ގދ. ކާޑެއްދޫ އެއަރޕޯޓުގެ ތަރައްގީއަށް ކުރަންޖެހޭ އެންމެހާ މަސައްކަތް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން ކުރައްވާނެ ކަމާމެދު ޝައްކު ނުކުރައްވާ ކަމަށް މަޑަވެލި ދާއިރާގެ މެންބަރު ހުސައިން ފިރުޝާން ވިދާޅުވެއްޖެއެވެ.
ކާޑެއްދޫ އެއަރޕޯޓު 2013 ވަނަ އަހަރު ވިލާ ޝިޕިންގ އެންޑް ޓްރޭޑިން ކޮމްޕެނީއާ ހަވާލުކޮށްފައި ވަނިކޮށް، ކުރީގެ ރައީސް އަބްދުﷲ ޔާމީންގެ ސަރުކާރުން ވަނީ 2017 ވަނަ އަހަރު ވިލާގެ އެއްބަސްވުން އުވާލާފައެވެ. އެއާއެކު ވިލާ ކުންފުނިން އެ މައްސަލަ ސިވިލް ކޯޓަށް ވެއްދުމުން 2018 ވަނަ އަހަރު އެ ކޯޓުން ވަނީ ސަރުކާރާއި ވިލާ ކުންފުންޏާ ދެމެދު ވެފައިވާ އެއްބަސްވުން ބާތިލް ކޮށްފައިވަނީ ގާނޫނާ ހިލާފަށް ކަމަށް ކަނޑައަޅައި، އެ ކުންފުންޏަށް އަލުން އަނބުރާ އެއާރޕޯޓު ހަވާލުކުރުމަށް ހުކުމް ކޮށްފައެވެ. އަދި ފާއިތުވި 2019 ވަނަ އަހަރު ހައި ކޯޓުން ވަނީ ސިވިލް ކޯޓުން ކުރި ހުކުމަށް ތާއީދު ކޮށްފައެެވެ.
ނަމަވެސް މިހާރުގެ ސަރުކާރުންވެސް ވަނީ ކާޑެއްދޫ އެއަރޕޯޓު ވިލާ ކުންފުންޏަށް އަނބުރާ ދޭން ކުރި ހުކުމް ސުޕްރީމް ކޯޓުގައި އިސްތިއުނާފް ކޮށްފައެވެ.
ކާޑެއްދޫ އެއަރޕޯޓުގެ މައްސަލަ ސުޕްރީމް ކޯޓަށް ވެއްދުމާއި ގުޅިގެން މަޑަވެލި ދާއިރާގެ މެންބަރު ހުސައިން ފިރުޝާން ރާއްޖެއެމްވީ އަށް މައުލޫމާތު ދެއްވަމުން ވިދާޅުވީ، ސަރުކާރުން އެއްބަސްވެފައިވާ ގޮތަށް ކާޑެއްދޫ އެއަރޕޯޓު ތަރައްގީ ކުރެވިގެންދާނެ ކަމަށެވެ. އަދި ރައީސް އިބްރާހީމް މުހައްމަދު ޞާލިހުގެ ރިޔާސީ ވައުދު ފުއްދުމަށް ކުރަންޖެހޭ މަސައްކަތުގައި ފުރިހަމަ އެއްބާރުލުން ދެއްވާ ކާޑެއްދޫ އެއާރޕޯޓުގެ މައްސަލަ ހައްލު ކުރައްވާނެ ކަމަށްވެސް ފިރުޝާން ވިދާޅުވިއެވެ.
މެންބަރު ވިދާޅުވީ ކާޑެއްދޫގެ އެއަރޕޯޓަކީ ގދ. އަދި ގއ. އަތޮޅުގެ ރައްޔިތުންނާ ގުޅިފައިވާ މުހިންމު ތަނަކަށްވީއިރު، އެ ދެ އަތޮޅުގެ ފަތުރުވެރިކަން ކުރިއަށް ގެންދިއުމުގައިވީ އެންމެ އަވަހަށް އެއަރޕޯޓު އިންޓަނޭޝަނަލް ކުރުމަކީ ކޮންމެހެންވެސް ކުރަންޖެހޭ ކަމެއް ކަމަށެވެ. އަދި އެ މަސައްކަތް ކުރުމަށްވެސް ސަރުކާރާއެކު މަޝްވަރާ ކުރެވެމުންދާކަން މެންބަރު ފާހަގަކުރެއްވިއެވެ.
އަޅުގަނޑު މިދަނީ ސަރުކާރާއެކު މިކަމާ މަޝްވަރާކުރަމުން. އެއާރޕޯޓުގެ ބޭނުން އެންމެ އެދެވޭ ގޮތުގައި ހިދުމަތް ދޭން މަސައްކަތް ކުރަންޖެހޭ. މިހާރު މި މައްސަލައަށް އަވަހަށް ހައްލު ގެނެސް އެ ދެ އަތޮޅުގެ ރައްޔިތުންނަށް ރަނގަޅު ހިދުމަތެއް ދޭންޖެހޭ. އެއާރ ޕޯޓު އިންޓަނޭޝަނަލް ތަނަކަށް ހެދުމަކީ އަޅުގަނޑުގެ އެންމެ ބޮޑު އަމާޒު. ރައްޔިތުންގެ އެދުމާއެކު މިބަދަލު ގެންނަން މަސައްކަތް ކުރާނަން.މަޑަވެލި ދާއިރާގެ މެންބަރު ހުސައިން ފިރުޝާން
ކާޑެއްދޫ އެއަރޕޯޓުގެ ތަފާތު އެކި މައްސަލަތައް މީގެ ކުރިން ފެންމަތިވެގެން ގޮސްފައިވާއިރު، އެ އެއަރޕޯޓުން ރަނގަޅު ހިދުމަތެއް ނުލިބޭތީ ރައްޔިތުން އަންނަނީ ކަންބޮޑުވުން ފާޅުކުރަމުންނެވެ. އެއާއެކު ރައީސް ޞާލިހު ވަނީ ރިޔާސީ އިންތިހާބުގެ ކެމްޕޭނު ދުވަސްވަރު ކާޑެއްދޫ އެއަރޕޯޓަށް ހެޔޮ ބަދަލެއް ގެންނަވައި އެއަރޕޯޓުގެ ހިދުމަތްތައް މިހާރަށް ފުޅާ ކުރައްވާނެކަން ހާމަކުރައްވާފައެވެ.
