އައްޑޫ ސިޓީ މީދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް މުހައްމަދު ތޮއްޔިބާއި ފުވައްމުލަކު ސިޓީގެ މެޖިސްޓްރޭޓް ކޯޓުގެ މެޖިސްޓްރޭޓް އަހުމަދު އަކުރަމްގެ ސުލޫކީ މައްސަލައެއް ޖުޑީޝަލް ސާވިސް ކޮމިޝަން (ޖޭއެސްސީ) އިން ތަހުގީގު ކުރަން ފަށައިފި އެވެ.
ޖޭއެސްސީން އަންގާރަ ދުވަހު ނެރެފައިވާ ބަޔާނެއްގައި ބުނެފައި ވަނީ، ތޮއްޔިބާއި އަކުރަމްގެ ސްލޫކީ މައްސަލަތައް ތަހުގީގު ކުރުމަށް ނިންމައި، ތަހުގީގު ކޮމިޓީ އެއް މިހާރު އެކުލަވާލާފައިވާ ކަމަށެވެ.
ތޮއްޔިބާ ގުޅިގެން ޖޭއެސްސީން ބަލަމުން ދަނީ، ސ. މީދޫ މެޖިސްޓްރޭޓް ކޯޓަށް ހުށަހެޅުނު މައްސަލައެއްގައި ތުހުމަތުކުރެވޭ މީހާގެ ބަންދުގެ މުއްދަތު އިތުރު ކުރުމަށް ގެންދިއުމުން އޭނާ، އެ މައްސަލައިގައި ގޮތެއް ނިންމެވުމުގައި ގާނޫނާ ހިލާފަށް އަމަލުކުރެއްވި ކަމަށް ބެލެވޭ މައްސަލައެކެވެ.
އަކްރަމާ ގުޅޭ ގޮތުން ބަލަން ނިންމާފައިވަނީ އޭނާ ހުކުމް ކުރެއްވި މައްސަލައެއްގައި ޝަރީއަތް ނިމުނުގޮތުގެ ހުލާސާ ރިޕޯޓް ދޫކުރި ފަހުން އެ ރިޕޯޓަށް ބަދަލު ގެނެސް ބައެއް ނުކުތާ އިތުރުކުރި ކަމަށް ބުނާ މައްސަލައަކާއި ފުވައްމުލަކު މެޖިސްޓްރޭޓް ކޯޓުގެ ދެ ގަޒިއްޔާއެއް ބެލުމުން ތަނާޒުލްވެފައިވަނީ ހަގީގަތާ ހިލާފު މައުލޫމާތެއް ހިއްސާކުރުމަށްފަހު ކަމަށް ބެލެވޭ މައްސަލައެކެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރާއި މިހާރު ހިނގަމުންދާ 19 ވަނަ ރައްޔިތުންގެ މަޖިލީހުން ޖުޑީޝަރީ އިސްލާހު ކުރުމަށް ކުރަމުންދާ މަސައްކަތުގެ ދަށުން ޖޭއެސްސީގެ ގާނޫނަށް ބޮޑެތި އިސްލާހުތަކެއް ގެނެސްފައި ވެއެވެ. އެގޮތުން ޖޭއެސްސީން ގެންދަނީ ޖުޑީޝަރީ އިސްލާހު ކުރުުމުގައި ހަރުދާނާ މަސައްކަތްތަކެއް ކުރަމުން ނެވެ.
އެގޮތުން، ފަނޑިޔާރުގެ ސްލޫކީ މައްސަލަތައް ބެލުމާއި، އެމައްސަލަތަކަށް އަވަހަށް ގޮތެއް ނިންމުމުގެ މަސައްކަތް ޖޭއެސްސީން ކުރަމުންދާއިރު، ކޯޓުތަކުގެ ހިންގުން ހަރުދާނާ ކުރުމުގެ ގިނަ މަސައްކަތްތަކެއްވެސް ޖޭއެސްސީން ދަނީ ކުރަމުން ނެވެ.
