ޖޯޖް ފްލޮއިޑް "މަރާލި" ފުލުސް މީހާ ހައްޔަރުކޮށް އޭނާގެ މައްޗަށް ދައުވާ ކުރުމަށް މިނިއެޕްލިސްގެ މޭޔަރ ޖޭކަބް ފްރޭ ގޮވާލައްވައިފިއެވެ.
ފްލޮއިޑްގެ ހައްޔަރުގެ ވީޑިއޯ ސޯޝަލް މީޑިއާގައި ދައުރުވެފައިވާއިރު، އެތަނަށް ދިޔަ ފުލުހުން ބުނެފައި ވަނީ އޭނާ ހައްޔަރު ކުރުމާ ދެކޮޅު ހެދި ކަމަށާއި، އޭގެ ސަބަބުން ދިމާވި ހަމަނުޖެހުމުގައި ސިއްހީ މައްސަލައެއް ކުރިމަތިވެ، އޭނާ މަރުވީ ހޮސްޕިޓަލަށް ގޮސް ފަރުވާދޭން ފެށިފަހުން ކަމަށެވެ.
ނަމަވެސް، ޢާންމުވެފައިވާ ވީޑިއޯތަކުން ފެންނަ މަންޒަރުތަކުން ފްލޮއިޑް ބިންމައްޗަށް ބަންޑުން ވައްޓާފައިލާފައި އޮތް އިރު، ފުލުހަކު އޭނާގެ ކަރަށް ކަކުލުން އަރައިގެން ފިއްތައިގެން ހުރެއެވެ. އަދި ފްލޮއިޑް ނޭވާ ނުލެވޭކަމަށް ބުނެ އާދޭސް ކުރާ އަޑުވެސް އިވެއެވެ.
ފްލޮއިޑް ހައްޔަރު ކުރުމުގައި ހިމެނޭ ހަތަރު އޮފިސަރުންގެ ވަނަވަރު ސިޓީ އޮފް މިނިއެޕްލިސްއިން ހާމަކޮށްފައިވީ ނަމަވެސް، އޭނާގެ މަރާ ގުޅިގެން އެއްވެސް މީހެއް ހައްޔަރުކޮށްފައެއް ނުވެއެވެ.
ބުދަ ދުވަހު ކުރިއަށް ދިޔަ ނޫސްވެރިންގެ ބައްދަލުވުމެއްގައި، މޭޔަރ ޖޭކަބް ފްރޭ ވަނީ ފްލޮއިޑް "މަރާލި" މީހާ ހައްޔަރު ނުކޮށް ހުރި ސަބަބާ މެދު ސުވާލު އުފައްދަވާފައެވެ. އަދި ވިދާޅުވީ، މި ކަންތައް ކުރީ ފުލުސް މީހެއް ނޫންނަމަ "މިހާރު ހުންނާނީ ޖަލުގައި" ކަމަށެވެ. އެހެންކަމުން މި ފުލުހުން ހައްޔަރުނުކޮށް ހުރި ސަބަބުން ބުނެދޭން އެނގިވަޑައި ނުގަންނަވާކަމަށް ވިދާޅުވި އެވެ.
ވީޑިއޯއިން ފެންނަ މަންޒަރުތަކުން ފުލުސް މީހާ އެފަދައިން އަމަލު ކުރަން ޖެހޭ އެއްވެސް ސަބަބެއް ނެތްކަން ވެސް މޭޔަރު ފާހަގަ ކުރެއްވިއެވެ. ފްލޮއިޑް އަތުގައި ހަތިޔާރެއް ނެތްކަމަށާއި، އޭނާގެ ފަރާތުން އެއްވެސް "ތްރެޓެއް" ފެނިފައި ނުވާކަމަށް ވެސް ވިދާޅުވިއެވެ.
މީގެ އިތުރުން، ފްލޮއިޑްގެ ކަރަށް ކަކުލުން އަރައިގެން "ދޮން ފުލުހަކު" ފަސް މިނިޓް ހުރިއިރު އޭނާ ނޭވާ ނުލެވިގެން އާދޭސް ކުރަމުން ދިޔަކަން ފާހަގަ ކުރައްވަމުން ފްރޭ ވިދާޅުވީ، އެ ފުލުސް މީހާ ބޭނުން ކުރި ޓެކްނިކަކީ މިނިއެޕްލިސް ޕޮލިސް ޑިޕާޓްމަންޓުން ހުއްދަކޮށްފައިވާ ކަމެއް ނޫން ކަމަށެވެ. އަދި މި ފުލުހުން ބޮޑީ ކެމެރާ އަޅައިގެން ހުރިކަން ހާމަކޮށްފައިވާއިރު، ތަހުގީގަށް އަސަރު ނުކުރާގޮތަށް މި ފުޓޭޖް އާންމު ކުރުމަށް ފްރޭ ގޮވާލެއްވިއެވެ. ފްލޮއިޑްގެ ކަރަށް އަރައިގެން ހުރި ފުލުސް މީހާގެ މައްޗަށް ދައުވާ ކުރުމަށް ވެސް ގޮވާލެއްވިއެވެ.
މީގެ އިތުރުން، ތަހުގީގުން ކޮންމެ ނަތީޖާއެއް ނިކުތް ނަމަވެސް ފްލޮއިޑްގެ މަރަކީ ބޭއިންސާފެއްކަން ކަށަވަރުކަމަށާއި އެއީ އޭނާގެ ނަސްލުގެ ސަބަބުން ހިނގާފައިވާ ކަމެއްކަން ސާފުކަމަށްވެސް ފްރޭ ވިދާޅިވެފައިވެއެވެ.
"މި ދައްކަނީ ކުޑަ ސިކުންތެއް ތެރޭގައި ނިންމަން ޖެހު ކެމެއްގެ ވާހަކައެއް ނޫން. އެ ފަސް މިނިޓްގައި 300 އެއްހާ ސިކުންތު ލިބުނު މި ފުލުހުންނަށް، ކަރުން ފައި ނަގަން، އެގޮތަށް ކަންތައް ނުކުރުމަށް ގޮވަމުން ދިޔަ މީހުންގެ އަޑު އަހަން. އެ ހުރިހާ ވަގުތެއްގައި ފްލޮއިޑް ނޭވާ ނުލެވިގެން އާދޭސް ކުރަމުން ދިޔަ"މޭޔަރ ޖޭކަބް ފްރޭ
ފްލޮއިޑް ހައްޔަރުކޮށްފައިވަނީ "ފޯޖަރީ" އަށެވެ. އޭނާ ހައްޔާރާ ދެކޮޅު ހެދިކަމަށް ބުނެ ފުލުހުންގެ އަމަލުތަކުން އޭނާ މަރުވެފައިވާއިރު، ފުލުސް މީހާ ފްލޮއިޑްގެ ކަރުން ކަކޫ ނަގަނީ އެމްބިއުލަންސް އައުމަށް ފަހުއެވެ.
މިކަމާ ގުޅިގެން ގިނަ ބައެއް ސޯޝަލް މީޑިއާގައި އަޑު އުފުލާ "އައި ކާންޓް ބްރީދް" ހޭޝްޓެގް ޓްރެންޑްވަމުން ދާއިރު، މިނިއެޕްލިސް ސިޓީގައި މުޒާހަރާތައް ވެސް ދަނީ ކުރަމުންނެވެ.
