ރަޝިޔާގައި ދުވާލެއްގެ މައްޗަށް ވައިރަސް ޖެހޭ މީހުންގެ އަދަދުތައް މައްޗަށް ދާން ފަށާފައިވާއިރު އާދިއްތަ ދުވަހު ވަނީ ރިކޯޑް އަދަދަކަށް މީހުންނަށް ވައިރަސް ޖެހިފައިކަމަށް ރަޝިޔާއިން ހާމަކޮށްފި އެވެ.
އާދިއްތަ ދުވަހު އެގައުމުގެ 10،633 މީހަކަށް ވައިރަސް ޖެހިފައިވާއިރު މިހާތަނަށް އައިއިރު މުޅި ޖުމްލަ 134،687 މީހުންނަށް ވަނީ ވައިރަސް ޖެހިފައެވެ. ނަމަވެސް އެގައުމުގައި ވައިރަސްޖެހިގެން މަރުވާ މީހުންގެ އަދަދު ނިސްބަތުން އެހެން ގައުމުތަކާ އަޅާބަލާއިރު މަދެވެ. އެގޮތުން މިހާތަނަށް އައިއިރު ރަޝިޔާގައި މަރުވެފައިވަނީ 1,280 މީހުންނެވެ.
ރަޝިޔާއިން ބުނާގޮތުގައި އެގައުމުގައި ވައިރަސް ޖެހިގެން މަރުވާ މީހުންގެ އަދަދު މަދުވަނީ އެގައުމުގައި ވައިރަސް ފެތުރެން ފަށާފައިވަނީ އެހެން ގައުމުތަކާއި އަޅާބަލާއިރު ލަހުންނެވެ. އެހެންކަމުން އެމީހުންނަށް މިކަމަށް ތައްޔާރުވުމަށް ވަގުތު ލިބުނު ކަމަށް ރަޝިޔާއިން ބުނެއެވެ.
މަރޗް މަސް ނިމެން ދަނިކޮށް ރަޝިޔާއިން ވަނީ ވައިރަސް ކޮންޓްރޯލް ކުރުމަށްޓަކައި އެއްކޮށް ލޮކްޑައުން ނުކޮށް އެހެންނަމަވެސް ބައެއް ފިޔަވަޅުތައް އަޅާފަ އެވެ. އެގޮތުން ރަޝިޔާގެ ވެރިރަށް މޮސްކޯގައި ދިރިއުޅޭ މީހުންނަށް އެމީހުންގެ ގެ ކައިރީގައި ހުންނަ ކާބޯތަކެތި ވިއްކާ ފިހާރަތަކަށާއި ބޭސް ފިހާރަތަކަށް ދެވޭނެ އެވެ. އަދި ކުނި އުކާލުމާއި އެމީހުން ގެންގުޅޭ ކުއްތާ ގޮވައިގެން ބޭރަށް ނިކުމެ ހިނގާލަން އުޅުމުގެ ފުރުސަތު ވަނީ ދީފައެވެ. އެހެންނަމަވެސް އެހެނިހެން ކަންކަން ކުރުމަށް ބޭރަށް ނިކުންނަނަމަ ޚާއްސަ ފާހެއް ބޭނުންވެ އެވެ.
ރަޝިޔާގެ ރައީސް ވްލަޑްމިރް ޕުޓިން ވަނީ މުޅި ގައުމު މެއި މަހުގެ 11 ވަނަ ދުވަހާ ހަމައަށް ލޮކްޑައުން ކޮށްފަ އެވެ. ނަމަވެސް އެއީ ލޭބަރ ޑޭ އާއި ދެވަނަ ބޮޑު ހަނގުރާމައިގައި ލިބުނު ކާމިޔާބީއާ ގުޅިގެން ލިބޭ ޗުއްޓީ ދުވަސްތަކަށްފަހު އެވެ.
ރަޝިޔާގައި ވައިރަސް އަށް ޕޮޒިޓިވްވާ މީހުންގެ ތެރޭގައި ސަރުކާރުގެ އިސް ސަފުގައި މަސައްކަތް ކުރަމުންދާ މީހުންވެސް ހިމެނެއެވެ. އެގޮތުން އެ ގައުމުގެ ބޮޑު ވަޒީރު މިހައިލް މިޝްއުސްތިން މިދިޔަ ހަފްތާގެ ބުރާސްފަތި ދުވަހު ވަނީ ކޮވިޑް-19 އަށް ޕޮޒިޓިވްވެފައިވާ ކަމަށް ވިދާޅުވެފަ އެވެ. އަދި ބަލިން ރަނގަޅު ވަންދެން މިވަގުތު ހުންނެވީ މަސްއޫލިއްޔަތުތަކުން ދުރަށް ޖެހިވަޑައިގެންނެވެ. މީގެއިތުރުން ކޮންސްޓްރަކްޝަން މިނިސްޓަރ ވެސް ވަނީ ވައިރަސް އަށް ޕޮޒިޓިވްވެފަ އެވެ. އެއާއެކު މިހާރު ހޮސްޕިޓަލުގައި އަންނަނީ ފަރުވާ ހޯއްދަވަމުންނެވެ.
