ސުޕްރީމްކޯޓުން މިހާރު ސެލިއުޓް ކުރާވަރަށް މަސައްކަތްތައް ކުރަމުންގެންދާ ކަމަށް ފޮނަދޫ ދާއިރާގެ އެމްޑީޕީ މެމްބަރ މޫސާ ސިރާޖު ވިދާޅުވެއްޖެ އެވެ.
ރާއްޖެޓީވީގެ "ފަލަ ސުރުޚީ" ޕްރޮގްރާމްގައި ސުޕްރީމް ކޯޓުގެ މިހާރުގެ ބެންޗަކީ އިންސާފަށް މަސައްކަތް ކުރަން ކެރޭ ގާބިލް ބެންޗެއްތޯ ކުރެވުނު ސުވާލަށް ޖަވާބު ދެއްވަމުން ސިރާޖު ވިދާޅުވީ މިހާރުގެ ސުޕްރީމްކޯޓުން އެންމެ ބޮޑަށް ފާހަގަ ކުރެވޭ އެއް ކަމަކީ އާދަޔާ ޚިލާފަށް ރަނގަޅަށް ސުޕްރީމް ކޯޓުން މަސައްކަތް ކުރަމުން ދިޔުން ކަމަށެވެ. މިހާރުގެ ސުޕްރީމް ކޯޓުގެ ބެންޗަކީ 19 ވަނަ ރައްޔިތުންގެ މަޖިލީހުން އަލުން އެކުލަވާލާފައިވާ ބެންޗެކެވެ.
ސިރާޖު ވިދާޅުވީ މީގެކުރިން އަބަދުވެސް ފެންނަނީ ޝަރީޢަތްތަކަކީ ވަރަށް ބޮޑަށް ސިއްރުން މީހަކަށް އަޑުނީވޭ ގޮތަށް ބަންދުކުރެވިގެން ވަރަށް ބޮޑަށް ވަގަށް ކުރެވިގެންދިޔަ ކަމެއްގެ ގޮތުގައި ކަމަށެވެ. އެހެންނަމަވެސް މިހާރުގެ ސުޕްރީމް ކޯޓުން ޝަރީޢަތްތައް ކުރިޔަށް ގެންދަނީ އާންމުންނަށް ވެސް އެނގޭ ގޮތަށް ހުޅުވާލެވިގެން ކަމަށް ސިރާޖު ވިދާޅުވިއެވެ.
އެހެންނަމަވެސް މިހާރުގެ ސްޕްރީމްކޯޓުން އަޅުގަނޑު ވަރަށް ބޮޑަށް އުފާވާކެއް ހުރިހާ ޝަރީޢަތްތަކެއް ލައިވްކުރެވިގެން އަދި ޚާއްސަކޮށް ޒަމާނަށް ފެތޭގޮތަށް ޓްވިޓަރއިންނާއި ޔޫޓިއުބުންނާއި ހަމަ އާންމުންނަށް ފަސޭހައިން އަޑުއަހާލެވޭ ގޮތްތަކަށް ޝަރީޢަތްތައް ހުޅުވާލެވިގެން މިދަނީ. އަދި އޭގެއިތުރުން ފެނިގެންދިޔައީ ސްޕްރީމް ކޯޓަކީ ވޭތުވެދިޔަ މުޅި ތާރީޚަށް ބަލާއިރު މައްސަލަ ނިންމާ ކޯޓެއް ނޫން. އާންމު އުސޫލެއްގެ ގޮތުން ސަރކިޔުލަރ އެއް ނެރެލާ ސްމޫޓޯއެއް ނެރެލާ އެގޮތަށް ގެންދިޔަ ސްޕްރީމް ކޯޓެއް އަޅުގަނޑުމެންނަށް ފެނިގެންދިޔައީ. އެހެންނަމަވެސް މިހާރު ރައްޔިތުންނަށް އެންމެ ބޮޑަށް ލިބޭ ހިތްހަމަޖެހުމަކީ ކޮންމެ ދުވަހަކުވެސް ސްޕްރީމް ކޯޓުގެ އަޑުއެހުންތައް ކުރިޔަށް އެބަދޭ. މީގެކުރީގެ 8 އަހަރު 10 އަހަރު ވެފައިހުރި މައްސަލަތައް އެދަނީ ނިންމަމުން.ފޮނަދޫ ދާއިރާގެ މެމްބަރ މޫސާ ސިރާޖު
ސިރާޖު ވިދާޅުވީ ސުޕްރީމް ކޯޓުގެ މަސައްކަތްތައް މިހާރު އެދާ ރޭޓަށް ބަލާއިރު އަންދާޒާ ކުރެވޭ ގޮތުގައި މިއަންނަ އަހަރު މެދާ ހަމައަށް ދާއިރު އެއް އަހަރަށްވުރެ ގިނަ ދުވަސްވެފައި ހުރި މައްސަލަތައް ސްޕްރީމް ކޯޓުގައި ހުންނާނެ ކަމަށް ގަބޫލުނުކުރެއްވޭ ކަމަށެވެ.
ބުރާސްފަތި ދުވަހު ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ބޭންކް އެކައުންޓުތައް ފްރީޒް ކުރުމަށް ކްރިމިނަލް ކޯޓުން އަމުރު ނެރެފައިވަނީ ގާނޫނާ އެއްގޮތަށް ނޫން ކަމަށާއި، ކްރިމިނަލް ކޯޓުގެ އެ އަމުރު ބާތިލް ކުރުމަށް ހައިކޯޓުން ނިންމާފައިވާ ނިންމުމަށް ސުޕްރީމް ކޯޓުން ވެސް ތާއީދުކޮށް ނެރުނު އަމުރާއި ގުޅޭގޮތުން ވާހަކަ ދައްކަވަމުން ސިރާޖު ވިދާޅުވީ މިހާރު ފެނިގެންދަނީ ކޯޓުތަކާމެދު ރައްޔިތުންގެ އިތުބާރު ބިނާކުރެވިގެން ދާތަން ކަމަށެވެ.
ރައީސް ޔާމީން ކަމުގައިވީނަމަވެސް އަދި އެހެން މީހެއް ކަމުގައިވީނަމަވެސް ސާފުކޮށް ޔަގީންވާ ކަމަކީ އެ އޮންނަ އިޖުރާޢަތެއްގެ ބޭރުން، ޤާނޫނުން ބޭރުން ކަމެއްކޮށްފިނަމަ ޝަރުޢީ ނިޒާމުގައި އިންސާފު ލިބިގެންދާނެކަން ކަމަށް ސިރާޖު ވިދާޅުވިއެވެ.
އަޅުގަނޑުމެން އަބަދުވެސް ވަކާލާތު ކުރަމުން މިދިޔަ ކަމަކީ ކޯޓުތަކުން އެނެރޭ ހުކުމްތައް ޤާނޫނުގައި އޮންނަ އެއްޗެކަށް ބަލަންޖެހޭނެ ކަމަށް. އެއީ ވަކި މީހަކަށް އެކަނި ޤާނޫނުތަކުން ލިބެންޖެހޭ ރައްކާތެރިކަން ލިބުން އެއީ އަބަދުވެސް ވަކާލާތު ކުރަމުންދިޔަ ކަންތައް. ސްޕްރީމް ކޯޓުގެ މިއަދުގެ އަޑުއެހުމުން ފާހަގަވި ކަމަކީ ރައީސް ޔާމީންގެ އެކައުންޓްތައް ފްރީޒްކުރުމަށް އަމަލުކުރިއިރު ފުލުހުން އިޖުރާޢާތްތަކުން ބޭރުން އަމަލުކޮށްފައިވާކަމަށް ފެންނާތީވެ ނެރުނު އަމުރަކީ ސައްހަ އަމުރެއް ނޫންކަމަށް ނެރެފައިއެއޮތީ.ފޮނަދޫ ދާއިރާގެ މެމްބަރ މޫސާ ސިރާޖު
ސިރާޖު ވިދާޅުވީ ރައީސް ޔާމީން ކުރެއްވި ކަމެއް އިޖުރާއީ މައްސަލައަކާއި ގުޅިގެން ދައުލަތަށް އޭގެ އަސަރުކުރާތީ ނޫނީ ރައްޔިތުންނަށް އެކަމުގެ ކަންބޮޑުވުން އުފުދޭތީ އެކަމާއި ހިތާމަ ކުރައްވާ ކަމަށެވެ. އެހެންނަމަވެސް އެއާއެކުގައި ހިތްހަމަޖެހުން ލިބެނީ ޝަރުޢީ ދާއިރާގައި ބޭނުންވާ ކޯޓުތައް އުފެދިގެންދާ މަންޒަރު ފެނުން ކަމަށް ސިރާޖު ވިދާޅުވިއެވެ.
