މޯލްޑިވްސް މަނިޓަރީ އޮތޯރިޓީ (އެމްއެމްއޭގެ) ގެ ގަވަރުނަރުކަމަށް އައްޔަނުކުރަން ފެންނަ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު، ފޮނުއްވާފައިވާ ނަންފުޅު އިތުރަށް ދިރާސާ ކުރުމަށް ރައްޔިތުންގެ މަޖިލީހުގެ މާލިއްޔަތު ކޮމެޓީއަށް ފޮނުވައިފިއެވެ.
ގަވަރުނަރުގެ މަގާމަށް އައްޔަނުކުރުމަށް މަޖިލީހަށް ފޮނުއްވާފައިވާ ނަންފުޅަކީ އެމްޑީޕީ ސަރުކާރުގެ ފިނޭންސް މިނިސްޓަރ ކަން ކުރައްވާފައިވާ އަލީ ހާޝިމްގެ ނަންފުޅެވެ. ރައީސުލްޖުމްހޫރިއްޔާ އަލީ ހާޝިމްގެ ނަންފުޅު މަޖިލީހަށް ފޮނުއްވާފައިވަނީ މިހަފްތާގެ ބުދަ ދުވަހުއެވެ. އަލީ ހާޝިމް އަކީ 2008 ވަނަ އަހަރުން 2010 ވަނަ އަހަރަށް ރާއްޖޭގެ ފިނޭންސް މިނިސްޓަރުގެ މަގާމު އަަދާކުރައްވާފައިވާ ބޭފުޅެކެވެ.
އެމްއެމްއޭގެ ގަވަރުނަރު ކަމަށް ބޭފުޅަކު އައްޔަނުކުރަނީ އެމަގާމުގައި ކުރިން ހުންނެވި އަހުމަދު ނަސީރު މިދިޔަ ޖުލައި މަހު އެ މަގާމުން އިސްތިއުފާ ދެއްވުމާއި ގުޅިގެންނެވެ. އެމަގާމުން ނަސީރު އިސްތިއުފާ ދެއްވާފައިވަނީ އޭނާގެ މައްޗަށް ގިނަ ތުހުމަތުތަކެއް ކުރެވިފައި ވަނިކޮށެވެ. އެގޮތުން ކުރީގެ ރައީސް އަބްދުﷲ ޔާމީންއާ ގުޅުން ހުރި ޓްރާންސެކްޝަން ތަކެއް ފުލުހުންނަށް ހުށައަޅަން ހުރަސް އަޅަން މަސައްކަތް ކުރުން ހިމެނެއެވެ. ނަމަވެސް ނަސީރު ވަނީ އެ ތުހުމަތުތަކުން ބަރީއަވެ ވަޑައިގަންނަވާފައެވެ.
