ކޮވިޑް-19 ގެ ޙާލަތާއި ގުޅިގެން އެމެރިކާއިން އިރާނަށް އެހީތެރިވާން ބޭނުންވާނަމަ، ހަމަ އެކަނި އޮތް ގޮތަކީ އިރާނާއި ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް ނައްތާލުން ކަމަށް އިރާނުގެ ރައީސް ޙަސަން ރޫޙާނީ ވިދާޅުވެއްޖެއެވެ.

ޖަޕާނުގެ ބޮޑި ވަޒީރު ޝިންޒޯ އަބޭއާއެކު ފޯނުން ކުރެއްވި މަޝްވަރާއެއްގައި ރޫޙާނީ ވިދާޅުވީ، އެމެރިކާއިން އިރާނާއި ދެކޮޅަށް އަޅާފައިވަނީ ޤާނޫނާއި ޚިލާފު ދަތިކުރުމުގެ ފިޔަވަޅުތަކެއް ކަމަށާއި،އެ ފިޔަވަޅުތަކުގެ ސަބަބުން އިރާނަށް ދަތި އުނދަގުލާއި ކުރިމަތިވެފައިވާކަމަށެވެ. ވަކިން ޚާއްޞަކޮށް ޞިއްޙީ އާލާތްތަކާއި ކާބޯތަކެތި ގަތުމަށް ކުރަން ޖެހޭ މުޢާމަލާތްތަކައް އެމެރިކާގެ ދަތިކުރުމުގެ ފިޔަވަޅުތަކާ ހެދި ބުރޫ އަރާފައިވާކަމަށެވެ. އެހެންކަމުން މިދަނޑިވަޅުގައި އެމެރިކާއިން އިރާނަށް ހެޔޮ އެދޭނަމަ، ނުވަތަ އެހީވާން ބޭނުންވާނަމަ އެޤައުމާއި ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުންކަމަށް ރޫޙާނީ ވިދާޅުވިއެވެ.

އިރާނުގެ ރައީސް ޙަސަން ރޫޙާނީ ވިދާޅުވީ ޖެނުއަރީ މަހުން ފެށިގެން އެޤައުމުން ކޮވިޑް-19 ޓެސްޓް ކިޓް އެތެރެކުރަމުން އައި ކަމަށެވެ. އެހެންނަމަވެސް އެމެރިކާގެ ދަތިކުރުމުގެ ފިަޔަވަޅުތަކާހުރެ، އެޕްރީލްމަހުގެ އެއްވަނަ ދުވަހުން ފެށިގެން މާސްކް އެތެރެކުރުމަށާއި ކޮވިޑް-19 އާއި ދެކޮޅަށް އިރާނުންކުރަމުން އަންނަ އެހެނިހެން މަސައްކަތްތަކައް ހުރަސްއެޅިފައިވާކަމަށެވެ.

އެމެރިކާއިން ބުނެފައިވަނީ އިރާނަކީ ހަނގުރާމަވެރި ގްރޫޕުތަކަށް މަދަދުދޭ ޤައުމެއްކަަމަށާއި، އިންޓަރނޭޝަނަލް މަނިޓަރީ ފަންޑުން 5 ބިލިއަން ޑޮލަރުގެ ލޯނެއް ހޯދަން އިރާނުން އެދުމުން އެކަމާއި ދެކޮޅު ހެދީވެސް އެފައިސާ އިރާނުގެ ރައްޔިތުންގެ ކަންތައްތަކައް ހޭދަ ކުރުމުގެ ބަދަލުގައި، ޞަރަޙައްދުގައި ހިންގާ ނިރުބަވެރި ޙަރަކާތްތަކައް ޚަރަދުކޮށްފާނެތީކަމަށެވެ. އަދި އިރާނުން ނިރުބަވެރި ޙަރަކާތްތަކައި އެފަދަ ޙަރަކާތްތައް ހިންގާ ހަރުކަށި ގްރޫޕުތަކަށް ވާގިވެރިވެދިނުމަކީ އިރާނުން ކަންބޮޑުވާކަމެއް ކަމަށް އެޤައުމުގެ ރައީސް ޑޮނާލްޑް ޓްރަމްޕް ވަނީ ވިދާޅުވެފައެވެ.

ކޮވިޑް-19 އިރާނުގައި ނުރައްކާތެރި މިންވަރަށް ފެތުރި، އެ ކޮންޓްރޯލް ކުރުމުގައި ގޮންޖެހުންތަކާއި ކުރިމަތިވެ، ޞިއްޙީ އާލާތްތަކައް ޖެހެން ފެށުމުން އެމެރިކާއިން ތަކުރާރުކޮށް އިރާނަށް އެހީވުމަށް ހުށަހެޅިއެވެ. މިއިން ކޮންމެ ފަހަރަކު އިރާނުންވަނީ އިންކާރުކޮށްފައެވެ.

މެދުއިއިރުމަތީ ޤައުމުތަކުގެ ތެރެއިން ވައިރަސްގެ ނުރައްކާ އެންމެބޮޑުވެފައިވަނީ އިރާނަށެވެ. މިހާތަނަށް އާއިރު، އެޤައުމުން 99,970 މީހުން ވައިރަސްއަށް ޕޮޒިޓިވްވެ، 6,340 މީހުންވަނީ މަރުވެފައެވެ. މިހާރުވެސް 13,155 މީހުންނަށް ފަރުވާދެމުންދާއިރު، 2,685 މީހެއްގެ ޙަލަތު ވަރަށް ސީރިއަސްކަމަށް ރިޕޯޓުތައް ބުނެއެވެ