އައްޑޫ ސިޓީ މަރަދޫގައި ގޭދޮށު މަސް ޕްލާންޓް ޤާއިމްކުރުމަށާއި ޓޫރިޒަމް ޒޯން ލޭންޑްސްކޭޕް ކުރުމަށް ބިން ދޫކޮށްފިއެވެ.
ގޭދޮށު މަސް ޕްލާންޓް ޤާއިމްކުރުމަށް 31،167 އަކަފޫޓަށްވުރެ ބޮޑު ބިމެއް ޓްރައިޑެންޓް ޕްރައިވެޓް ލިމިޓެޑާ ހަވާލުކޮށްފައިވާއިރު 0.33 ހެކްޓަރުގެ ބިމެއް އައިރިން އެންޓަޕްރައިޒަސް ޕްރައިވެޓް ލިމިޓެޑަށް ވަނީ ދޫކޮށްފައެވެ.
ބިން ހަވާލު ކުރުމުގެ ދެ އެއްބަސްވުމުގައި ކައުންސިލްގެ ފަރާތުން ސޮއިކުރެއްވީ ޑެޕިއުޓީ މޭޔަރ، މުޙައްމަދު ޔަސްރިފް އެވެ.
އަދި ޓްރައިޑެންޓް ޕްރައިވެޓް ލިމިޓެޑްގެ ފަރާތުން އެއްބަސްވުމުގައި ސޮއިކުރެއްވީ އިބްރާހިމް ޝެހްނީޒް އެވެ. މީގެ އިތުރުން އަރިއިން އެންޓަޕްރައިޒަސްގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ އޮޕަރޭޝަންސް މެނޭޖަރ، ހަސަން ނަސީރު އެވެ.
އެ އެއްބަސްވުމުގެ ދަށުން މަރަދޫގައި ޤާއިމުކުރެވޭ މަސް ޕްލާންޓުގެ ފުރަތަމަ ފިޔަވަހީގެ މަސައްކަތް ނުވަ މަސް ދުވަހުގެ ތެރޭގައި ނިންމަން ޖެހެއެވެ. އިންޑިއާ ހިލޭ އެހީގެ ދަށުން އެ މަޝްރޫޢަށް 6 މިލިއަން ރުފިޔާ ޚަރަދު ކުރުމަށް ހަމަޖެހިފައިވާއިރު، އަދި ޓްރައިޑެންޓް ޕްރައިވެޓް ލިމިޓެޑުން ވެސް ވަނީ މި މަޝްރޫއަށް އިންވެސްޓް ކުރުމަށް ނިންމާފައެވެ.
ރާއްޖެއެމްވީ އާއި ވާހަކަ ދައްކަވަމުން މި މަސްޕްލާންޓްތައް ޤާއިމްކުރަނީ އައިސް އުފައްދައި މަސް ފިނިކޮށް ބެހެއްޓޭނެ ވަސީލަތްތައް ހިމެނޭ ގޮތަށް ކަމަށް މަރަދޫ ކައުންސިލަރ ފައިސަލް އިބްރާހިމް ވިދާޅުވިއެވެ.
ފައިސަލް ވިދާޅުވީ އައްޑޫ އަކީ މަސްވެރި އަތޮަޅަކަށްވެފައި އަދި ވަކިން ހާއްސަކޮށް މަރަދޫ އަކީ މަސްވެރިން ގިނަ ރަށެއް ކަމުން މިފަދަ މަޝްރޫއުއެއް މަރަދޫގައި ޤާއިމްވެގެން ދިއުމަކީ މަސްވެރިންނަށް ލިބިގެންދާނެ ވަރަށް ބޮޑު ކުރިއެރުމެކެވެ. އަދި މިއީ މިސަރަހައްދުގެ މަސްވެރިން ކުރަމުން އައި ވަރަށް ދިގު އިންތިޒާރެއްގެ ނިމުން ކަމަށް ވެސް ފައިސަލް ވިދާޅުވިއެވެ.
މި މަސް ޕްލާންޓުން މަސް ކިރުމުގެ އިތުރުން ސާފުކުރުމާއި ފިނިކުރުމާއި ގަނޑުކުރުމާއި ވެކިއުމް ޕެކް ކުރުމުގެ އިތުރުން ވެސް ގިނަ ޙިދުމަތްތަކެއް ފޯރުކޮށްދޭނެއެވެ.
މީގެ އިތުރުން ޓުއަރިޒަމް ޒޯންތައް އައްޑޫ ސިޓީގައި ޤާއިމްކުރުމަށް ފަސް ސަރަޙައްދެއް ކަނޑައަޅައިވާއިރު، މަރަދޫ ޓޫރިޒަމް ޒޯންގެ ލޭންޑްސްކޭޕިންގެ މަސައްކަތް 70 ދުވަހުގެ ތެރޭގައި ނިންމަން ވަނީ އެއްބަސްވެފައެވެ.
