ހިއުމަން ރައިޓްސް ކޮމިޝަން (އެޗްއާރްސީއެމް)ގެ މެމްބަރުންގެ ތެރޭގައި ކޮރަޕްޝަންގެ ތުހުމަތު ކުރެވޭ ފަރާތެއް މެމްބަރެއްގެ ގޮތުގައި އެބައިންނެވި ކަމަށް ހިންނަވަރު ދާއިރާގެ މެމްބަރު ޖީހާން މަހްމޫދު ވިދާޅުވެއްޖެއެވެ.
ހިއުމަންރައިޓްސްގެ ޤާނޫނަށް އިސްލާހު ގެނައުމުގެ ބިލަށް ބުދަ ދުވަހުގެ ޖަލްސާގައި ވާހަކަފުޅު ދައްކަވަމުން ޖީހާން ވިދާޅުވީ މޯލްޑިވްސް ޑިޒާސްޓަރ މެނޭޖްމަންޓް ސެންޓަރުގެ މުވައްޒިފެއްގެ ގޮތުގައި މަސައްކަތް ކުރެއްވިއިރު، 24 މިލިޔަން ރުފިޔާއަށް ހިޔާނާތްތެރިވެފައިވާ މީހަކު، ކޮމިޝަނުގެ މެމްބަރަކަށް އައްޔަން ކޮށްފައިވާ ކަމަށެވެ.
މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގެ މުޤައްރިރުކަން ކުރައްވަމުން އަންނަ ޖީހާން ވިދާޅުވީ، އޭނާ ކޮމިޝަނުގެ މެމްބަރުކަމަށް އައްޔަންކުރަން، އޭރުގެ މަޖިލީހުން ރުހުން ދީފައިވަނީ އޭނާގެ މައްސަލަ ޕީޖީ އޮފީހުގައި އޮއްވައި ކަމަށެވެ. އެއީ ކޮން މެމްބަރެއް ކަމެއް ޖީހާން ވިދާޅެއްނުވެއެވެ.
"މިދިޔަ ދައުރުގައި ކޮމިޝަނަށް މެމްބަރުން އައްޔަންކުރެވުނު އިރު ކޮރަޕްޝަންގެ ބޮޑު މައްސަލައެއް ތުހުމަތު ކުރެވިފައިވާ ފަރާތެއް ކޮމިޝަންގެ މެމްބަރެއްގެ ގޮތުގައި ، އެ މީހެއްގެ މައްސަލަ މި މަޖިލީހަށް އެ މީހެއްގެ ނަން ފޮނުވުނު އިރު ، ޕީޖީގައި 24 މިލިޔަން ދިވެހި ރުފިޔާގެ ކޮރަޕްޝަންގެ މައްސަލައެއްވާ ފަރާތެއް، ކޮމިޝަންގެ މެމްބަރެއްގެ ގޮތުގައި އައްޔަން ކުރެވިގެން މަސައްކަތް ކުރަމުން އެބަދޭ"ޖީހާން ވިދާޅުވިއެވެ.
ޖީހާން ވިދާޅުވީ މިފަދަ ކަންތައްތަކަކީ ބަލައިގަނެވޭނެ ކަންކަމެއް ނޫން ކަމަށެވެ. މިފަދަ ކަންކަމުން މިނިވަން މުއައްސަސާތައް ސަލާމަތް ކޮށްގެން މެނުވީ، ތައައްސުބުން އެއްކިބާވެ ނުފޫޒުން ސަލާމަތްވެ ތިބެ ބިރު ނުގަނެ ފަސްނުޖެހި މަސައްކަތް ކުރާ މިނިވަން މުއައްސަސާތަކެއް ނުފެންނާނެ ކަމަށެވެ.
ހިއުމަންރައިޓްސް ކޮމިޝަނުގެ ޤާނޫނަށް ގެންނަ މައިގަނޑު އިސްލާހަކީ އެ ކޮމިޝަންގެ މެމްބަރުންނާއި، މެމްބަރުންގެ އާއިލާގެ މެމްބަރުންގެ މާލީ ބަޔާން ހާމަކުރުން ލާޒިމް ކުރުމުގެ ގޮތުން ގެނެވޭ އިސްލާހެކެއެވެ. ކޮމިޝަނުގެ ޤާނޫނަށް މިފަދަ އިސްލާހެއް ގެންނަނީ ، ކޮމިޝަނުގެ މެމްބަރުންނަކީ ތައައްސުބުން އެއްކިބާވެ މިނިވަންކަމާ އެކުގައިކަން މަސައްކަތް ކުރަމުން އަންނަ ބައެއްކަން ކަށަވަރުކުރުމަށްޓަކައެވެ.
