ކުރީގެ ސަރުކާރުން ނުރަނގަޅުކޮށް ކޮށްފައިވާ ކަންކަން އިސްލާހު ކުރުމުގެ މަސައްކަތް ކުރަންޖެހިފައިވާތީ މިނިސްޓްރީގެ މަސައްކަތްތައް ލަސްވެގެންދާ ކަމަށް ޓްރާންސްޕޯރޓް މިނިސްޓަރ އާއިޝަތު ނަހުލާ ވިދާޅުވެއްޖެއެވެ.
ބުދަ ދުވަހު މިނިސްޓަރ މަޖިލީހަށް ހާޒިރު ކުރައްވާފައިވާއިރު، ހެލްމެޓު އެޅުއްވުން ފިޔަވައި އިތުރު އާ ކަމެއް ކުރައްވަންތޯ ނައިފަރު ދާއިރާގެ މެމްބަރު އަހުމަދު ސިޔާމް ކުރެއްވި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ، އާ ކަންތައްތަކެއް ތައާރަފްކުރުމުގެ ކުރިން ފުރަތަމަ މަސައްކަތެއްގެ ގޮތުން ކުރީ ސަރުކާރުން ކޮށްފައިވާ ކަންކަން ރަނގަޅުކޮށް އިސްލާހު ކުރަންޖެހޭ ކަމަށެވެ.
އިއްޒަތްތެރި މެމްބަރުގެ ސުވާލުގެ ޖަވާބެއްގެ ގޮތުން އަޅުގަނޑު ވިދާޅުވެލަން އޮތީ އަޅުގަނޑުމެން ސަރުކާރަށް އައިސް މިއަދު މިތިބީކީ އަޅުގަނޑު ޤަބޫލުކުރާ ގޮތުގައި އާ ކަންތައްތަކެއް ކޮށް އާ ކަންތައްތަކެއް ދައްކާކަށް ނޫން، އަަޅުގަނޑުމެން ފުރަތަަމަ އެބަޖެހޭ ކޮށްފަހުރި ހާވާފަހުރި ހަޑިއެއް ސާފުކުރަންވެސް، މާފު ކުރައްވާ އިނގޭތޯ ފުރަތަމަ ތަނެއް ސާފުކޮށްގެން ތަނެއް ރަނގަޅުކޮށްގެން ކުރިއަށް ބައްޓަންކުރެވޭނީ، އެހެންވީމާ ރަނގަޅުކުރަން ހުރި އެއްޗެހި، މުޑުދާރުވެފަ ހުރި އެއްޗެހި ރަނގަޅު ކުރުމަށްޓަކައި ކުރަންޖެހޭ ކަންކަމުގައި އަޅުގަނޑު އުޅެން ހަދައިގެން ހަޤީޤަތުގައިވެސް ކުރިއަށްހުރި ކަންތައްތަކުގެ ޕްލޭން އަދި ކުރެވެނީ ހަޤީޤަތުގައިވެސް އެއްވެސް ކަމެއް ރަނގަޅަށް ކުރެވޭ ކަމަކަށް ނުވޭ، ކުރެވޭ ގޮތެއް ނުވޭ، ބަޖެޓަށް އެބަ ބަލަންޖެހޭ، ލާރި ހޯދަންޖެހޭ، ދެން ހުރި ކަންކަން ކުރަންޖެހޭ، "ޓްރާންސްޕޯރޓް މިނިސްޓަރ އާއިޝަތު ނަހުލާ
މިނިސްޓަރ އިތުރަށް ވިދާޅުވީ، ކުރިއަށް އޮތް ތަނުގައި ވަރަށް އާ ކަންތައްތަކެއް މިނިސްޓްރީން ކުރަން ނިންމާފައިވާ ކަމަށާއި، ރައްޔިތުންނަށް ޚިދުމަތް ދިނުމުގައި ދެމިތިއްބަވާނެ ކަމަށެވެ.
މިނިސްޓަރ އެހެން ވިދާޅުވެފައިވާއިރު، ކުރީގެ ސަރުކާރުން ކޮށްފައިވާ ކަންކަން ރަނގަޅުކޮށް އިސްލާހު ކުރުމުގެ މަސައްކަތް ކުރަންޖެހޭތީ މިސަރުކާރުގެ މުއައްސަސާތަކުގެ މަސައްކަތް ލަސްވެގެންދާ ކަމުގެ ޝަކުވާ ސަރުކާރުގެ ގިނަ މުއައްސަސާތަކުގެ ވެރިން ދަނީ ކުރައްވަމުންނެވެ. އެގޮތުން އަންގާރަ ދުވަހު ހެލްތު މިނިސްޓަރ އަބްދުﷲ އަމީން މަޖިލީހަށް ހާޒިރު ކުރުމުންވެސް އެކަން ވަނީ ފާހަގަކުރައްވާފައެވެ.
