ބޮލީވުޑް އަދި ހޮލީވުޑްގެ ގިނަ ތަރިންނާއި، މަޝްހޫރު ލަވަކިއުންތެރިން ބައިވެރިވާ "އައި ފޯ އިންޑިއާ" ކޮންސެޓް އާދިއްތަ ދުވަހު ބޭއްވުމަށް ނިންމައިފިއެވެ.

ކޮވިޑް-19 ރިލީފް ފަންޑަށް އެހީތެރިވުމުގެ މަޤުޞަދުގައި ބޭއްވުމަށް ހަމަޖެހިފައިވާ މި ކޮންސެޓް އިންތިޒާމު ކޮށްފައިވަނީ ބޮލީވުޑްގެ މަޝްހޫރު ދެ ޕްރޮޑިއުސަރުން ކަމަށްވާ ކަރަން ޖޯހަރާއި، ޒޯޔާ އަޚްތަރެވެ.

އާދިއްތަ ދުވަހުގެ ރޭ އިންޑިއާ ގަޑިން 7:30 ފޭސްބުކް މެދުވެރިކޮށް ވަގުތުން މި ކޮންސެޓް ބެލޭނެ ކަމަށާއި، ހަދިޔާ ކުރާ ފައިސާ ދާނީ އިންޑިއާ ކޮވިޑް ރެސްޕޮންސް ފަންޑަށް ކަމަށް ކަރަން ވަނީ ބުނެފަައެވެ. މީގެ ދެހަފުތާ ކުރިން ޝޯވއަށް ތައްޔާރު ވާން ފަށާފައިވާ ކަމަށާއި ޝޯވގެ މަޤްޞަދަކީ ގޭގައި މިވަގުތު ފުރަބަންދުވެފައި ތިބި މީހުން މުނިފޫހި ފިލުވައި ދިނުމާއި، ކޮވިޑް -19 އާ ގުޅިގެން ޕްރޮންޓް ލައިންގައި މަސައްކަތް ކުރާ މީހުންގެ އަގުވަޒަން ކުރުމުގެ އިތުރުން، ގެދޮރު ނެތި ވަޒީފާ ގެއްލިފައިފައިވާ މީހުނަށް އެހީތެރިވުން ކަމަށް ފަންނާނުން ވަނީ ބުނެފައެވެ. އަދި ޝޯވ ފެށެން ކުޑަ ދުވަސްކޮޅަކަށް ވެފައި ވަނިކޮށް ބޮލީވުޑްގެ ދެ މަޝްހޫރު ފަންނާނުން މިދުނިޔެއާއި ވަކިވެފައިވާކަންވަނީ ފާހަގަ ކޮށްފައެވެ. ނަމަވެސް މި ޝޯވ ކުރިއަށް ދާންޖެހޭ ކަމަށް ވަނީ ބުނެފައެވެ.

ދެގަޑިއިރަށް ކުރިއަށް ގެންދާ މި ކޮންސެޓްގައި ބައިވެރިވާ ބޮލީވުޑްގެ ފަންނާނުންގެ ތެރޭގައި ޝާހުރުކް ޚާން، އަކްޝޭ ކުމާރު، ކަރީނާ ކަޕޫރު، އާލިއާ ބަޓް، ޓައިގާ ޝްރޯފް، އަބީޝޭކް ބަޗަން، ރިތިކް ރޯޝަން، އާމިރު ޚާން، ރަންވީރު ސިންގް، އައިޝްވާރިޔާ ރާއީ ބައްޗަން، އަޖޭ ދޭވްގަން، ކާތިކް އާރްޔަން، އަދިތުޔަ ރޯއީ ކަޕޫރު، ވިކީ ކައުޝަލް، އަނުޝްކާ ޝާރްމާގެ އިތުރުންވެސް އިންޑިއާގެ މަޝްހޫރު އެތައް ފަންނާނުން ހިމެނެއެވެ.

މި ޝޯވގައި ބައިބެރިވާ މަޝްހޫރު ފަންނާނުންގެ ތެރޭގައި "ދަ ޖޯނަސް ބްރަދާސް" ގައި ހިމެނޭ ނިކް، ޖޯ، ކެވިން ގެ އުތުރުން ނިކްގެ އަންހެނުން ޕްރިޔަންކާ ޗޯޕްރާ ޖޯނަސް އާއި، ޖޯގެ އަންހެނުން ސޯފީ ޓާރނަރ ވެސް ހިމެނެއެވެ. އަދި ހޮލީވުޑްގެ ތަރި ވިލް ސްމިތްއާއި، ކޭޓް ބޮސްވޯރތާއި، ބްރަޔަން އެޑަމްސް ވެސް ބައިވެރި ވެއެވެ.

ކޮވިޑް-19 ރިލީފް ފަންޑަށް އެހީތެރިވުމުގެ ގޮތުން މީގެ ކުރިން ވެސް ދުނިޔޭގެ 100 އަށް ވުރެ ގިނަ މަޝްހޫރު ފަންނާނުން ހިމެނޭ ގޮތަށް "ވަން ވޯރލްޑް: ޓުގެދަރ އެޓް ހޯމް" ގެ ނަމުގައި ވަނީ ކޮންސެޓެއް ބާއްވާފައެވެ.

ޑަބްލިއު އެޗް އޯ އާއި، ގްލޯބަލް ސިޓިޒަން އާއި ގުޅިގެން ލޭޑީ ގާގާ އިންތިޒާމު ކުރި މި ކޮންސެޓަށް 127 މިލިއަން ޑޮލަރު ވަނީ ލިބުނެވެ. މި ކޮންސެޓްގައި ބޮލީވުޑްގެ ދެތަރިން ކަމަށްވާ ޝާހުކުރުކް ޚާނާއި، ޕްރިޔަންކާ ޗޯޕްރާ ޖޯނަސް ވަނީ ބައިވެރިވިއެވެ.