ވޭތުވެދިޔަ އަހަރުތަކުގައި ޑެންގީ ހުން ޖެހިފައިވާ މިންވަރާއި، މިއަހަރުގެ މިހާތަނަށް ޑެންގީ ހުން ޖެހިގެން ރިޕޯރޓު ކޮށްފައިވާ އަދަދު ދަށްވެއްޖެއެވެ.

ހެލްތް މިނިސްޓްރީން އާންމުކޮށްފައިވާ "ރޯގާގެ ގޮތުގައި ފެތުރެމުންދާ ބަލިތަކުގެ ހާލަތު 2020" އިން ދައްކާ ގޮތުގައި 2019 ވަނަ އަހަރުގެ މި ދުވަސްވަރާ އަޅާބަލާއިރު މި އަހަރުގެ މިހާތަނަށް ޑެންގީހުން ޖެހިގެން ރިޕޯޓު ކޮށްފައިވާ އަދަދު ވަނީ ދަށަށް ގޮސްފައެވެ. އެގޮތުން އޮގަސްޓް މަހު 20 ކޭސް ރިޕޯޓުކޮށްފައިވާއިރު، ސެޕްޓެންބަރު މަހު ރިޕޯޓު ކޮށްފައިވަނީ 12 ކޭސްއެވެ.

މި ދުވަސްވަރު މަދިރީގެ ޒަރީއާއިން ފެތުރޭ ބަލިތައް މަދު ކަމުގައިވީ ނަމަވެސް ޑެންގީއާއި ޗިކުންގުންޔާ ފަދަ ބަލިތައް ކޮންޓްރޯލް ކުރުމަށާއި، ބަލިން ރައްކާތެރިވުމަށް ސަމާލުކަން ދިނުމަކީ މުހިންމު ކަމެއް ކަމަށް ހެލްތް މިނިސްޓްރީން ބުނެއެވެ.

ޑެންގީއިން ރައްކާތެރިވުމަށް ކުރެވިދާނެ މުހިންމު ކަންތައްތަކުގެ ތެރޭގައި މަދިރިން ރާއްކާތެރިވުމުގެ ގޮތުން ހަށިގަނޑު ރަނގަޅަށް ނިވާވާ ގޮތަށް ހެދުން އެޅުމާއި، މަދިރި ލޯޝަން، ސްޕްރޭ އަދި މޮސްކިޓޯ ރެޕެލެންޓް ބޭނުން ކުރެވޭނެއެވެ. އަދި މަދިރި އެންމެ ގިނަވާ ވަގުތު ކަމުގައިވާ ފަތިސް ގަޑީގައި އަދި ހަވީރު އިރު އޮއްސޭ ވަގުތު ގޭގެ ދޮރުތަކާއި ކުޑަ ދޮރުތައް ލައްޕާފައި ބެހެއްޓުމާއި، ހުސްފުޅި/ދަޅު ފަދަ ފެން ހަރުލާ ތަކެތި ގޯތިތެރެއާ މަގުމައްޗަށް އުކާނުލުން މުހިންމު ކަމަށެވެ.

ބަލި ޖެހިއްޖެނަމަ ގޭގައި ދެވިދާނެ ފަރުވާއަށް ބަލާއިރު، އަރާމު ކުރުން، ގިނަގިނައިން ދިޔާއެއްޗެއް ބޭނުން ކުރުމާއި، ހުން މަޑުކުރުމާއި، ގައިގައި ރިއްސުމަށާއި ހުޅުހުޅުގައި ރިއްސުމަށް ޕެރެސެޓެމޯލް ބޭނުން ކުރެވިދާނެއެވެ. އަދި ތިން ދުވަހަށް ވުރެ އިތުރަށް ހުން އަންނަ ނަމަ ނުވަތަ ދިޔާ ތަކެތި ބޭނުން ނުކުރެވޭނަމަ ނުވަތަ މާބޮޑަށް ވަރު ދެރަވާނަމަ ޑޮކްޓަރެއްގެ ލަފާ ހޯދުން މުހިންމު ކަމަށް ހެލްތް މިނިސްޓްރީން ބުނެއެވެ.