ރާއްޖޭން އިންޑިއާއާ އެކު ސޮއިކޮށްފައިވާ އެއްބަސްވުންތަކުގެ މައުލޫމާތު ހާމަކުރަން ސަރުކާރަށް ގޮވާލައި ނައިފަރު ދާއިރާގެ ޕީޕީއެމް މެމްބަރ އަޙްމަދު ޝިޔާމް ހުށަހެޅުއްވި ކުއްލި މައްސަލަ ބަލައިނުގަނެ ބޭރުކޮށްލައިފިއެވެ.
ޝިޔާމް ހުށަހެޅުއްވި ކުއްލި މައްސަލައިގައި ވަނީ އިންޑިއާއާ އެކު ރާއްޖެއިން ސޮއިކޮށްފައިވާ އެކި އެއްބަސްވުންތަކުގެ ސަބަބުން ރާއްޖޭގެ މިނިވަންކަމާއި ސިޔާދަތަށް ބުރޫ އަރައިފާނެ ކަމުގެ ކަންބޮޑުވުން އެބަ އޮތް ކަމަށެވެ.
އެގޮތުން އެންމެ ފަހުން ރާއްޖެއަށް ދިން ޑޯނިއާ މަތިންދާބޯޓް ދިނުމަށް ވެފައިވާ އެއްބަސްވުމާ އެ ބޯޓް އޮޕަރޭޓްކުރުމާއި މަރާމާތުކުރުމުގެ ކަންތައްތަކަށް އިންޑިއާ ސިފައިންގެ އެތައް ބަޔަކު ރާއްޖޭގައި ތިބޭ އިރު އެ އެއްބަސްވުމުގައި އޮތީ ކޮން ކަމެއްކަން ސަރުކާރުން ހާމަކޮށްފައި ނުވާ ކަމަށް ޝިޔާމް ހުށަހެޅުއްވި މައްސަލައިގައި ވެއެވެ. ކުއްލި މައްސަލައިގައި ކަންބޮޑުވުން ފާޅުކުރައްވާފައިވާ އެހެން ކަންތައްތަކުގެ ތެރޭގައި އައްޑޫގައި އިންޑިއާގެ އެހީގައި ގާއިމްކުރާ ޕޮލިސް އެކަޑަމީގެ މައްސަލަ ހިމެނެއެވެ.
ބުދަ ދުވަހުގެ ޖަލްސާގައި މި ކުއްލި މައްސަލައާއި ބަލައިނުގަންނަކަން ހާމަކުރައްވާ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ރާއްޖޭގެ ސަލާމަތާއި ރައްކާތެރިކަމާއި އަދި ދޭދޭ ގައުމުތަކާއި އެކުގައި ދިވެހިން ބާއްވަންޖެހޭ ގުޅުމާއި، މިކަންކަމަކީ ސީދާ ރައީސުލްޖުމްހޫރިއްޔާ ކޮމާންޑަރ އިން ޗީފްގެ ގޮތުގައި އަދާކުރައްވަންޖެހޭ މަސްއޫލިއްޔަތުތަކެއް ކަމަށެވެ. އަދި ރައްޔިތުން ބުރައެއް އުފުލަންޖެހޭ އެގްރިމެންޓެއް ދިވެހި ދައުލަތުން ކުރާނަމަ އެއެގްރިމެންޓެއް ކުރެވުނީ މަޖިލީހުން ހުއްދަދީގެން ކަމަށް ރައީސް ނަޝީދު ވިދާޅުވިއެވެ.
އަޅުގަނޑަކަށް އެއްވެސް ޝައްކެތް ނުހިނގާ އެބާވަތުގެ އެގްރިމެންޓެއް ރައީސް ކުރައްވާނަމަ ނުވަތަ ސަރުކާރުން ކުރާނަމަ މިމަޖިލީހަށް އޭގެ ފުރިހަމަ މައުލޫމާތު ލިބިވަޑައިގަންނަވާނެ، އަދި މެމްބަރު ތިޔަ އެދިވަޑައިގަންނަވާ މައުލޫމާތު ރަނގަޅަށް މަޖިލީހުގެ ސަލާމަތާއި ޚިދުމަތްތަކާއި ބެހޭ ކޮމިޓީ މެދުވެރިކޮށްގެން މެމްބަރަށް ހޯއްދެވޭނެ. ދެކޭގޮތުގައި މިއީ މަޖިލީހަށް ބަލައިގަނެވެން އޮތް ކުއްލި މައްސަލައެއް ނޫން.ރައްޔިތުންގެ މަޖިލީހުގެ ރައީސް ، ރައީސް މުހައްމަދު ނަޝީދު
އެއާއެކު ޝިޔާމް ވަނީ ނިޒާމީ މައްސަލަ ނަންގަވައި މިއީ ޑިމޮކްރަސީގައި ފަހަތަށް އެޅި ފިޔަވަޅެއް ކަމަށް ވިދާޅުވެ އެކަމާއި ހިތާމަކުރައްވާކަމަށް ވިދާޅުވެފައެވެ. އަދި މި ސަރުކާރު ދެމިއޮތްހާ ހިނދަކު މަޖިލީސް ތަޅުލާފައި ބެހެއްޓުމަށް ޝިޔާމް ވިދާޅުވިއެވެ.
ޝިޔާމްގެ އިތުރުން ކާށިދޫ ދާއިރާގެ މެމްބަރ އަބްދުﷲ ޖާބިރު ވެސް ވަނީ އެމައްސަލަ ބަލައިނުގަންނަވަނީ މަޖިލީހުގެ ގަވާއިދުގެ ކޮން މާއްދާއަކަށް ބައްލަވާފައިތޯ އައްސަވާފައެވެ. އެކަން ސާފުކޮށްދެއްވަމުން ރައީސް ނަޝީދު ވިދާޅުވީ ގަވާއިދު ބަލައިފިނަމަ ހުރިހާ މާއްދާއަކުންވެސް ޖާގަ ލިބޭގޮތަށް އެބައޮތް ކަމަށެވެ.
ފުރަތަމަ ކަމަކަށް ކަން ވާންޖެހޭ ކުއްލި. ކިހިނެއްތޯ ކުއްލި ވެވެނީ އެބޭފުޅުންގެ ސަރުކާރުއްސުރެ ހިނގަމުން އަންނަ ކަމެއް. އޭގެ ބޮޑު މަސައްކަތް ކުރައްވާފައި އޮތީ އެބޭފުޅުންގެ ސަރުކާރުގައި.ރައްޔިތުންގެ މަޖިލީހުގެ ރައީސް ، ރައީސް މުހައްމަދު ނަޝީދު
ރައީސް ނަޝީދު ވަނީ މީގެކުރިންވެސް އިންޑިޔާއިން ގެނައި ޑޯނިއަރ ބޯޓުގެ މައްސަލައިގައި އިދިކޮޅުން ފާޑުކިޔަން ފެށުމުން އެެއީ ރައީސް ޔާމީންގެ ވެރިކަމުގައި އިންޑިޔާއާއެކު ވެފައިވާ އެއްބަސްވުމެއްގެ ތެރެއިން ހިނގާ ކަމެއްކަމަށް ވިދާޅުވެފައެވެ.
