މިހާރު ރާއްޖޭގެ އެކި ކަންކޮޅުތަކަށް ކުރަމުންދާ ވިއްސާރައާ ގުޅިގެން އާންމު ސިއްހަތު ރައްކާތެރި ކުރުމަށް އިސްކަންދިނުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ގޮވާލައިފިއެވެ.
އެޗްޕީއޭއިން ކުރި ޓްވީޓެއްގައި ބުނީ، މިހާރު ރާއްޖެއަށް ކުރަމުންދާ ވިއްސާރައާއި ގުޅިގެން ސިއްހީ ގޮތުން ރައްކާތެރިކަމުގެ ފިޔަވަޅުއެޅުމަށް އެންމެހާ ފަރާތްތަކަށް އިލްތިމާސްކުރާ ކަމަށާއި، އެގޮތުން ވިއްސާރަވެ ފެންބޮޑުވުމާ ގުޅިގެން އާންމު ރައްޔިތުން ސަމާލުވާން ޖެހޭ ކަންކަން ހުރި ކަމަށެވެ.
އެގޮތުން އެޗްޕީއޭއިން ވަނީ ވާރޭވެހި ފެންބޮޑުވުމާ ގުޅިގެން ފެން ހިންދުމުގެ މަސައްކަތް ކުރާ ސަރަހައްދުތަކަށް ކުޑަކުދިން ގާތް ނުކުުރުމަށާއި، ނަރުދަމާއާއި ޖަންކްޝަން ނުވަތަ ސެޕްޓިކް ޓޭންކް ފުރިގެން ބޭރުވެފައިވާނަމަ ސާފު ކުރުމުގެ ކުރިން ޕަބްލިކް ހެލްތު ޔުނިޓުގެ އެހީތެރިކަން ހޯދުމަށް ހަނދާންކޮށްދީފައެވެ.
އޭގެ އިތުރުން، ފެން ހިންދުމުގައާއި، ފެން ހިންދުމަށްފަހު ސާފު ކުރުމުގައި ސިއްހީ ގޮތުން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމަށްވެސް އެޗްޕީއޭއިން އެދިފައިވެއެވެ.
ރާއްޖޭގެ އެކި ހިސާބުތަކައް ކުރަމުންދާ ވިއްސާރައާއި ގުޅިގެން، އާންމު ސިއްހަތު ރައްކާތެރި ކުރުމަށް އެޅިދާނެ ބައެއް ފިޔަވަޅުތައް @MoH_mv @ndmamv @raajjemv @Raajje_tv @psmnewsmv @Ch13official @sunbrk @vaavu @VTVvmedia pic.twitter.com/YBsoL3g3NN
— HPA Maldives (@HPA_MV) August 13, 2019
ފެން ހިންދުމާއި ސާފު ކުރުމުގެ އިތުރުން އެޗްޕީއޭއިން ވަނީ ކާބޯތަކެއްޗާއި ބޭސް ރައްކާތެރި ކުރުމާއި، އާންމު ސާފުތާހިރުކަން ދެމެހެއްޓުމަށްޓަަކައި ކުރެވިދާނެ ކަންކަމަށްވެސް ބަލާލާފައެވެ.
އެގޮތުން އެޗްޕީއޭއިން ބުނީ، ބުއިމަށާއި ކެއްކުމަށް ރައްކާތެރި ފެން ބޭނުން ކުރުމަށް އިސްކަންދިނުމާއި، ސާފު ފެނުން އަތް ދޮވުމަކީވެސް ވިއްސާރައާ ގުޅިގެން ދިމާވެދާނެ ސިއްހީ ނުރައްކާތަކުން އަރައިގަތުމަށް ކުރެވިދާނެ ކަންކަން ކަމަށެވެ.
