ހަތަރު ވަނަ ސައުތު އޭޝިޔަން ސްޕީކާރސް ސަމިޓްގައި ބައިވެރިވެވަޑައިގަތުމަށް ސަރކް ފަސް ގައުމުގެ ޤާނޫނު ހަދާ މަޖިލީހުގެ ރައީސުން ރާއްޖެ ވަޑައިގަންނަވައިފިއެވެ.

ސަރކް ޤައުމުގެތަކުގެ ޤާނޫނު ހަދާ މަޖިލީހުގެ ރައީސުންނަށް ވެލާނާ އިންޓަރނޭޝަނަލް އެއަރޕޯޓުން މަރްހަބާ ދަންނަވާފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، މަޖިލީހުގެ ނައިބް ރައީސް އީވާ އަބްދުﷲ ގެ އިތުރުން ޤާނޫނުހަދާ މަޖިލީހުގެ ބައެއް މެމްބަރުންނެވެ. މީގެ ތެރޭގައި މަޖިލީހުގައި ހިމެނޭ އިދިކޮޅު ޕާޓީ ޕީޕީއެމް އަދި ފީއެންސީގެ މެމްބަރުން ހިމެނިވަޑައިގަންނަވައެވެ.

ސަމިޓްގައި ބައިވެރިވެވަޑައިގަތުމަށް މިހާރު ރާއްޖެ ވަޑައިގަންނަވާފައިވަނީ އަފްޣާނިސްތާން، އިންޑިޔާ، ބަންގްލަދޭޝް، ބޫޓާން އަދި ޕާކިސްތާންގެ ޤާނޫނު ހަދާ މަޖިލީހުގެ ރައީސުންނެވެ. ސްރީލަންކާގެ ޤާނޫނު ހަދާ މަޖިލީހުގެ ރައީސް ވަޑައިގަތުމަށް ހަމަޖެހިފައިވަނީ މިރޭގެ ވަގުތެއްގައެވެ.

"ސަސްޓެއިނަބަލް ޑިވެލޮޕްމަންޓް ގޯލްސް"ގެ ނަމުގައި ބާއްވާ މި ސަމިޓްގައި ސާރކް ހަތް ޤައުމުގެ ޤާނޫނު ހަދާ މަޖިލީހުގެ ރައީސުން ބައިވެރިވެ ވަޑައިގަންނަވައެވެ. ސަމިޓް އޮތީ ރައްޔިތުން މަޖިލިސް ކުރާ އިދާރާގައި ސެޕްޓެމްބަރުމަހުގެ 1 އިން 2 ވަނަ ދުވަހުގެ ނިޔަލަށެވެ. ސަމިޓްގައި މަޝްވަރާކުރެވިގެންދާނީ ދެމެހެއްޓެނިވި ތަރައްޤީ އާއި ގުޅޭ ގޮތުންނެވެ.

މިއީ ރާއްޖޭގައި މި ސަމިޓް ބާއްވާ ފުރަތަމަ ފަހަރެއެވެ.