ބްރޯޑްކޮމްގެ ރައީސާ މަރިޔަމް ވަހީދާ "ބުރަބި" ޖަލްސާ ހުށައަޅައިދެއްވުން ޓޫރިޒަމް މިނިސްޓަރ ޢަލީ ވަހީދު ދިފާޢުކުރައްވައިފިއެވެ.
ބުދަ ދުވަހު ޓޫރިޒަމް މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި، ޢަލީ ވަހީދު ވިދާޅުވީ މަރިޔަމް ވަހީދާ ހުށައަޅައިދެއްވީ ޕާޓީއެއްގެ ޖަލްސާއެއް ނޫންކަމަށާއި، އެހެންކަމުން އެއީ މައްސަލައެއް ކަމުގައި ނުދެކޭ ކަމަށެވެ. އޭގެ އިތުރުން ބްރޯޑްކޮމްގެ ކޯޑް އޮފް ކޮންޑަކްޓާ ޚިލާފުވެފައިވާ ކަމަށްވެސް ޤަބޫލު ނުކުރައްވާ ކަމަށް ވިދާޅުވިއެވެ.
އޭގެއިތުރުން، މިކަމާއިމެދު ބަޔަކު ނުރުހުން ފާޅުކޮށް ހިތްހަމަނުޖެހި ވާހަކަދެއްކުމާއި ގުޅިގެން އެކަމާއިމެދު ހިތާމަކުރައްވާ ކަމަށްވެސް އަލީ ވަހީދު ވިދާޅުވިއެވެ. އަދި މަރިޔަމް ވަހީދާއަކީ ދުވަހަކުވެސް އެއްވެސް ސިޔާސީ ޕާޓީއެއްގައި ޙަރަކާތްތެރިވެެފައިވާ ފަރާތެއް ނޫން ކަމަށާއި، އެހެންކަމުން އެއީ މައްސަލައެއް ކަމުގައި ނުދެކޭ ކަމަށް ވިދާޅުވިއެވެ.
މިނިސްޓަރ ޢަލީ ވަހީދު ވަނީ، ޕީޕީއެމްގެ ގޮނޑި ޖަހަން އުޅުނު ފަރާތަކާއި، މަރިޔަމް ވަހީދާއާ އެއްފަދަ ކުރުން އެއީ ދެރަވަރުކަމެއްކަމަށްވެސް ވިދާޅުވިއެވެ. ބެލެވޭގޮތުގައި ޢަލީ ވަހީދު އެ ނިޞްބަތްކުރެއްވީ، ކުރިން އެކޮމިޝަނުގެ މެންބަރުންނާ ވަކިކުރަން މަޖިލީހަށް ހުށައެޅި ސަބަބުތަކުގެ ތެރޭގައި މިމައްސަލަވެސް ހިމެނެއެވެ. ތިމަންނާ ޙަރަކާތްތެރިވީ އިސް ރަށްވެހިންގެ އިޖްތިމާޢީ ހަފުލާއެއްގައި ކަމަށް ވިދާޅުވެ ޒައިނާ ވަނީ އޭނާގެ ޢަމަލުތައް ދިފާޢުކުރައްވާފައެވެ.
ޓޫރިޒަމް މިނިސްޓްރީން ބޭއްވީ "ބުރަބި" ޖަލްސާ ހުށައަޅައިދެއްވުމާއި ގުޅިގެން ގިނަ ބަޔަކު ވަނީ އެކި މަންސަތަކުގައި އެކަމާއި ދެކޮޅަށް އަޑު އުފުލާފައެވެ. އަދި މިނިވަން މުއައްސަސާއެއްގެ ރައީސަކު ސަރުކާރުގެ އިވެންޓުތައް ހުށައަޅައިދެއްވުމުން، އެމުއައްސަސާއެއްގެ މިނިވަންކަމާމެދު ސުވާލު އުފެދޭ ކަމަށް އިދިކޮޅު ޕްރޮގްރެސިވް ކޮންގްރެސް ކޯލިޝަނުންވެސް ވަނީ ބުނެފައެވެ.
މިކަމާމެދު ސޯޝަލް މީޑިއާގައި އެކި ފަރާތްތަކުން އަޑު އުފުލަން ފެށުމާ ގުޅިގެން، ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ މުޤައްރިރު ރޮޒެއިނާ އާދަމް ވަނީ މަޖިލިސް ހުޅުވުމުން މި މައްސަލަ ބައްލަވާނެ ކަމަށް ވިދާޅުވެފައެވެ.
ދާދި ފަހުން ބްރޯޑްކޮމްގެ މެންބަރުކަމަށް ޢައްޔަނުކުރެވުނު މަރިޔަމް ވަހީދާއަކީ، ގިނަ ދުވަސްތަކެއް ވަންދެން މީޑިއާގައި، ޚާއްޞަކޮށް އެކި ޝޯވތަކާއި ޖަލްސާތައް ހުށައެޅުއްވުމުގައި, މަސައްކަތްކުރައްވާފައިވާ ތަޖުރިބާކާރެކެވެ. އެ ކޮމިޝަނަށް އެންމެ ގިނަ މެންބަރުންގެ ތާޢީދާކު ހޮވިވަޑައިގެންނެވީވެސް އެކަަމަނާއެވެ.
