މޯލްޑިވްސް އާޓިސްޓް ކޮމިއުނިޓީގެ ފަރާތުން ބާއްވާ މޯލްޑިވްސް ކޮންޓެމްޕަރަރީ އާޓް އެގްޒެބިޝަން "އަންވެއިލިންގ ވިޝަން 2019" އަށް ރައީސް އިބުރާހިމް މުހައްމަދު ސޯލިހު ބުދަ ދުވަހު ޒިޔާރަތްކުރައްވައިފި އެވެ.
ނެޝަނަލް އާރޓްގެލެރީގައި ކުރިޔަށްދާ އެ މައުރަޒު ބައްލަވާލެއްވުމަށް ރައީސް ސޯލިހު ހަވީރު ކުރެއްވި ޒިޔާރަތުގައި މައުރަޒުގައި ބަހައްޓާފައިވާ ކުރެހުންތައް ބައްލަވާލެއްވުމުގެ އިތުރުން ބައެއް ކުރެހުންތެރިންނާ ބައްދަލުކުރައްވައި ކުރެހުންތަކާބެހޭ ގޮތުން މައުލޫމާތު ހޯއްދަވާފައިވެ އެވެ.
ނެޝަނަލް އާޓްގެލަރީ ގައި މިމަހުގެ 3 ވަނަ ދުވަހުން ބުދަ ދުވަހުގެ ނިޔަލަށް ކުރިޔަށްދާ އެ މައުރަޒުގައި ރާއްޖޭގެ މަޝްހޫރު ބައެއް ކުރެހުންތެރިންނާ އަލަށް އެ ދާއިރާގައި ހަރަކާތްތެރިވާ ފަރާތްތަކާއެކު ޖުމްލަ 58 ކުރެހުންތެރިން ބައިވެރިވެ އެވެ.
ރާއްޖޭގެ ކުރެހުންތެރިންގެ ހުނަރު ދައްކާލުމަށް "އަންވެއިލިންގ ވިޝަން" ގެ ނަމުގައި ސިލްސިލާކޮށް ކުރިއަށް ގެންދާ އެ މައުރަޒު ބާއްވާތާ މިއީ ތިންވަނަ އަހަރެވެ.
މޯލްޑިވްސް އާޓިސްޓްސް ކޮމިއުނިޓީއިން އިންތިޒާމުކޮށްގެން ކުރިޔަށް ގެންދާ މި މައުރަޒު ބަލާލުމުގެ ފުރުސަތު ބުދަ ދުވަހާއި ހަމައަށް އާންމުކޮށް ވަނީ ހުޅުވާލާފަ އެވެ.
