ކޮވިޑް-19 އާއި ގުޅިގެން ދެ އެއަރޕޯޓެއްގެ އެސެސްމަންޓެއް ހެދުމުގެ ނަމުގައި ބޮޑު ހޭދައެއް ކޮށްފައިވާކަމަށް އޮޑިޓު ރިޕޯޓުން ބުނެފިއެވެ.

ކޮވިޑާއި ގުޅިގެން ޓޫރިޒަމް މިނިސްޓްރީން ކުރި ހަރަދުތަކާއި ގުޅިގެން އޮޑިޓަރ ޖެނަރަލްގެ އޮފީހުން ތައްޔާރުކުރި އެ އޮޑިޓް ރިޕޯޓުގައި ބުނެފައިވަނީ ތަރމަލް އިމޭޖިންގ ކެމެރާތައް ބެހެއްޓުމާ ގުޅޭ ގޮތުން މިނިސްޓްރީން ސޮއިކޮށްފައިވާ ލިއުމުގައި ވާގޮތުން، މި މަސައްކަތް ޙަވާލުކުރި އެސް.އެސް.އައި.ގެ މަސްއޫލިއްޔަތުގެ ތެރޭގައި ރާއްޖޭގެ ދެ އެއަރޕޯޓެއްގައި ރައްކާތެރި، ސަމަކާރަގޮތެއްގައި، ފަސިންޖަރުން ސްކްރީންކުރެވޭނެ ނިޒާމެއް ގާއިމުކުރުމާގުޅޭ ލަފާދިނުން ހިމެނެއެވެ. އެގޮތުން މިކަމަށް އެ ކުންފުނީގެ ދެ މީހަކު މިނިސްޓްރީގެ ޚަރަދުގައި ރާއްޖެ ގެނެސް، ކޮންސަލްޓަންސީ ފީގެ ގޮތުގައި 771,000 (ހަތް ސަތޭކަ ހަތްދިހަ އެއް ހާސް) ރުފިޔާ އެ ކުންފުންޏަށް ދައްކާފައިވާއިރު، މި ޚަރަދާގުޅޭ ވިތްހޯލްޑިންގ ޓެކުހަށް 85,666 (އަށްޑިހަ ފަސް ހާސް ހަސަތޭކަ ފަސްދޮޅަސް ހައެއް) ރުފިޔާ ޚަރަދުކޮށްފައިވާކަމަށް އެ ރިޕޯޓުގައިވަނީ ބުނެފައެވެ.

އޮޑިޓު ރިޕޯޓުގައި ބުނީ އެ ކުންފުނިން ހެދިކަމަށް ބުނާ އެސެސްމަންޓަށް މިވަރުގެ ބޮޑު ހޭދައެއް ކޮށްފައި ވީނަމަވެސް، މި މަސައްކަތުގެ ދަށުން ކުރެވުނު ކަންކަމުގެ ތަފްޞީލް އަދި މަސައްކަތުގެ ނަތީޖާއަކީ ކޮބައިކަން އެއްވެސް ލިޔެކިޔުމަކުން އެނގޭކަށް ނެތް ކަމަށެވެ. އެހެންކަމުން، އެ ކުންފުނިން ހަގީގަތުގައި ކުރީ ކޮން މަސައްކަތެއް ކަމެއް ކަށަވަރުކުރެވެން ނެތުމުން މި މަސައްކަތަކީ ކޮންމެހެން ކުރަންޖެހިގެން ކޮށްފައިވާ ކަމެއްކަން ކަށަވަރު ކުރެވެން ނެތްކަމަށެވެ.

އެސް.އެސް.އައި އަކީ މިކަމުގައި މެދުވެރިއެއްގެ ރޯލު އަދާކުރި ފަރާތް ކަމުގައިވާތީ، އެކުންފުންޏަށް ދައްކާފައިވާ ފައިސާއަކީ އޭޖެންސީ ކޮމިޝަންކަމަށް ގަބޫލުކުރެވޭ ކަމަށާއި އެހެންނަމަވެސް، އެސް.އެސް.އައި މެދުވެރިނުކޮށް، ސީދާ މިނިސްޓްރީން މީގެ ކެމެރާއެއް ގަނެފައިވުމުން، މި މަސައްކަތް ކުރުމަށް އެސް.އެސް.އައި މެދުވެރިކުރަންޖެހުނު އެއްވެސް ސަބަބެއް އޮތްކަމަކަށް އޮޑިޓު އޮފީހަށް ގަބޫލުނުކުރެވޭ ކަމަށް އެ އޮފީހުން ބުންޏެވެ.

މީގެ އިތުރުން، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) ގެ ބެލުމުގެދަށުގައިވާ ވެލާނާ އިންޓަރނޭޝަނަލް އެއަރޕޯޓުގައި ކެމެރާތައް ބެހެއްޓުމުގެ ކަންކަމުގައި އެކުންފުންޏާ މަޝްވަރާކުރެވި އެ ކުންފުނީގެ ލަފައެއް ހޯދިކަން އެއްވެސް ލިޔެކިޔުމަކުން އެނގެން ނެތް ކަމަށާއި މިފަދަ މަޝްރޫޢެއް ހިންގުމުގެ ތަޖުރިބާހުރި ދައުލަތުގެ އެހެން މުއައްސަސާއަކާވެސް މަޝްވަރާކުރިކަން އެނގެން ނެތްކަން އޮޑިޓު އޮފީހުން ވަނީ ފާހަގަކޮށްފައެވެ.