު، ކްލީކް ކޮލެޖަކީ މަތީ ތަޢުލީމްގެ ޚިދުމަތް ދިނުމުގައި ކޮލިޓީއަށް ވަރަށް ބޮޑު އިސްކަމެއްދޭ ކޮލެޖެއް ކަމަށް ކްލީކް ކޮލެޖުގެ ޕްރެޒިޑެންޓް ޑރ. ނައުޝާދު މުހައްމަދު ވިދާޅުވެއްޖެއެވެ.
އެންމެ ދެ ކްލާސްރޫމްއާއި އޮފީހަކާއެކު ފެށި ކްލީކް ޓްރެއިންގ ސެންޓަރ މިހާރު މި ވަނީ ކޮލެޖެއްގެ ގޮތުގައި ފުޅާ ދާއިރާއެއްގައި މަތީ ތަޢުލީމް ދޭ މަރުކަޒަކަށް ބަދަލުވެފައި ކަމަށާއި އޭގެ ސަބަބުން ގިނަ ދަރިވަރުންތަކެއް އަންނަނީ ކްލީކް ކޮލެޖުން ހިންގާ ރާއްޖޭން ބޭރުގެ ޔުނިވަރސިޓީތަކުގެ ޕްރޮގްރާމްތަކުން މަތީ ވަނަތައް ހާސިލް ކުރަމުން ކަމަށް އޭނާ ވިދާޅުވިއެވެ.
ކްލީކް ކޮލެޖަށް 20 އަހަރު ފުރުން ފާހަގަ ކުރުމުގެ ގޮތުން ވަނީ ސޯޝަލް މީޑިއާގައި "ސެލެބްރޭޓިންގ 20 އިއަރސް" ގެ ނަމުގައި ލޯގޯއެށް ފަރުމާ ކޮށްފައެވެ. މިލޯގޯ ފަރުމާ ކޮށްފައި ވަނީ ހުނަރުވެރި ގްރެފިކް ޑިސައިނަރ ބަމްބީ (އަހުމަދު ސިރާޖް) އެވެ.
20 އަހަރު ދުވަހު ދިމާވި ޗެލެންޖްތަކާ އެކު ވެސް މެދުކެނޑުމެއް ނެތި ދެމުން އައި ޚިދުމަތާ މެދު ވަރަށް ހިތްހަމަ ޖެހޭ. ކޮލެޖުގެ ދަރިވަރުން ކޮވިޑްގެ މި ދަތި ދުވަސްތަކުގައި ކިޔެވުން މެދުކަނޑާނުލާ ހިތްވަރާ އެކު މަސައްކަތް ކުރަމުން އަންނަ ކަމަށްޓަކައި އަދި ދަރިވަރުންނަށް ކޮލެޖަށް ކުރާ އިތުބާރަށް ޝުކުރު ދަންނަވަން. ހަމަ އެއާ އެކު ދަރިވަރުންގެ އެންމެހާ ކަންކަން ގާތުން ބަލާ އެހީތެރި ވަމުން އަންނަ ކޮލެޖުގެ ހީވާގި މުއައްޒަފުންނާއި ލެކްޗަރާސްއަށް ޝުކުރު ދަންނަވަން. ކްލީކް ކޮލެޖަށް އެކި ގޮތްގޮތުން އެހީތެރިކަން ފޯރުކޮށްދީ ކޮލެޖާއެކު މަސައްކަތް ކުރަމުން އަންނަ ހުރިހާ ފަރާތަކަށް ވެސް ޝުކުރު ދަންނަވަން~ ކްލީކް ކޮލެޖުގެ ޕްރެޒިޑެންޓް ޑރ.ނައުޝާދު މުހައްމަދު
20 އަހަރު ފުރުން ފާހަގަ ކުރުމުގެ ގޮތުން އެންމެ ފުރަތަމަ ވެސް ކްލީކް ކޮލެޖުން ބޭނުން ވަނީ އެހީތެރި ކަމަށް ބޭނުންވެފައިވާ ރަށްރަށުގެ ކޮމިއުނިޓީތަކަށް އެހީތެރިކަމެއް ފޯރު ކޮށް ދިނުމަށް ކަމަށާއި އެގޮތުން 20 ރަށެއްގެ 20 ދަރިވަރަކަށް ކްލީކް ކޮލެޖުގައި ކިޔެވުމުގެ ސްކޯލަރޝިޕް ފުރުސަތު ލިބިގެން ދާނެ ކަމަށް ކްލީކުން ވަނީ ބުނެފައެވެ.
ކްލީކް ކޮލެޖުގެ ޑީން، މަރިޔަމް ޝިފާނާ ވިދާޅުވި ގޮތުގައި ކްލީކް ކޮލެޖަށް 20 އަހަރު ފުރުން ފާހަގަ ކުރަން ބޭނުން ވަނީ ރަށްރަށުގައި ތިބި ކިޔަވާ ކުދިންނާ އެއްކޮށް ކަމަށާއި އެގޮތުން ކްލީކް ކޮލެޖުން މިދޭ 20 ސްކޯލަރޝިޕްގެ ފުރުސަތުގެ ބޭނުން ދަރިވަރުން އެންމެ ހެޔޮގޮތުގައި ހިފާނެކަމަށް އުންމީދު ކުރާ ކަމަށް ވިދާޅުވިއެވެ.
ކޮވިޑްގެ ހާލަތް ރަނގަޅުވިހާ އަވަހަކަށް ދަރިވަރުންނަށް އެކި އިތުރު ހަރަކާތްތައް ރޭވިފައި އެބަހުރި. މީގެ ތެރޭގައި ކުޅިވަރުގެ އެކި ދާއިރާތަކަށް ޝައުޤުވެރިކަން ހުންނަ ކުދިންނަށް ފުރުސަތު ލިބިގެން ދާނެ. ފާއިތުވި ދުވަސްތަކުގައި ކުރިއެރުންތަކެއް ލިބިއްޖެ ކަމަށް ޤަބޫލު ކުރާހިނދު، ކުރިއަށް އޮތް ތަނުގައި ރަނގަޅު ހަރަކާތްތަކެއް ރޭވިގެން ދާނެ ކަމަށް އުންމީދު ކުރަން~ ކްލީކް ކޮލެޖުގް ބިޒްނަސް ޑިވެލެޕްމެންޓް މެނޭޖަރ މުހައްމަދު ރޯޝަން
ކްލީކް ކޮލެޖުން 20 އަހަރު ފުރުން ފާހަގަ ކުރުމުގެ ގޮތުން ރޭވިފާ ހުރި ކަންކަން ސޯޝަލް މީޑިއާ މެދުވެރި ކޮށް މައުލޫމާތު ލިބިގެން ދާނެ ކަމަށް އެ ކޮލެޖުން ބުންޏެވެ.
