ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ފުލުހުންނަށް 3000 ސޭފްޓީ ގޮގްލްސް ހަދިޔާކޮށްފިއެވެ.
އާދިއްތަ ދުވަހު މި ސޭފްޓީ ގޮގްލްސް ހަވާލުކޮށްދެއްވީ އެ ކުންފުނީގެ މެނޭޖިންގ ޑިރެކްޓަރ ހެސެއިން އަމްރުއެވެ. ފުލުހުންގެ ފަރާތުން މިތަކެއްޗާ ޙަވާލުވެވަޑައިގަތީ ކޮމިޝަނަރ އޮފް ޕޮލިސް މުޙައްމަދު ހަމީދެވެ.
އެސްޓީއޯ އިން ބުނީ ސޭފްޓީ ގޮގްލްސް އަކީ ޕަރސަނަލް ޕްރޮޓެކްޓިވް އިކުއިޕްމަންޓް، ޕީ.ޕީ.އީއާއެކު ބޭނުން ކުރެވިދާނެ ގޮގްލްސްތަކެއް ކަމަށާއި މިތަކެއްޗާއެކު ފްރަންޓްލައިންގައި ހަރަކާތްތެރިވާ ފުލުހުންގެ ސަލާމަތާއި ރައްކާތެރިކަން އިތުރަށް ކަށަވަރު ކުރެވޭނެ ކަަމަށެވެ.
އެސްޓީއޯ އިން ފުލުހުންނަށް ސޭފްޓީ ގޮގްލްސް ހަދިޔާކޮށްފައިވާއިރު މީގެ އެއް މަސް ކުރިން އެ ކުންފުނިން ވަނީ ކޮވިޑް-19 އަށް ޓެސްޓު ކުރާ ޕީސީއާރް ޓެސްޓު މެޝިނެއް ވެސް ފުލުހުންގެ ލެބޯރަޓަރީ އަށް ހަދިޔާ ކޮށްފައެވެ. އެ މެޝިނަކީ ބަޔޯރަޑް ސީއެފްއެކްސް ނައިން ސިކްސް ބްރޭންޑުގެ ޕީސީއާރް މެޝިނެކެވެ.
ފުލުހުންގެ ލެބްގައި ދުވާލެއްގެ މައްޗަށް 140 އަށް ވުރެ ގިނަ ޓެސްޓު ހެދެއެވެ. މާލޭގެ އައިޖީއެމްއެޗް، އޭޑީކޭގެ އިތުރުން އަތޮޅު ތެރޭގެ ފަސް ސަރަހައްދެއްގައި ކޮވިޑް-19 އަށް ޓެސްޓު ކުރެވޭނެ އިންތިޒާމްތައް ވަނީ މިހާރު ހަމަޖައްސާފައެވެ.
