ހުޅުމާލޭގައި އުމުރުން 15 އަހަރުގެ ފިރިހެން ކުއްޖަކާ ގަދަކަމުން ބެހުނު ދެމީހެއްގެ މައްސަލަ ފުލުހުން ތަހުޤީޤު ކުރަން ފަށައިފިއެވެ.
ފުލުހުން ބުނީ ފިރިހެން ކުއްޖާއާ ގަދަކަމުން ބަދުއަހުލާގީ އަމަލު ހިންގި ކަމަށް ތުހުމަތު ކުރެވޭ މައްސަލައެއް ފުލުހުންނަށް ހުށަހަޅާފައިވަނީ އާދިއްތަ ދުވަހުގެ ހަވީރު 16:00 ޖެހިއިރު ކަމަށެވެ.
ފުލުހުންގެ ރައްކާތެރިކަމަށް އެދުނު ދެ މީހަކު ފުލުހުންގެ ވެހިކަލްގައި ޕޮލިސް ސްޓޭޝަނަށް ގެންގޮސްފައިވާ ކަމަށް ފުލުހުން ބުންޏެވެ.
މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައިނުވާއިރު މި މައްސަލަ ހުޅުމާލޭ ޕޮލިސް ސްޓޭޝަނުން އަންނަނީ އިތުރަށް ތަހުގީގު ކުރަމުންނެވެ.
ފުލުހުން މިފަދަ މައްސަލައެއް ތަހުޤީޤު ކުރަން ފަށާފައިވާއިރު އާދިއްތަ ދުވަހުގެ ހަވީރު ފިލްމީތަރި މުހައްމަދު ޔުނާން އާއި އޭނާގެ އަންހެނުން ރިހުލާ ފުލުހުންގެ ވެހިކަލަށް އަރުވައިގެން ގެންދާ ވީޑިއޯއެއް ވަނީ އާންމުވެފައެވެ. މިހާތަނަށް މި މައްސަލައިގައި ފުލުހުން އެއްވެސް މައުލޫމާތެއް ހާމަކޮށްފައެއް ނުވެއެވެ.
ރާއްޖެއެމްވީ އަށް މައުލޫމާތު ލިބިފައިވާ ގޮތުގައި، މި ދެމަފިރިން ހައްޔަރު ކުރުމަށް ގޮވާލާ އާދިއްތަ ދުވަހު ހަވީރު ހުޅުމާލޭގައި މުޒާހަރާ ކޮށްފައިވެއެވެ. މުޒާހަރާގެ ބައިވެރިން ޔުނާން ދިރިއުޅޭ ގޭ ދޮށުގައި އަޑުއުފުލާފައިވެއެވެ.
