ހުޅުމާލޭގައި ހުންނަ ކުޑަކުދިން ބަލަހައްޓާ މަރުކަޒު، ފިވަޔަތިން ޖުމްލަ 36 މީހަކު ޕޮޒިޓިވްވެފައިވާ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ހާމަކޮށްފިއެވެ.

ބުދަ ދުވަހުގެ ރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު ޑރ. ނަޒްލާ ވިދާޅުވީ ފިޔަތިން ޕޮޒިޓިވްވި 36 މީހުންގެ ތެރޭގައި ހިމެނެނީ 18 މުވައްޒަފުންނާއި 18 ކުދިން ކަމަށެވެ. އަދި މި ކޭސްތަކާއި ގުޅިގެން 72 މީހުން ކަރަންޓީން ކުރެވިފައިވާ ކަމަށާއި، އެ އެންމެން ވެސް ކަރަންޓީން ކުރެވިފައިވަނީ އެތަނުގެ ތެރޭގައި ކަމަށެވެ.

ކަރަންޓީންގައި ތިބި 72 މީހުންގެ ތެރޭގައި ހިމެނެނީ 19 މުވައްޒަފުންނާއި 53 ކުދިން ކަމަށެވެ. ޑރ. ނަޒްލާ ވިދާޅުވީ ވިލިމާލޭގައި ހުންނަ ކުޑަކުދިން ބަލަހައްޓާ މަރުކަޒު، ކުޑަކުދިންގެ ހިޔާއިން އެއްވެސް މީހަކު އިތުރަށް ޕޮޒިޓިވް ނުވާ ކަމަށެވެ.

މީގެ ކުރިން ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ ކުޑަކުދިންގެ ހިޔާ އިން 2 ކުއްޖަކު ޕޮޒިޓިވްވި ކަމަށާއި، އެ ދެ ކުދިންގެ ހާލު ވެސް ރަނގަޅު ކަމަށެވެ. އަދި ފިޔަވަތިން ޕޮޒިޓިވްވި ކުދިންގެ ތެރެއިން ހުޅުމާލެ މެޑިކަލް ފެސިލިޓީއަށް ބަދަލު ކުރި ކުއްޖާގެ ހާލު ވެސް ރަނގަޅު ކަމަށް ޑރ. ނަޒްލާ ވަނީ ވިދާޅުވެފައެވެ.