އިންޑިއާ އާއި ޗައިނާ ބޯޑަރު ހިއްސާކުރާ ލަޑާކް ސަރަޙައްދާއި ގުޅިގެން ދެ ޤައުމުގެ ދެމެދުގައި އުފެދިފައިވާ ހަމަނުޖެހުން "އޮމާންކަމާއެކު" ޙައްލުކުރުމަށް ދެ ޤައުމުން އެއްބަސްވެއްޖެއެވެ.
ލަޑާކް ސަރަޙައްދުގެ ގަލްވާން ވާދީގައި ދެ ޤައުމުގެ އަސްކަރީ ސިފައިންވެސް ކޭމްޕް ކޮށްފައިވާއިރު، ދެ ޤައުމުންވެސް ބުނަމުންދަނީ އަނެއް ޤައުމުން އެމީހުންގެ ސަރަޙައްދީ އިމުގެ ތެރެއަށް ވަދެފައިވާ ކަމަށެވެ. އެގޮތުން މި މައްސަލަ ބޮޑުވެ، ދެ ޤައުމުގެ ދެމެދުގައި ފާއިތުވި މާޒީގައިވެސް ބައެއް ކޯޅުންތައް ހިނގާފަައިވެއެވެ.
އެކަންކަމަށް ޙައްލެއް ގެނައުމަށް މަޝްވަރާ ކުރުމަށް ހުކުރު ދުވަހު ބޭއްވި ވާރޓުއަލް ބައްދަލުވުމެއްގައި ދެ ޤައުމުންވެސް އަމަންއަމާން ކަމާއެކު، މި މައްސަލައަށް އެކަށީގެންވާ ޙައްލެއް ގެނައުމަށް ނިންމާފައިވާކަމަށް އިންޑިއާގެ މީޑިއާތަކުން ރިޕޯޓް ކޮށްފައިވެއެވެ. އެގޮތުން ފުރަތަމަ ކަމަކަށް އެ ސަރަޙައްދުގައި ކޭމްޕް ކޮށްފައިވާ އަސްކަރީ ސިފައިން އަނބުރާ ފޮނުވާލުމަށް ވަނީ އެއްބަސްވެވިފައެވެ.
ދެ ޤައުމުގެ އިސް އޮފިޝަލުން ބައިވެރިވެވަޑައިގެން ކުރިއަށް ގެންދިޔަ މި ވީޑިއޯ ކޮންފަރެންސްއަށް ފަހު ޗައިނާގެ ޚާރިޖީ ވުޒާރާގެ ތަރުޖަމާނުވެސް ވަނީ ދެ ޤައުމުންވެސް އެފަދަ އެއްބަސްވުމަކަށް އާދެވިފައިވާކަން ކަށަވަރު ކޮށްދެއްވާފައެވެ. މީޑިއާތަކަށް މައުލޫމާތު ދެއްވަމުން ޚާރިޖީ ވުޒާރާގެ ތަރުޖަމާނު ވިދާޅުވެފައިވަނީ، ސަރަޙައްދީ ބޯޑަރާއި ގުޅިގެން އުފެދިފައިވާ ހަމަނުޖެހުންތައް މިހާރު ކޮންޓްރޯލް ކުރެވިފައިވާ ކަމަށާއި، އެ ކޯޅުންގަނޑު މިހާރު ޢާންމު ޙާލަތަށް ގެނެވިފައިވާ ކަމަށެވެ.
އޭގެ އިތުރުން، މިހާރު ދުނިޔެއަށް ކުރިމަތިވެފައިވާ ބަލިމަޑުކަމުގެ ވަގުތުގައި ދެ ޤައުމުން ކޯޅުމުގެ ބަދަލުގައި، ދެ ޤައުމުންވެސް އެއްބަސްވެވޭ އަވަސް ޙައްލަކަށް އާދެވުމަކީ މިދަނޑިވަޅަށް އެންމެ ބުއްދިވެރި ގޮތް ކަމަށް ދެ ޤައުމުންވެސް އެއްބަސްވެފައިވެއެވެ.
