ތ.ބުރުނިން ގޯއްޗަށް އެދެނު ފަރާތްތަކަށް ޕޮއިންޓް ދެވުނު ގޮތުގެ ލިސްޓު އާއްމުކޮށް ޝަކުވާ ހުށަހަޅަން ފުރުސަތު ހުޅުވާލައިފިއެވެ.

ބުރުނި ކައުންސިލުން ބުނީ 2019 ވަނަ އަހަރު ބުރުނިން 51 ގޯތި ދޫކުރުމަށް ކުރި އިއުލާނާ ގުޅިގެން ފޯމް ހުށަހަޅާފައިވާ 74 ފަރާތައް ޕޮއިންޓް ދެވިފައިވާ ގޮތުގެ ލިސްޓް އާއްމުކޮށް އިއުލާން ކޮށްފައިވާ ކަމަށެވެ.

ކައުންސިލުން ބުނީ ޕޮއިންޓް ލިބިފައިވާގޮތާމެދު ޝަކުވާ ހުށަހެޅުމަށް ބޭނުންވާ ފަރާތްތަކުން 22 ސެޕްޓެންބަރު ވާ އާދީއްތަ ދުވަހުގެ އޮފީސް ބަންދުވުމުގެ ކުރިން ލިޔުމުން ކައުންސިލް އިދާރާއަށް ހުށަހެޅުމަށް އެދޭ ކަމަށެވެ.

ކައުންސިލުން ބުނީ ގޯތި ލިބޭ ފަރާތްތަކުގެ ދާއިމީ ލިސްޓް އިއުލާން ކުރެވޭނީ ހުށަހެޅޭ ޝަކުވާތަކާއި ގުޅިގެން ލިސްޓަށް ގެންނަންޖެހޭ އުނިއިތުރެއްވާނަމަ އެއުނިއިތުރެއް ގެނައުމަށްފަހު ކަމަށެވެ.

މީގެ އިތުރުން ކައުންސިލުން ބުނީ ގޯއްޗަށް އެދޭ މީހުންނަށް ޕޮއިންޓް ދިނުމުގެ އުސޫލްގެ ގޯތި ލިބޭ ގޮތް މިސުރުހީގެ 4 ވަނަ ޕޮއިންޓްގައިވާ ގޮތުގެ މަތިން ދެމަފިރިއަކަށް ދެގޯތި ނުލިބޭނެ އުސޫލުންކަމުގައިވީ ނަމަވެސް ލިސްޓްގައި ދެމަފިރިން ހުށަހަޅާފައިވާ ފޯމްތަކަށްވެސް މާކްސްދެވިފައިވާ ކަމަށެވެ. ނަމަވެސް ގޯތި ދޫކުރުމުގެ ކުރިން ގޯތި ލިބޭ ފަރާތް ކަނޑައަޅަންޖެހޭތީ ދެމަފިރިންގެ ތެރެއިން ގޯތި ބޭނުންވާ ފަރާތެއް އިހްތިޔާރުކޮށް ގޮތެއް ނިންމައި 22 ސެޕްޓެންބަރު ވާ އާދީއްތަ ދުވަހުގެ އޮފީސް ބަންދުވުމުގެ ކުރިން ލިޔުމުން ހުށަހެޅަންޖެހޭ ކަމަށް ކައުންސިލުން ބުންޏެވެ.

ކައުންސިލުން ބުނީ މިމުއްދަތުގެ ތެރޭގައި އެގޮތަށް ކަނޑަނޭޅިއްޖެނަމަ ދެމަފިރިންގެ ތެރެއިން ގޯތި ލިބޭ ފަރާތް ކަނޑައަޅާނީ ދެފަރާތުގެ މެދުގައި ގުރުއަތުލައިގެން ކަމަށެވެ.