ދިވެހިރާއްޖެއިން ޕީޕަލްސް ރިޕަބްލިކް އޮފް ޗައިނާއަށް ކަނޑައަޅާފައި ހުންނަވާ ސަފީރު އައިޝަތު އަޒީމާ، ސަފީރުކަމުގެ ފަތްކޮޅު ޗައިނާގެ ރައީސް ޝީ ޖިންޕިންގްއަށް އަރުވައިފިއެވެ.
ބެއިޖިންގްގެ ގްރޭޓް ހޯލް އޮފް ދަ ޕީޕަލްގައި މިކަމަށްޓަކައި އޮތް ރަސްމިއްޔާތުގައި ޗައިނާގެ ސްޓޭޓް ކައުންސެލަރ އަދި މިނިސްޓަރ އޮފް ފޮރިން އެފެއަރޒް ހިޒް އެކްސެލަންސީ ވެންގް ޔީ، ޗީފް އޮފް ޕްރޮޓޮކޯލް މރ. ހޮންގް ލެއި އަދި ޗީފް އޮފް އޭޝިއާ ޑިޕާޓްމަންޓް މރ. ވޫ ޖިއަންގާއޯ ބައިވެރިވެވަޑައިގަތެވެ.
ސަފީރު ކަމުގެ ފަތްކޮޅު އެރުވުމާއި ގުޅިގެން ފޮރިން މިނިސްޓަރު އަބްދުﷲ ޝާހިދުވަނީ އަޒީމާއަށް މަރުހަބާ ދަންނަވައިފައެވެ. މިނިސްޓަރު ޝާހިދު ވިދާޅުވީ އާޒިމާއަކީ މަސްއޫލިއްޔަތު އަދާކުރުމުގެ ގާބިލިއްޔަތުކަން ހުރި ބޭކަނބަލެއްކަމަށާއި، އެކަމަނާގެ ސަފީރުކަމުގެ ދަށުގައި ރާއްޖެއާ ޗައިނާގެ ގުޅުން އިތުރަށް ވަރުގަދަވެގެންދާނެ ކަމަށް އުންމީދު ކުރާ ކަމަށެވެ. އަދި ރާއްޖެއިން ޗައިނާ އަށް ކަނޑައެޅި ފުރަތަމަ އަންހެން ސަފީރުކަން މިނިސްޓަރު ޝާހިދު ފާހަގަކުރެއްވިއެވެ.
ސަފީރުކަމުގެ ފަތްކޮޅު އެރުވުމަށް ބޭއްވި ރަސްމިއްޔާތުގައި ބެއިޖިންގައި ހުންނަ ދިވެހިރާއްޖޭގެ އެމްބަސީގެ ސެކަންޑް ސެކްރެޓަރީ ފާތުމަތު ލިއުޝާ އާއި ތަރޑް ސެކްރެޓަރީ ހުސައިން އަބްދުއްލަތީފް މި ރަސްމިއްޔާތުގައި ބައިވެރިވެވަޑައިގަތެވެ.
