މި ސަރުކާރުން ރައްޔިތުންގެ މަޖިލީހަށް ސިފައިން ވައްދާނެ ކަމަށް ގަބޫލުފުޅު ނުކުރައްވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ބުދަ ދުވަހުގެ ޖަލްސާއަށް ނައިފަރު ދާއިރާގެ ޕީޕީއެމް މެމްބަރު އަޙްމަދު ޝިޔާމް ވަނީ އިންޑިޔާއާއެކު ވެފައިވާ އެއްބަސްވުންތަކާއި ގުޅިގެން ކުއްލި މައްސަލައެއް ހުށަހަޅުއްވާފައެވެ. ނަމަވެސް ރިޔާސަތުގައި އިންނެވި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވަނީ ކުއްލި މައްސަލަ ބަލައިގަނެވެން ނެތް ކަމަށް ވިދާޅުވެފައެވެ.

އެއާއެކު ޝިޔާމް ވަނީ ނިޒާމީ މައްސަލަ ނަންގަވައި މިއީ ޑިމޮކްރަސީގައި ފަހަތަށް އެޅި ފިޔަވަޅެއް ކަމަށް ވިދާޅުވެ އެކަމާއި ހިތާމަކުރައްވާކަމަށް ވިދާޅުވެފައެވެ. އަދި މި ސަރުކާރު ދެމިއޮތްހާ ހިނދަކު މަޖިލީސް ތަޅުލާފައި ބެހެއްޓުމަށް ޝިޔާމް ވިދާޅުވިއެވެ.

ޝިޔާމް މި މޭރުމުން ވާހަކަދެއްކެވުމުން ނަޝީދު ވިދާޅުވީ ޤާނޫނު އަސާސީ އޮންނަގޮތުން މަޖިލީހުގައި އަހަރަކު ތިން ދައުރު އޮންނަންޖެހޭ ކަމަށާއި ހަފްތާއަކު ތިން ދުވަހު ޖަލްސާތައް ބާއްވަން ޖެހޭ ކަމަށެވެ. ދިވެހި ފުލުހުންނާއި ސިފައިން މަޖިލީހަށް ވަދެ ބަންދުކުރަން އުޅެއްޖެނަމަ މެމްބަރުންނާ އެކީގައި އެންމެފަހު މީހާއާ ޖެހެންދެންވެސް ދިފާޢުގައި ހުންނަވާނެކަމަށް ނަޝީދު ވިދާޅުވިއެވެ.

ރައީސް ނަޝީދު މިހެން ވިދާޅުވެފައިވާއިރު، މިދިޔަ އަހަރުގެ ނަސްރުގެ ދުވަހުގައި ރާއްޖެ ޓީވީން ގެނެސްދިން "ފަށާއިރު" ޕްރޮގްރާމްގައި މިދިޔަ ސަރުކާރުގައި ސިފައިން ރައްޔިތުންގެ މަޖިލިސް ހިސާރުކުރި ކުރުމަށް އިޝާރާތްކޮށް މިއަދު އެފަދަ އަމަލެއް ސިފައިން ހިންގަފާނެތޯ ޑިފެންސް މިނިސްޓަރ މާރިޔާ އަހުމަދު ދީދީއާ ދެންނެވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ސިފައިންނަކީ އަންނަ އޯޑަރަކަށް މަސައްކަތް ކުރާ ބައެއް ކަމަށެވެ.

ސިފައިން ގޮސް މަޖިލީހަށް ވަނުމުން އެއީ ސިފައިންގެ މީހާ އާއި ދައްކަންޖެހޭ ވާހަކައެއް ނޫންކަމަށް މިނިސްޓަރ ވިދާޅުވިއެވެ. ސިފައިންގެ ކޮމާންޑަރ އިން ޗީފަކަށް ރައީސުލްޖުމްހޫރިއްޔާ ހުންނަވާއިރު، ސިފައިންގޮސް އެގޮތަށް ވަންނަނީ ރައީސުލްޖުމްހޫރިއްޔާ އެގޮތަށް އޯޑަރު ދެއްވީމަކަމަށް މިނިސްޓަރ ވިދާޅުވިއެވެ.

ރައީސް އަބްދުﷲ ޔާމީންގެ ވެރިކަމުގައި 2017 ވަނަ އަހަރު ސިފައިން ވަނީ މަޖިލީހުގެ އިދާރާގެ ގޭޓްގައި ތަޅު އަޅުވައި އެތަނަށް މެމްބަރުންނަށް ނުވަދެވޭގޮތަށް ފޯރިމަރާފައެވެ. އޭރުގެ އިދިކޮޅު މެމްބަރުން އަދި މިހާރުގައި ސަރުކާރުގައި ހިމެނިވަޑައިގެންނަވާ މެމްބަރުން މަޖިލީހުގެ ތެރެއަށް ވެންނެވުމަށް މަސައްކަތްކުރެއްވުމުން ސިފައިން ވަނީ އެކަމަށް ހުރަސް އަޅާފައެވެ. އަދި މިކަމުގެ ތެރޭގައި ހަމަނުޖެހުންތައް ހިނގާފައިވެސްވެއެވެ.