ދިވެހިރާއްޖޭގެ ގައުމީ ޔުނިވަރސިޓީ އާއި ގުޅިގެން ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ފެށުމަށް ހަމަޖެހިފައިވާ އެންޓިބޮޑީ ޓެސްޓިންގ މި ހަފްތާގައި ފަށާނެ ކަމަށް އެ ސެންޓަރުން ބުނެފިއެވެ.

ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީއިން ކުރި ސުވާލަކަށް ޖަވާބު ދެއްވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ އެންޓިބޮޑީ ޓެސްޓް ހެދުމުގެ ހުއްދަ ލިބިފައިވާ ކަމަށެވެ. އަދި އެކަމަށް ބޭނުންވާ ތަކެތި ލިބިފައިވާ ކަމަށާއި، މި ހަފްތާ ތެރޭގައި މަސައްކަތް ފަށައިގަނެވޭނެ ކަމަށެވެ.

ނަޒްލާ ވިދާޅުވީ ޓެސްޓް ހެދުމަށް ހަމަޖެހިފައިވަނީ މުޅި އާބާދީގެ ހުރިހާ އުމުރުފުރާއަކަށް ކަމަށާއި، އެގޮތުން ފުރަތަމަ ޓެސްޓް ހަދާނީ ސްކޫލް އުމުރުފުރާގެ ކުދިންގެ ކަމަށެވެ. މި ހަފްތާ ތެރޭގައި ޓެސްޓް ހެދުމުގެ މަސައްކަތް ފަށާނެ ކަމަށް އެޗްއީއޯސީން ބުނި ނަމަވެސް، މިކަން ފަށާނެ ސީދާ ތާރީހެއް ހާމަކޮށްފައެއް ނުވެއެވެ.

އިމިއުނިޓީއާ ގުޅޭގޮތުން ވާހަކަދައްކަވަމުން ނަޒްލާ ވިދާޅުވީ، އާބާދީގެ ތެރެއިން ވަކި ޕަސެންޓެއްގެ މީހުން އިމިއުންވާނެކަމަށް ބުނަން އެނގޭނީ ގިނަ ބައެއްގެ ސާމްޕަލް ނަގައިގެން ޓެސްޓު ކުރުމަށްފަހު ކަމަށެވެ. އަދި ފުދޭވަރެއްގެ ބޮޑު މަސައްކަތަކަށް މި މަސައްކަތް ވާނެ ކަން ފާހަގަކުރައްވާ ވިދާޅުވީ، މިހާރު މި ދިރާސާގެ ޕްރޮޓޮކޯލް ފާސްވެފައިވާ ކަމަށެވެ.

މީގެ ކުރިން ބޭއްވި ނޫސްވެރިންގެ ބައްދަލުވުމުގައި ހެލްތް ޕްރޮޓެކްޝަން އެޖެންސީގެ ކޮންސަލްޓަންޓް ޑރ. ޝީނާ މޫސާ ވިދާޅުވީ އެންޓިބޮޑީ ޓެސްޓު ހެދުމަށް މަޝްވަރާ ކުރެވިފައިވަނީ ވައިރަސްއަށް އިމިއުން މީހުން ދެނެގަތުމަށް ކަމަށެވެ.

މީގެ ކުރިން އޭޑީކޭ ހޮސްޕިޓަލުން ވެސް ވަނީ އެންޓިބޮޑީ ޓެސްޓު ހެދުމުގެ މަސައްކަތް ކޮށްފައެވެ. އެ ހޮސްޕިޓަލުން ހާމަކޮށްފައިވާ މައުލޫމާތަށް ބަލާއިރު، ކޮވިޑް-19 އާ ގުޅިގެން ފްރޮންޓްލައިންގައި މަސައްކަތްކުރާ މީހުންގެ ތެރެއިން 3004 މީހެއްގެ އެންޓިބޮޑީ ޓެސްޓު ހެދި އިރު، އޭގެ ތެރެއިން 125 މީހެއްގެ ހަށިގަނޑުން އެންޓިބޮޑީ ވަނީ ފެނިފައެވެ.