އުއްމީދުކުރައްވަނީ 2022 ވަނަ އަހަރަކީ ފަތުރުވެރިކަމުގެ އަހަރަކަށް ވެގެންދިޔުމަށްކަމަށް، ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެ އެވެ.

އޮކްޓޯބަރު މަހުގެ 3 ވަނަ ދުވަހަކީ، ރާއްޖޭގެ ފަތުރުވެރިކަމުގެ ސިނާޔަތަށް 48 އަހަރު ފުރުނު ދުވަސް އެވެ.

ދުވަހާ ގުޅުވައި، ޑރ. މައުސޫމް ކުރެއްވި ޓުވީޓެއްގައި ވިދާޅުވީ ރާއްޖޭގެ ފަތުރުވެރިކަމަށް 48 އަަހަރު ފުރުމުގެ މުނާސަބަތުގެ ތަހުނިޔާ ފަތުރުވެރިކަމުގެ ސިނާޔަތުގައި ހަރަކާތްތެރިވާ އެންމެހައި ފަރާތްތަކަށް އަރިސްކުރާކަމަށެވެ. އަދި 2022 ވަނަ އަހަރު ރާއްޖޭގެ ފަތުރުވެރިކަމުގެ ރަން ޔޫބިލް ފާހަގަކުރާއިރު، އުއްމީދަކީީ އެ އަހަރަކީ ފަތުރުވެރިކަމުގެ އަހަރަކަށް ވެގެން ދިއުންކަމަށް ޑރ. މައުސޫމް ވިދާޅުވި އެވެ.

ދިވެހިރާއްޖޭގެ ފަތުރުވެރިކަމުގެ ސިނާއަތް ފަށައިގަތީ ކުރުނބާ މޯލްޑިވްސް އިން 1972 ވަނަ އަހަރު އެވެ. ރާއްޖޭގެ ފަތުރުވެރިކަމުގެެ ސިނާއަތް ފަށައިގަތްއިރު، އދ.ގެ ތަރައްޤީ އާއި ބެހޭ މިޝަނުން ރައްޖެއަށް ކުރި ދަތުރަށްފަހު ބުނެފައިއޮތީ ރާއްޖެ ފަތުރުވެރިކަމަށް އެންމެ ރަނގަޅު ނޫންކަމަށެވެ. ނަމަވެސް އެންމެ ރިސޯޓަކުން، ރާއްޖެ ފެށި ދަތުރުގައި ކޮންމެ އަހަރަކު އެތަކެއް ކާމިޔާބީތަކެއް ހޯދައި، މިއަދު ދިވެހިރާއްޖެއަކީ މުޅި ދުނިޔޭގެ ފެންވަރުގައި އެންމެ ނަން މަޝްހޫރު ފަތުރުވެރިކަމުގެ މަންޒިލް އެވެ.

ގެސްޓުހައުސް ވިޔަފާރިއާއެކު، މެދު ފަންތީގެ ފަތުރުވެރިންނަށްވެސް ރާއްޖޭގެ ދޮރުތައް ހުޅުވާލާފައިވާއިރު، ފަތުރުވެރިކަމަށް ރިސޯޓުގެ ގޮތުގައިވެސް 150 އަށްވުރެ ގިނަ ރިސޯޓް އަންނަނީ ހިންގަމުންނެވެ.

ސަރުކާރުން މިއަދު އަމާޒު ހިފާފައިވަނީ، ކޮވިޑް-19 ގެ ސަބަބުން ފަތުރުވެރިކަމުގެ ސިނާއަތް ވެއްޓިފައިވާ އަނދަވަޅުން ނަގައިގަތުމަށެވެ. އެގޮތުން ސަރުކާރުން އުއްމީދުކުރަނީ ކުރިއަށް އޮތް 2021 ވަނަ އަހަރު ނިމޭ ހިސާބަށް، ރާއްޖޭގެ ފަތުރުވެރިކަން ކުރިން އޮތް ކާމިޔާބު ހާލަތަށް ގެންދެވޭނެ ކަމަށެވެ.