ކޮވިޑްގެ ހާލަތާއި ގުޅިގެން މީހުން ދިރިއުޅޭ ރަށްރަށުގައި ދަނޑުވެރިކަން ކުރުމަށް ބިން ބޭނުންކުރާނެ ގޮތުގެ އުސޫލު އެކުލަވާލާ އެގޮތަށް މަސައްކަތް ކުރުމަށް ކައުންސިލްތަކަށް އަންގާފައިވާނެ ކަމަށް މިނިސްޓަރ އޮފް ފިޝްރީޒް، މެރިން ރިސޯސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ކޮވިޑްގެ ހާލަތުގައި މަޖިލީހުން ކުރި ދިރާސާތަކުގެ އަލީގައި މަޖިލީހުން ސަރުކާރަށް ދިން ލަފާތަކުގެ ތެރޭގައި މީހުން ދިރިއުޅޭ ރަށްރަށުން ދަނޑުބިންތައް ދޫކުރުމަށް ދީފައިވާ ލަފާ ސަރުކާރުން ތަންފީޒު ކުރަމުންދަނީ ކިހިނެއްތޯ މެމްބަރަކު ވަނީ ސުވާލު ކުރައްވާފައެވެ. އެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ކޮވިޑާއި ގުޅިގެން ރައީސުލްޖުމްހޫރިއްޔާ ނިންމާފައިވަނީ މީހުން ދިރިއުޅޭ ރަށްރަށުން ދަނޑުބިން ހެއްދުމަށް އެއްވެސް ކުއްޔެއް ނެގުމަކާ ނުލާ ތިން އަހަރުގެ މުއްދަތަށް ބިން ދޫކުރުމަށް ކަމަށެވެ.
އެގޮތުގެ މަތިން ހުރިހާ ރަށެއްގެ ކައުންސިލްތަކަށް ވެސް އެ މައުލޫމާތު ފޯރުކޮށްދީފައިވާނެ ކަމަށް މިނިސްޓަރ ވިދާޅުވިއެވެ.
ހަމައެކާއެކު މީހުން ދިރިއުޅޭ ރަށްރަށުގެ ދަނޑުބިން ބޭނުންކުރާނެ ގޮތުގެ އުސޫލު އެކުލަވާލާ އެއާ އެއްގޮތަށް މަސައްކަތްކުރުމަށް ކައުންސިލްތަަކަށް ވާނެ ދަންނަވާފައި. މިއާއެކުގައި ކައުންސިލްތަކުގެ އިދާރާތަކަށް އޮންނާނެ ފޮނުވާފައި ދިން ބިންތަކުގެ ތަފްސީލު ފޮނުވުމަށް. ބައެއް ކައުންސިލްތަކުން ލިބިފައި ހުރީ. ގިނަ ކައުންސިލްތަކުން ނުލިބޭ.މިނިސްޓަރ އޮފް ފިޝްރީޒް، މެރިން ރިސޯސް އެންޑް އެގްރިކަލްޗަރ ޒަހާ ވަހީދު
މިނިސްޓަރ ވިދާޅުވީ މި މައުލޫމާތުތައް އެއްކުރަމުން އަންނަނީ ދަނޑުވެރިކަމުގެ ހާލަތު ރަނގަޅު ކުރުމަށް ހިންގާ ޕްރޮގްރާމްތަކަށް ބޭނުންވެގެން ކަމަށެވެ. ދަނޑުބިންތައް ދޫކުރުމަށް ހުޅުވާލުމަށް އެންގުމުން ގިނަ ކައުންސިލްތަކަކުން މިހާރު އެކަން ކުރަމުންދާ ކަމަށާއި ކުރީގައި ދަނޑުވެރިކަން ނުކުރާ ރަށްރަށުގައި ވެސް މިހާރު ދަނޑުވެރިކަން ކުރުމަށް ދަނޑުބިންތައް ދޫކޮށްފައިވާ ކަމަށް މިނިސްޓަރ ވިދާޅުވިއެވެ.
މީގެއިތުރުން ދަނޑުވެރިންނަށް ބޭނުންވާ މައުލޫމާތުތައް މިނިސްޓްރީން ފޯރުކޮށްދެމުން ގެންދާ ކަމަށް މިނިސްޓަރ ވިދާޅުވިއެވެ. އެގޮތުން މި މަހުގެ 5 ވަނަ ދުވަހުން ފެށިގެން މިނިސްޓްރީގެ ސޯޝަލް މީޑިޔާ އެކައުންޓްތަކުން ކޮންމެ ދުވަހަކު ވެސް އެ މައުލޫމާތުތައް ފޯރުކޮށްދެމުން އަންނަ ކަމަށް މިނިސްޓަރ ވިދާޅުވިއެވެ.
