މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ހިޔާނާތުގެ މައްސަލައިގައި ޝާމިލުވާކަމަށް ތުހުމަތު ކުރެވޭ 30 މީހެއްގެ މައްސަލަ، ހާއްސަ އިސްކަމެއް ދީގެން ބަލަމުން އަންނަ ކަމަށް އެންޓި ކޮރަޕްޝަން ކޮމިޝަން (އޭސީސީ)ން ހާމަކޮށްފިއެވެ.

މަޖިލީހުގެ މިނިވަން މުއައްސަސާތަކުގެ ކޮމިޓީ ބައްދަލުވުމުގައި ބޮޑު ހިޔާނާތުގެ މައްސަލަގެ ތަހުގީގު ގޮސްފައިވާ ހިސާބާ ގުޅިގެން މެމްބަރަކު ކުރެއްވި ސުވާލަށް ޖަވާބުދެއްވަމުން އެ ކޮމިޝަންގެ ރައީސް މަރިޔަމް ޝިއުނާ ވިދާޅުވީ އަދިވެސް މި މައްސަލައިގެ ތަހުގީގު ނިންމާލެވޭނެ ތާރީހެއް ބުނަން ދަތި ކަމަށެވެ.

އޭނާ ވިދާޅުވީ މި މައްސަލައިގެ ތުހުމަތު އެތައް ބައެއްގެ މައްޗަށް ކުރެވޭއިރު، ތަހުގީގުކޮށް، ދައުވާ ކުރުމަށްވެސް ފޮނުވާނީ ވަކި ވަކި މީހުންގެ މައްޗަށް ކަމަށެވެ. އެހެންކަމުން، ޑެޑްލައިނެއް ދިނުމަށް ވަރަށް ދަތި ކަމަށެވެ. ޝިއުނާ ވިދާޅުވީ މި މައްސަލައިގައި ހިމެނޭ 30 މީހެއްގެ މައްސަލަ، ހާއްސަ އިސްކަމެއް ދީގެން ބަލަމުންދާ ކަމަށެވެ.

މިކަމާއި ގުޅޭގޮތުން ވާހަކަދައްކަވަމުން އޭސީސީގެ މެމްބަރު އަލީ އަޝްރަފް ވަނީ އެމްއެމްޕީއާރުސީގެ ބޮޑު ހިޔާނާތުގެ މައްސަލަ ބެލުމަކީ މައިގަނޑު މެންޑޭޓު ކަމަށް ކަނޑައަޅާ ރިޔާސީ ކޮމިޝަނެއް އުފެއްދެވިކަން ފާހަގަކުރައްވާފައެވެ. އެސެޓް ރިކަވަރީ ކޮމިޝަން އެކުލަވާލުމުން އޭސީސީގައި މި މައްސަލައާއި ގުޅިގެން ހުރި ހުރިހާ ލިޔެކިއުމެއް އެ ކޮމިޝަނަށް ފޯރުކޮށްދިން ކަމަށް އޭނާ ވިދާޅުވިއެވެ. އަދި މިހާރު މި މައްސަލަ އަކީ ތަހުގީގީ އިދާރާތަކާއި ގުޅިގެން ކުރެވޭ 'ޖޮއިންޓް އިންވެސްޓިގޭޝަން' އަކަށް ވާތީ މި މައްސަލަ ނިންމޭނެ ތާރީހެއް ހަމައެކަނި އޭސީސީއަކަށް ނުބުނެވޭނެ ކަމަށެވެ.

ކޮރަޕްޝަން ފަދަ ކުށްތައް ތަހުޤީޤުކޮށް ފިޔަވަޅު އެޅުމަށް ޤާނޫނުން މަތިކޮށްފައިވާ މުއައްސަސާއަކީ އޭސީސީ ނަމަވެސް، އެ ކޮމިޝަނުގެ ޒިންމާތައް އެންމެ ފުރިހަމައަށް އަދާ ނުކުރާ ކަމުގެ ޝަކުވާއަކީ އާންމުންވެސް ކުރަމުންދާ ޝަކުވާއެކެވެ. ހާއްސަކޮށް، އެމްއެމްޕީއާރުސީގެ މައްސަލައިގެ ތަހުގީގަށް ވެސް އެތައް އަހަރެއް ވެފައިވާއިރު، ތަހުގީގު ކޮޅެއްގައި ނުޖެހި ގިނަ ދުވަސް ވަމުންދާތީ މަޖިލީހުން ވެސް އެތައް ފަހަރެއްގެ މަތިން ކަންބޮޑުވުން ފާޅުކޮށްފައިވެއެވެ.

މީގެކުރިންވެސް އެ މައްސަލައާ ގުޅޭ ތަހުގީގު ރިޕޯޓު ނެރުން ލަސްވުމުގެ ސަބަބުން ކޮމިޝަނަށް އެތައް ފާޑުކިޔުންތައް އަމާޒުވިއެވެ. އެގޮތުން 2015 ވަނަ އަހަރުން ފެށިގެން އެ މައްސަލައިގެ ތަހުޤީޤު ރިޕޯޓް އާންމު ކުރާނެ ކަމަށް ތަކުރާރުކޮށް އޭސީސީން ބުނަމުން ދިޔަ ނަމަވެސް، ރިޕޯޓް އާންމު ކުރެވުނީ އޭގެ 4 އަހަރު ފަހުންނެވެ. އެންމެ ފަހުން މިހާރު އެ މައްސަލަ ކުރިއަށްދަނީ ދައުލަތުގެ މުއައްސަސާތައް ގުޅިގެން ޖޮއިންޓް ތަޙުޤީޤެއްގެ ގޮތުގައެވެ.

އެމްއެމްޕީއާރްސީ ބޮޑު ހިޔާނާތުގެ މައްސަލައިގައި މިހާތަނަށް ހުކުމެއް ކޮށްފައިވަނީ ކުރީގެ ރައީސް އަބްދުﷲ ޔާމީން އާއި ކުރީގެ ނައިބު ރައީސް އަހުމަދު އަދީބަށް އެކަންޏެވެ. ނަމަވެސް މި ހިޔާނާތުގައި ދައުލަތުގެ މުއައްސަސާތަކުގެ ވެރިންނާއި، މަޖިލިސް މެމްބަރުންނާއި ފަނޑިޔާރުންގެ ބައިވެރިވުން އޮތް ކަމަށް ވަނީ ހާމަކޮށްފައެވެ.