ލ. ކައްދޫއަށް ތަމްރީނަށް ދިޔަ ސިފައިންގެ ތެރެއިން އިތުރު 9 މީހަކު އާދީއްތަ ޕޮޒިޓިވްވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ މައުލޫމާތުތަކަށް ބަލާއިރު، ކައްދޫއަށް މާލެއިން ތަމްރީނަށް ދިޔަ ސިފައިންގެ ތެރެއިން ހޮނިހިރު ދުވަހު ޕޮޒިޓިވްވީ 26 މީހުންނެވެ. އަދި އާދީއްތަ ދުވަހުގެ އިރު އޮއްސި 6:00 އާ ހަމައަށް އިތުރު 9 މީހަކު ޕޮޒިޓިވްވެފައިވާ ކަމަށް އެޗްޕީއޭއިން ބުނެއެވެ.

އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާއިރު، ކައްދޫއަށް ދިޔަ 93 ސިފައިންގެ ތެރެއިން ހޯމް ކަރަންޓީންގެ މުއްދަތު ހަމަވުމުން ސާމްޕަލް ނެގި 26 މީހަކު ހޮނިހިރު ދުވަހު ޕޮޒިޓިވްވި އިރު އާދީއްތަ ދުވަހު ނަތީޖާ ލިބުނު ސާމްޕަލްތަކުގެ ތެރެއިން 9 ސާމްޕަލެއް ޕޮޒިޓިވްވެފައިވެއެވެ. މިއާއެކު ތަމްރީނަށް ދިޔަ 35 ސިފައިން މިހާތަނަށް ވަނީ ޕޮޒިޓިވްވެފައެވެ.

އެޗްޕީއޭގެ ތަފާސް ހިސާބުތައް ދައްކާގޮތުން އާދިއްތަ ދުވަހުގެ އިރުއޮއްސި 6:00 އާ ހަމައަށް އަތޮޅު ތެރެއިން 121 އެކްޓިވް ކޭސް ވަނީ ފާހަގަކުރެވިފައެވެ. މީގެތެރޭގައި ހިމެނެނީ 58 ދިވެހިންނާއި 63 ބިދޭސީންނެވެ. އެންމެ ގިނަ އެކްޓި ކޭސް ހިމެނެނީ ސ. ގަމުގައެވެ. އެއީ 53 މީހުންނެވެ.

މި 53 މީހުންނަކީ އައްޑު ސިޓީގައި ތަރައްގީކުރަމުން އަންނަ ފުލުހުންގެ ތަމްރީނު މަރުކަޒުގެ މަސައްކަތަށް ދިޔަ 128 ބިދޭސީންގެ ތެރެއިން ޕޮޒިޓިވްވި މީހުންނެވެ. މި އެންމެން ވެސް ތިބީ ހޯމް ކަރަންޓީންގައިކަމުން އައްޑު ސިޓީގެ އެއްވެސް ހިސާބަކަށް ބަލި ނުފެތުރޭނެ ކަމުގެ ޔަގީންކަން އައްޑު ސިޓީ ކައުންސިލުން ވަނީ ދީފައެވެ.

މިހާތަނަށް އެންމެ ގިނަ ކޭސް ފެނުނު ގދ. ހޯނޑެއްދޫއަށް ބަލާއިރު އެރަށުން ޕޮޒިޓިވްވި 46 މީހުންގެ ތެރެއިން އެކަކު ފިޔަވައި ހުރިހާ އެންމެން ވަނި ބަލިން ރަނގަޅުވެފައެވެ. އަދި އެރަށް ވަނީ މޮނިޓަރިންގެ ހާލަތުން ނަގާފައެވެ. ހޯނޑެއްދޫގެ އިތުރުން ހދ. ކުޅުދުއްފުށިން ވެސް ވަނީ ނިމިގެން ދިޔަ ހަފްތާ ތެރޭގައި މޮނިޓަރިންގެ ހާލަތުން ނަގާފައެވެ.

ކުޅުދުއްފުށި ސިޓީ މޮނިޓަރިންގެ ހާލަތުން ނަގާފައިވަނީ ކޮންޓެކްޓްރޭސިންގެ މަސައްކަތް ނިންމުމަށްފަހުއެވެ. އެރަށުގައި 7 އެކްޓިވް ކޭސް ހިމެނޭއިރު، އޭގެތެރޭގައި ހިމެނެނީ އަލާމާތްތައް ފެނިގެން ޓެސްޓްކުރި އިރު ޕޮޒިޓިވްވި 3 މީހަކާއި، ހޯމްކަރަންޓިންގައި ތިބި 3 މީހެއްގެ އިތުރުން ކޮންޓެކްޓްވި މީހެކެވެ.

އަތޮޅުތެރޭގެ 21 ރަށަކުން ކޮވިޑްގެ ކޭސްތައް ފެނިފައިވާއިރު، ދ. ކުޑަހުވަދޫގައި ހޯމް ކަރަންޓީންގައި ހުއްޓާ ޕޮޒިޓިވްވި މީހާ ބަލިން ރަނގަޅުވުމުން އެރަށް ވެސް ވަނީ މި ލިސްޓުން އުނިކޮށްފައެވެ. އަތޮޅު ކޮވިޑް ފެސިލިޓީތަކަށް ބަލާއިރު، ގއ. ވިލިނގިލިގައި ހުންނަ ކޮވިޑް ފެސިލިޓީގައި އަންނަނީ 6 މީހަކަށް ފަރުވާ ދެމުންނެވެ.