މަސްތުވާތަކެތި ނައްތާލުމަށް އޮބްޒާވަރުންގެ ގޮތުގައި ބައިވެރިވުމަށް އެދުނު މީހުންގެ ތެރެއިިން 12 މީހަކަށް ފުރުސަތުދީފިއެވެ.

ފުލުހުން ބުނީ، އެކި މައްސަލަތަކާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ މަސްތުވާތަކެތީގެ ތެރެއިން މިއަހަރުގެ ޖޫން މަހާ ހަމައަށް ނައްތާނުލެވިހުރި 300 ކިލޯއަށްވުރެ ގިނަ މަސްތުވާތަކެތި ނައްތާލުމުގައި އޮބްޒާވަރުންގެ ގޮތުގައި ބައިވެރިވުމަށް އާންމުންނަށް ހުޅުވާލި ފުރުސަތުގައި، އެކަމަށް އެދުނު މީހުންގެ ތެރެއިން 12 މީހަކަށް ފުރުސަތުދިނުމަށް ނިންމަފައިވާކަމަށެވެ.

މަސްތުވާތަކެތި ނައްތާލުމުގައި އޮބްޒާވަރުންގެ ގޮތުގައި ބައިވެރިވުމަށް އެދި ޕޮލިސް މީޑިއާއަށް އީމެއިލް ކުރުމަށް ހުޅުވާލާފައިވަނީ އަންގާރަ ދުވަހުގައެވެ. އެފުރަސަތަށް އެދި މިއަދުގެ 14:00 އާ ހަމައަށް 24 މީހަކު ޝައުގުވެރިކަން ފާޅުކޮށްފައިވާއިރު އޮބްޒާވަރުންގެ ގޮތުގައި ހޮވުނު 12 މީހުންނަށް ފުރުސަތު ދީފައިވަނީ މެއިލް ކޮށްފައިވާ ތަރުތީބުންކަމަށް ފުލުހުން ބުނެއެވެ.

މަސްތުވާތަކެތި ނައްތާލުން ކުރިއަށްދާނީ ބުރާސްފަތި ދުވަހުގެ ހެނދުނު 10:00 ގައި ދޫނިދޫގައެވެ.