ރައީސުލްޖުމްހޫރިއްޔާ އިބްރާހިމު މުހައްމަދު ސޯލިހު އާއި ރައްޔިތުންގެ މަޖިލިހުގެ ރައީސް މުހައްމަދު ނަޝީދު ބައްދަލުކުރައްވާ، ސަރުކާރާއި މަޖިލިސް ގުޅިގެން މަސައްކަތްތަކެއް ކުރުމަށް މަޝްވަރާ ކުރައްވައިފިއެވެ.
ބުދަ ދުވަހު ރައީސް އޮފީހުގައި ބޭއްވެވި ބައްދަލުކުރެއްވުމަށް ރައީސް ސޯލިހު ކުރެއްވި ޓްވީޓެއްގައި ވިދާޅުވީ، އެ ބައްދަލުވުމުގައި ގިނަ ކަންތައްތަކާމެދު މަޝްވަރާ ކުރެވުނު ކަމަށެވެ. އެގޮތުން ކޯވިޑް-19 އާއި އިގްތިސާދީ ދަތިކަމުން އަރައިގަތުމަށް ދައުލަތުގެ ދެ ބާރު ގުޅިގެން މަސައްކަތް ކުރުމުގެ މުހިއްމުކަން ފާހަގަކުރެއްވި ކަމަށް ވެސް ވިދާޅުވިއެވެ.
ރައީސްގެ ޓްވީޓް ނިންމަވާލެއްވީ "ﷲ ގެ އިރާދަފުޅާއެކު އަޅުގަނޑުމެން ކުރިއަށް ދާނީ ރަނގަޅު މިސްރާބަށް" ކަމަށް ވިދާޅުވެއެވެ.
ރައީސް ސޯލިހު އާއި ރައީސް ނަޝީދު ބައްދަލުކުރައްވާފައި މިވަނީ ކެބިނެޓުގައި ތިއްބެވި އެމްޑީޕީގެ ބައެއް ވަޒީރުންނަށް ރައީސް ނަޝީދު ފާޅުގައި ފާޑުވިދާޅުވާތާ ދުވަސްތަކެއް ވެފައި ވަނިކޮށެވެ. ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވެސް ރައީސް ނަޝީދު ވަނީ އެ މަނިކުފާނަކީ ސަރުކާރުގެ ބައިވެރިއެއް ނޫން ކަމަށް ވިދާޅުވެފައެވެ. ނަމަވެސް، ތާއީދު ކުރައްވަނީ ސަރުކާރަށް ކަމަށް ވިދާޅުވިއެވެ.
