އަލިފާނުގެ ހާދިސާގައި ގެއްލުން ލިބުނު ސިވިލް ސަރވިސް ކޮމިޝަން (ސީއެސްސީ) މުއައްޒަފުންނަށް މުސާރަ ލިބޭގޮތަށް އެއް މަހުގެ ޚާއްސަ ޗުއްޓީއެއް ލިބޭނެގޮތް ހަމަޖައްސައިފިއެވެ.
ސީއެސްސީއިން ނެރުނު ސަރކިއުލާގައި ބުނެފައިވަނީ އަލިފާނުގެ ހާދިސާއާއި ގުޅިގެން ވަޒީފާއަށް ނިކުތުމަށް އުޒުރުވެރިވެފައިވާ މުއައްޒަފުން އާންމު ހާލަތަށް ބަދަލުވުމަށްމަގުފަހި ކުރުވުމަށްޓަކައި އެ ކޮމިޝަނުން ޚާއްސަ 30 ދުވަހުގެ ޗުއްޓީއެއް އާދީއްތަ ދުވަހުން ފެށިގެން ދީފައިވާ ކަމަށެވެ.
ސީއެސްސީއިން ބުނީ އެ ތިރީސް ދުވަހަކީ ޚާއްސަ 30 ދުވަހުގެ ޗުއްޓީއެއް ކަމަށާއި އޭގެތެރޭގައި އަހަރީ ޗުއްޓީ ނުހިމެނޭނެ ކަމަށެވެ. އަދި އެކޮމިޝަނުގެ މުއައްޒަފުން މަސައްކަތްކުރާ އިދާރާއަށް ޗުއްޓީއަށް އެދި ހުށައެޅުމުން ހަމަޖެހިގެންދާނެކަމަށް ވަނީ ބުނެފައެވެ.
ހުކުރު ދުވަހުގެރޭ ހިނގައިދިޔަ އަލިފާނުގެ ހާދިސާގައި ހަތް ގެއަކާއި ހަތަރު ގުދަނެއް ވަނީ އަނދާ ހުލިވެފައެވެ. އެހާދިސާގައި އެކަކު ވަނީ ނިޔާވެފައެވެ.
