ކުޅުދުއްފުށި ސިޓީގައި ހުންނަ ފުލުހުންގެ އިދާރާގައި މަސައްކަތްކުރާ ފުލުހަކު ކޮވިޑް-19 އަށް ޕޮޒިޓިވްވުމާއި ގުޅިގެން މޮނިޓަރިންއަށްލި އުތުރުގެ ހަ ރަށުގެ މޮނިޓަރިންގެ ހާލަތު އުވާލައިފިއެވެ.

ހޯމަ ދުވަހުގެ ރޭ މޮނިޓަރިންގެ ހާލަތަށް ގެނެސްފައިވަނީ ކުޅުދުއްފުށީގެ އިތުރުން، ހއ. ބާރަށް، ހއ. ދިއްދޫ، ހއ. ހޯރަފުށި، ހދ. ކުރިނބީ އާއި ށ. ފުނަދޫއެވެ. ނަމަވެސް އަންގާރަ ދުވަހު މި ހުރިހާ ރަށެއްގެ މޮނިޓަރިންގެ ހާލަތު ވަނީ އުވާލާފައެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ މޮނިޓަރިންގެ ހާލަތު އުވާލީ ކޮވިޑް-19 އިން ރައްކާތެރިވުމުގެ ގޮތުން އާއްމު ސިއްހަތު ރައްކާތެރި ކުރުމުގެ ގާނޫނުގެ 12 ވަނަ މާއްދާގެ ދަށުން ބަލަން ކަނޑައެޅުނު ކަންކަން ބެލުމުން މޮނިޓަރިންގ ހާލަތު އިތުރަށް ދަމަހައްޓަންޖެހޭ ސަބަބެއް މި ވަގުތު ނެތުމުން ކަމަށެވެ.

މިކަމާ ގުޅިގެން ފުނަދޫ ކައުންސިލުން ބުނީ މޮނިޓަރިންގެ ހާލަތާ ގުޅިގެން އަޅާފައިވާ ފިޔަވަޅުތައް އުވާލި ނަމަވެސް ރައްކާތެރިވުމުގެ ގޮތުން އެޅުމަށް އެޗްޕީއޭއިން އަންގާފައިވާ އެންގުންތަކަށް ޚާއްސަ ސަމާލުކަމެއް ދިނުމަށް އެދޭ ކަމަށެވެ. އަދި ކޮންޓެކްޓް ޓްރޭސިން ހެދުމަށްފަހު އަލާމަތްތައް ފެންނަ ފަރާތްތަކުގެ ސާންޕަލްތައް ނެގުމުގެ މަސައްކަތް ކުރިއަށް ގެންދާތީ ސާންޕަލްތަކުގެ ނަތީޖާ ލިބެންދެން ކުޅިވަރުގެ ދަނޑުތައް ބަންދު ކުރެވިފައިވާ ކަމަށް ކައުންސިލުން ބުނެއެވެ.

މީގެ އިތުރުން ކުޅުދުއްފުށި ކައުންސިލުން ވެސް ވަނީ ކޮވިޑް-19 އިން ރައްކާތެރިވުމަށްޓަކައި އެޗްޕީއޭގެ ގައިޑްލައިންތަކާ އެއްގޮތަށް އަމަލު ކުރުމަށް އިލްތިމާސްކޮށްފައެވެ. ކޮވިޑަށް ޕޮޒިޓިވްވި ފުލުސް އޮފިސަރު ޕޮޒިޓިވްވިކަން އެނގިފައި ވަނީ އޭނާ ކުޅުދުއްފުށީގައި ހުއްޓައެވެ. ނަމަވެސް އެ ސަރަހައްދުގެ އިތުރު ރަށްތަކަކަށް އޭނާ ދަތުރުކޮށްފައި ވުމުން އެ ރަށްތައް މޮނިޓަރިންގެ ހާލަތައް ގެންދިޔައީ ހޯމަ ދުވަހުގެ ރެއެވެ.

މި ކޭސްއާ ގުޅިގެން ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވިދާޅުވީ މިކޭސް އަކީ އެހެން ކޭސް އަކާއި ގުޅުން ހުރި ކޭސްއެއް ކަމަށް އަދި ފާހަގަވެފައި ނުވާ ކަމަށާއި މި މީހާ އަކީ މާލެ ދަތުރުކޮށްފައިވާ މީހެއް ނޫން ކަމަށެވެ. އަދި އެހެން ރަށްތަކަށް އެ އޮފިސަރު ދަތުރުކޮށްފައި ވަނީ އެކި މަސައްކަތްތަކުގައި ކަމަށް ޑރ. ނަޒްލާ ފާހަގަކުރެއްވިއެވެ.