ގައުމީ ފެންވަރުގައި ދަނޑުވެރިންގެ ދުވަސް ފާހަގަކުރުމަކީ އެ ދާއިރާއަށް އިތުރު ޒުވާނުން ނިކުތުމަށް ލިބޭ ހިތްވަރެއް ކަމަށް ދަނޑުވެރިކަމާ ބެހޭ މިނިސްޓްރީން ބުނެފިއެވެ.

މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރގެ ޑިރެކްޓަރ އަލީ އަމީރު ވިދާޅުވީ ދަނޑުވެރިކަމުގެ ދުވަހާއި ގުޅިގެން ޚާއްސަ ޕްރޮގްރާމްތަކެއް ކުރިއަށް ގެންދަން ނިންމާފައިވާ ކަމަށެވެ.

އެގޮތުން 5 އޮކްޓޯބަރ އިން ފެށިގެން 13 އޮކްޓޯބަރ ހަމަޔަށް ރަސްމީ ބަންދު ނޫން ދުވަސްތަކުގެ ހެނދުނު 10:30ން ފެށިގެން 12:00ށް މައުލޫމާތު ދިނުމުގެ އޮންލައިން ސެޝަންތަކެއް ކުރިއަށް ގެންދާނެ ކަމަށެވެ. އަދި މި ޕްރޮގްރާމަކީ އާންމުކޮށް އެންމެންނަށް ވެސް ބަލާލެވޭނެހެން މިނިސްޓްރީގެ ފޭސްބުކް ޕޭޖްއިން ލައިވް ކުރަމުން ގެންދާ ސެޝަންތަކެއް ކަމަށް ވެސް އާމިރު ވިދާޅުވިއެވެ.

އާމިރު ވިދާޅުވީ މި ސެޝަންތައް ކުރިއަށްދާ ވަގުތު ފޭސްބުކް ޗެޓް މެދުވެރިކޮށް ސުވާލު ކުރުމުގެ ފުރުސަތު ވެސް ލިބޭނެ ކަމަށާއި، ސެޝަންތަކުގައި ވަގުތު އޮތް މިންވަރަކުން މީހާ ވެސް ގިނަ ސުވާލުތަކަށް ޖަވާބު ދެމުންދާނެ ކަމަށެވެ.

ފޭސްބުކް ޕޭޖް މެދުވެރިކޮށް ފަހުން ވެސް ރެކޯޑިން ބެލޭނެކަން ފާހަގަކުރައްވައި އާމިރު ވިދާޅުވީ ދަނޑުވެރިންނަށް އާންމުކޮށް ބޭނުންވާނެ މައުލޫމާތުތައް ހިމެނޭނެހެން ކޮންމެ ދުވަހަކު ވެސް ޚާއްސަ މައުޟޫއަކަށް މައުލޫމާތު ފޯރުކޮށްދޭނެ ކަމަށެވެ.

މީގެ އިތުރުން އާމިރު ވިދާޅުވީ ދަނޑުވެރިކަމުގެ ދުވަހާ ގުޅިގެން އަންނަ ހަފްތާ ތެރޭގައި ކުއިޒް ޕްރޮގްރާމެއް ވެސް ކުރިއަށް ގެންދާނެ ކަމަށެވެ. އަދި ކުއިޒް ޕްރޮގްރާމް މިމަހުގެ 12ން 15ށް ކުރިއަށްދާނެ ކަމަށާއި، އުންމީދު ކުރަނީ ގިނަ ބަޔަކު މި ޕްރޮގްރާމްގައި ބައިވެރިވާނެ ކަމަށެވެ.

އާމިރު ވިދާޅުވީ ޒަމާނުއްސުރެ ހައްދަމުން ގެންދާ ސިއްހަތަށް ފައިދާ ހުރި ގަސްގަހާގެހި އިންދާ އާލާކުރުމުގެ ޕްރޮގްރާމެއް ކުރިއަށް ގެންދާ ކަމަށާއި، މިޕްރޮގްރާމް ކުރިއަށް ގެންދިއުމަށް ނިންމާފައިވަނީ ހއ.މޮޅަދޫ، އުލިގަން އަދި ވަށަފަރުގައި ކަމަށެވެ.

އާމިރު ވިދާޅުވީ އަތޮޅުތެރޭގައި އެހެން ރަށްރަށުގައި ވެސް ދަނޑުވެރިކަމުގެ ޕްރޮގްރާމްތައް ކުރިއަށް ގެންދަން ނިންމާފައިވާ ކަމަށެވެ. ނަމަވެސް ކޮވިޑް-19ގެ ހާލަތާއި ގުޅިގެން ޕްރޮގްރާމް ކުރިއަށް ގެންދަން ނިންމާފައިވަނީ އެއްރަށުން އަނެއް ރަށަށް ދަތުރުނުކޮށް ރަށުގެ ކައުންސިލްތަކާ ގުޅިގެން އެރަށެއްގެ ފެންވަރުގައި ކަމަށް އޭނާ ވިދާޅުވިއެވެ.

ގައުމީ ފެންވަރުގައި ދަނޑުވެރިކަމުގެ ދުވަސް ފާހަގަކުރުމާ ބެހޭ ގޮތުން އާމިރު ވިދާޅުވީ ޚާއްސަ ޕްރޮގްރާމްތަކެއް ކުރިއަށް ގެންދިއުމަށް ނިންމީ ދާއިރާއަށް ނުކުންނަން ބޭނުންވާ މީހުންނަށްށާއި، ދަނޑުވެރިކަން ކުރާ ފަރާތްތަކަށް ހިތްވަރުދީ މަސައްކަތްތައް އިތުރަށް ފުޅާ ކުރުމަށް ކަމަށެވެ.

ދަނޑުވެރިކަމުގެ ދާއިރާ ކުރިއަރުވައި، ދަނޑުވެރިންނަށް ދިމާވާ މައްސަލަތައް ހައްލު ކުރުމަށް ގިނަ މަސައްކަތްތައް ކުރަމުންދާކަން ފާހަގަކުރައްވައި އާމިރު ވިދާޅުވީ ދަނޑުވެރިންނަށް ލޯނު ދޫކުރުމާއި، ބިން ހޯދައި ދިނުމަށް މިނިސްޓްރީން މަސައްކަތް ކުރަމުންދާ ކަމަށެވެ.

އާމިރު ވިދާޅުވީ ދަނޑުވެރިކަމުގެ ދާއިރާ އަށް މީހުން ހޭލުންތެރި ކުރުވުމަކީ މުހިންމު ކަމެއް ކަމަށެވެ. އެގޮތުން ހޭލުންތެރިކަމުގެ ޕްރޮގްރާމާއި، ޓިވެޓްއާ ގުޅިގެން ސެޓްފިކެޓް 3 ކޯހެއް ވެސް ކުރިއަށް ގެންދިއުމަށް ނިންމާފައިވާ ކަމަށް އާމިރު ވިދާޅުވިއެވެ.

މި ހިނގާ 2020 ވަނަ އަހަރުން ފެށިގެން ކޮންމެ މީލާދީ އަހަރެއްގެ އޮކްޓޯބަރ މަހުގެ 15 ވަނަ ދުވަހަކީ ދިވެހި ރާއްޖޭގެ ދަނޑުވެރިންގެ ދުވަހުގެ ގޮތުގައި ފާހަގަ ކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ ނިންމަވާފައެވެ.

މި އަހަރުގެ ދަނޑުވެރިންގެ ދުވަހު ބޭނުން ކުރުމަށް ކަނޑައަޅާފައިވާ ޝިޢާރަކީ "ފަރުދީ ދަނޑުވެރިކަން ކާނާގެ ޔަޤީންކަން“ މިއެވެ.