ޤައުމީ ދުވަހު "އިންޑިއާ އައުޓް" ގެ ނަމުގައި އެ ގައުމާ ދެކޮޅަށް އިދިކޮޅު ޕްރޮގްރެސިވް ކޯލިޝަނުން މާލޭގައި މުޒާހަރާއެއް ބާއްވަން ރާވަމުންދާ ކަމުގެ މައުލޫމާތު ރާއްޖެއެމްވީއަށް ލިބިއްޖެއެވެ.
ޤައުމީ ދުވަހަކީ ރަބީއުލްއައްވަލު މަހުގެ 1 ވަނަ ދުވަހެވެ. އެ ދުވަހަކީ ޕޯޗުގީޒުންގެ އަތްދަށުން ބޮޑު ތަކުރުފާނު މި ދިވެހި ފަސްގަނޑު މިނިވަންކުރި ދުވަހެވެ.
ޤައުމީ ދުވަހު އިދިކޮޅުން މުޒާހަރާ ކުރަން ތައްޔާރުވާ ކަމުގެ މައުލޫމާތު ލިބިފައިވާއިރު، އެ ފަރާތުން އަންނަނީ ދިވެހިރާއްޖެ އިންޑިއާގެ އަޅުވެތިކަމަށް ގޮސްފައިވާ ކަމަށް ބުނެ ތަފާތު ފޯރަމްތަކުގައި ވާހަކަ ދައްކަމުންނެވެ. އަދި އިންޑިއާގެ ސިފައިން ރާއްޖޭގައި ތިބޭ ތިބުން ކުށްވެރިކޮށް އެ ފަރާތްތައް މި ގައުމުން ބޭރުކުރުމަށް ގޮވާލަމުންނެވެ.
އިންޑިއާ ސަރުކާރުން ރާއްޖޭގެ ތަރައްގީއަށާއި، އިގްތިސާދީ ކަނޑުގެ ސަރަހައްދު ބެލެހެއްޓުމަށް ވެދެމުންދާ އެހީތެރިކަމަކީ އިދިކޮޅަށް ބަލައިގަންނަން އެހާ ފަސޭހަ ކަމަކަށް ނުވާނެ ކަމަށް ސަރުކާރަށް ތާއީދުކުރާ ފަރާތްތަކުން އަންނަނީ ބުނަމުންނެވެ.
ޤައުމީ ދުވަހާ ގުޅިގެން އިދިކޮޅުން މުޒާހަރާއަކަށް ތައްޔާރުވަމުން އަންނައިރު، އެ ދުވަހުގެ މުޒާހަރާގެ ބައިވެރިން ބޭނުން ކުރަން ނިންމާފައިވަނީ ދިވެހި ހެދުމެވެ. އަދި އެ ދުވަހަށް އިންޑިއާ އައުޓް ޖަހާފައިވާ ކަޅު ދިދައެއް ވެސް ބޭނުން ކުރުމަށް ނިންމާފައިވާކަން ރާއްޖެޓީވީއަށް ވަނީ އެނގިފައެވެ.
މިފަދަ ގޮތް ގޮތަށް ހަދާފައި ހުންނަ ކަޅު ދިދައަކީ ހައްދު ފަހަނަ އަޅާފައިވާ ޖަމާއަތްތަކުން ވެސް ބޭނުންކުރާ ޒާތުގެ ދިދައެވެ. އަދި ހައްދު ފަހަނައަޅާފައިވާ އައިސިސް ޖަމާއަތުން ގެންގުޅޭ ދިދަވެސް ހުންނަނީ އެއްކޮށް ކަޅު ކުލައިގަކަން ފާހަގަކޮށްލެވެއެވެ.
އިދިކޮޅުން ވަނީ އޮގަސްޓު މަހުގެ 28 ވަނަ ދުވަހާއި ހުސްވި ސެޕްޓެމްބަރު މަހުގެ 12 ވަނަ ދުވަހުވެސް މާލެ އާއި ރާއްޖޭގެ އެކި ހިސާބުތަކުގައި މުޒާހަރާކޮށްފައެވެ. އަދި އެ ދެ ދުވަހުވެސް އިދިކޮޅުން ވަނީ އިންޑިއާ އާއި ދެކޮޅަށް އަޑު އުފުލާފައެވެ. ޤައުމީ ދުވަހާ ގުޅުވައިގެން އިދިކޮޅުން މުޒާހަރާއަކަށް ތައްޔާރުވަމުން އަންނައިރު، އެކަމާ ގުޅޭ ސޯޝަލް މީޑިއާ ޕޯސްޓަރުތަކާއި ދުވަހަށް ތައްޔާރުވުމަށް ޕީޕީއެމް ޕީއެންސީގެ މެންބަރުންގެ މެދުގައި ގްރޫޕުތަކެއްވެސް ވަނީ ހަދާފައެވެ.
