ކުރީގެ ނައިބު ރައީސް އަހުމަދު އަދީބުގެ ޚިޔާނާތުގެ މައްސަލަ ސުޕްރީމް ކޯޓުގައި އިސްތިއުނާފު ކުރި ޝަރީއަތުގައި އޭނާ ވަގުތުން ވަގުތަށް ބަންދުކުރުމަށް ދައުލަތުން އެކޯޓުގައި އެދެފިއެވެ.

ދައުލަތުން އަދީބު ބަންދު ކުރުމަށް އެދުނު އިރު ހޯމަ ދުވަހު އޭނާ ހައްޔަރުކޮށް ބަންދުގައި ބެހެއްޓުމަށް ކްރިމިނަލް ކޯޓުން ހޯމަ ދުވަހު ވަނީ 15 ދުވަސް ޖަހާފައެވެ.

މިމައްސަލަ ބެއްލެވީ އުއްތަމަ ފަނޑިޔާރު ޑރ. އަޙްމަދު ޢަބްދުﷲ، ފަނޑިޔާރު ޢަބްދުﷲ ޢަރީފް، ފަނޑިޔާރު ޢަބްދުލްޣަނީ މުޙައްމަދެވެ.

އަދީބު ޚިޔާނާތްވި ކަމަށް ކަނޑައަޅައި އޭރު ކުރި އަށް އަހަރުގެ ހުކުމަކީ ޅ. މާބިންހުރާގައި ޓޫރިސްޓް ރިސޯޓެއް ތަރައްގީކުރަން އެމްއެމްޕީއާރުސީ އިން ކުރެއްދޫ ހޯލްޑިންގްސް ޕްރައިވެޓް ލިމިޓެޑަށް ކުއްޔަށް ދޫކުރުމުން އިކުއިޒިޝަން ކޮސްޓްގެ ގޮތުގައި އެ ކުންފުނިން އެމްއެމްޕީއާރުސީ އަށް ދިން ފަސް މިލިޔަން ޑޮލަރަށް ޚިޔާނާތްތެރިވި މައްސަލައިގައި އިއްވާފައިވާ އަށް އަހަރުގެ ހުކުމެވެ. އެހުކުމް ބާތިލް ކުރުމަށް ފަހު ހައިކޯޓުގެ ފަނޑިޔާރުންގެ އަޣުލަބިއްޔަތުން ކުރި ހުކުމުގައި ވަނީ ކްރިމިނަލް ކޯޓުގެ ހުކުމް ބާތިލްކޮށް، އެ މައްސަލަ އަލުން ބަލަން ކްރިމިނަލް ކޯޓުގެ މައްޗަށް އަންގާ ކަމަށެވެ.

ނަމަވެސް ކްރިމިނަލް ކޯޓުން ވަނީ އަދީބަށް ދައުވާ ކޮށްފައިވަނީ ތަހުގީގު ކުރުމަކާ ނުލައި އެމައްސަލަ އިތުރަށް ކުރިއަށް ގެންދިއުން ގާނޫނީ ހަމަތަކުގެ މަތިން ސައްހަ ވެގެން ނުވާ ކަމަށް އެކޯޓުގެ ފަނޑިޔާރުންގެ އަޣުލަބިއްޔަތުން ނިންމާފައިވާ ކަމަށް ބުނެ އެމައްސަލަ ޕީޖީއަށް އަނބުރާ ފޮނުވާލާފައެވެ.

އެމައްސަލަ ދައުލަތުގެ ފަރާތުން ވަނީ ސުޕްރީމް ކޯޓުގައި އިސްތިއުނާފު ކުރުމަށްފަހު އަދީބުގެ ޕާސްޕޯޓް ހިފެހެއްޓުމުގެ އަމުރާއި އޭނާ ބަންދުކުރުމުގެ އަމުރަކަށް އެދިފައެވެ. ނަމަވެސް އޭރު އަދީބު ހުންނެވީ އެހެން ހުކުމެއް ތަންފީޒު ކުރައްވަމުން ކަމަށް ވާތީ ސުޕްރީމް ކޯޓުން ކޮށްފައިވަނީ ހަމައެކަނި ޕާސްޕޯޓް ހިފެހެއްޓުމުގެ އަމުރު އެކަންޏެވެ. ޕާސްޕޯޓް ހިފަހައްޓާފައިވަނިކޮށް އަދީބު ވަނީ ރާއްޖެއިން ފިއްލަވައިގެން އިންޑިއާއަށް ވަޑައިގަންނަވާފައެވެ.

އިންޑިއާއަށް ވަޑައިގެންނެވުމުން ފުލުހުން ވަނީ އަދީބު ހިފަހައްޓައިގެން ރާއްޖެ ގެނެސްފައެވެ. އަދީބު ހައްޔަރުކޮށް ކްރިމިނަލް ކޯޓުން 15 ދުވަސް ޖެހީ ޕާސްޕޯޓް ހިފަހައްޓާފައި ވަނިކޮށް ފިއްލެވި މައްސަލާގައެވެ.

އަންގާރަ ދުވަހު ބޭއްވި އިސްތިއުނާފުގެ ޝަރީއަތުގައި ދައުލަތުން އަދީބު ހައްޔަރު ކުރުމުގެ އަމުރަކަށް އެދެމުން ބުނެފައިވަނީ ސުޕްރީމް ކޯޓުން ޕާސްޕޯޓް ހިފަހައްޓާފައިވާ އަމުރާއި ޚިލާފުވެގެން އަމުރެއް ނެރެދެވޭނީ ސުޕްރީމް ކޯޓުން ކަމަށް ދައުލަތުން ފެންނާތީ މިހާރުން މިހާރަށް އޭނާ ބަންދު ކުރުމުގެ އަމުރަކަށް އެދޭކަމަށެވެ. އަދި ޕާސްޕޯޓް ހިފެއްހެއްޓުމަށް ކޯޓުން ނެރެދިން އެ އަމުރަކީ މާބިން ހުރާ މައްސަލައިގެ ތެރެއިން ނެރެފައިވާ ހުކުމަކާއި ގުޅިގެން އެއަމުރާއި ޚިލާފު ވެފައިވާތީ ކަމަށް ބުނެފައި ވެއެވެ. ދައުލަތުގެ ވަކީލު ވިދާޅުވީ ވަގުތީ ދެ އަމުރެއް ނެރުމަށް މީގެ ކުރިން އެދިފައިވާކަމަށާއި އޭރު ސުޕްރީމް ކޯޓުން ނެރެފައިވަނީ އޭގެ ތެރެއިން ޕާސްޕޯޓް ހިފެހެއްޓުމުގެ އަމުރުކަމަށެވެ. ކުރިން ދައުލަތުން އެދިފައިވާ ގޮތަށް ޝަރީއަތް ނިމެންދެން އަދީބު ބަންދުގައި ބެހެއްޓުމުގެ އަމުރަކަށް އެދޭކަމަށް ޝަރީއަތުގައި ވަނީ އެދިފައެވެ.

އަދި 15 ދުވަހުގެ ބަންދެއްގައި އަދީބު ހުންނެވި ނަމަވެސް އެކަމަކީ ކްރިމިނަލް ކޯޓަށް ބަދަލު ކުރެވޭނެ އަމުރެއް ކަމަށްވާތީ މިހާރުން މިހާރަށް އަދީބު ބަންދު ކުރުމަށް އަމުރު ނެރެދިނުމަށްވަނީ އެދިފައެވެ.

ދައުލަތުން އެހެން ބުނުމުން އުއްތަމަ ފަނޑިޔާރު ވަނީ އަދީބު މިހާރު ވެސް ހުންނެވީ 15 ދުވަހުގެ ބަންދެއްގައި ކަަމަށާއި އަލުން ބަންދުކުރުމަށް ދައުލަތުން އެދެނީ ކީއްވެތޯ ސުވާލު ކޮށްފައެވެ. ޖަވާބުގައި ދައުލަތުގެ ވަކީލާ ވިދާޅުވީ ކްރިމިނަލް ކޯޓުން އަދީބު ބަންދުގެ މުއްދަތު ޖެހީ ޕާސްޕޯޓް ހިފަހައްޓާފައި ވަނިކޮށް ރާއްޖެއިން ފިލި މައްސަލައެއްގައި ނޫންކަމަށާއި އެކޯޓުން އަދީބު ބަންދަށް ޖެހީ އެހެން މައްސަލައެއްގައި ކަމަށް ދައުލަތުން ބުންޏެވެ. ނަމަވެސް އެއީ ކޮން މައްސަލައެއްގައި ކަމެއް ވިދާޅެއް ނުވެއެވެ. އަދީބަށް ދައުލަތުން ކުރަނީ ޚިޔާނާތްތެރިވި ކަމުގެ ދައުވާ ނޫންކަމަށާއި އޭނާގެ މައްޗަށް ކުރަނީ ޚިޔާނާތުގައި ބައިވެރިވިކަމުގެ ދައުވާ ކަމަށް ވެސް ދައުލަތުން ބުނެފައިވެއެވެ.

އެކަމާއި ގުޅިގެން އަދީބު ވިދާޅުވީ ކްރިމިނަލް ކޯޓުން ހޯމަ ދުވަހު އޭނާގެ ބަންދަށް 15 ދުވަސް ޖަހާފައި ވަނީ ވެސް އެއް ކަމެއްގެ މައްޗަށް ބިނާކޮށް ކަމަށެވެ. އަދި އެއީ ޕާސްޕޯޓް ހިފަހައްޓާފައި ވަނިކޮށް ރާއްޖެއިން ފިލާފައިވާތީކަމަށް ބުނެ ކަމަށް އަދީބު ވިދާޅުވިއެވެ.

އަދީބު ވަނީ ދައުލަތުން ކުރި އިސްތިއުނާފުގެ ޝަރީއަތް ކުރިއަށް ގެންދިއުމަށްޓަކާ ވަކީލަކު ކަނޑައެޅުމަށް 7 ދުވަހުގެ މުއްދަތެއް ދިނުމަށް ޝަރީއަތުގައި އެދިލައްވާފައެވެ. އަދި ޝަރީއަތުން ވަނީ އެ ފުރުސަތު އޭނާއަށް ދީފައެވެ.

އަދީބު ވިދާޅުވީ ހައިކޯޓުން ބާތިލްކުރި އޭނާ ޚިޔާނާތުގައި ބައިވެރިކަމުގެ އަމުރަކީ އެންމެ ރަށެއްގެ މައްސަލައެއް ނޫންކަމަށާއި އޭނާ ދަނީ އެކަމާއި ގުޅިގެން ތަހުގީގުތަކަށް އެއްބާރުލުން ދެއްވަމުން ކަމަށެވެ. ޝަރީއަތުގައި އަދީބު ވިދާޅުވީ އޭނާގެ މައްޗަށް ތުހުމަތު ކުރާ މައްސަލަތަކުގައި އެސެޓް ރިކަވަރީ ކޮމިޝަނާއި ޕްރޮސެކިއުޓަރ ޖެނެރަލްއާއި ފުލުހުންގެ އިދާރާއަށް ދަނީ އެއްބާރުލުން ދެއްވަމުން ކަމަށެވެ.ނަމަވެސް ފުރާނައަށް ނުރައްކާވާތީ ބޭރުގެ ހިމާޔަތް ހޯދުމަށް މަސައްކަތް ކުރެއްވީ ފިއްލަވަން ޖެހުނީ އެކި ފަރާތްތަކުގެ ބިރު ދެއްކުންތަކާއި އިންޒާރުތަކާ ހެދި ކަމަށް ވިދާޅުވިއެވެ. އަދި އެގޮތަށް ފިއްލެވީ އޭނާ އެކަނި ނޫންކަމަށް ވެސް ވިދާޅުވިއެވެ. އޭނާ ދަނީ ފައިސާ ދައުރުވި ގޮތާއި ލިބުނު ފައިސާއާއި ބެހޭ މައުލޫމާތު ދެއްވަމުން ކަމަށާއި އެކަންތައްތައް އޭނާ ގެންގުޅުއްވި ފޯނު މެދުވެރި ކޮށްގެންނާއި އެކި ގޮތްގޮތުން ތަހުގީގު އިދާރާތަކުން ތަހުގީގު ކުރަމުން ދާއިރު އޭނާ އެއްބާރުލުން ދެއްވަމުން ދާކަމަށް ވިދާޅުވިއެވެ.

އަދީބު އެހެން ވިދާޅުވުމާއި ގުޅިގެން ދައުލަތުން ބުނެފައިވަނީ އަދީބާއި އެކު ވެފައިވާ އެއްބަސް ވުމުގައި މާބިންހުރާ މައްސަލައެއް ނުހިމެނޭ ކަމަށެވެ.

ޝަރީއަތް ނިމެންދެން އޭނާ ބަންދު ކުރުމަށް ދައުލަތުން އެދޭކަމަށް ބުނެފައި ވެއެވެ. އަދި އެއީ އަދީބު ޝަރީއަތަށް ހާޒިރު ނުވެ ފިލާފާނެ ކަމަށް ބެލެވޭތީ ކަމަށް ވެސް ވަނީ ބުނެފައެވެ.

ޝަރީޢަތަށް އަދީބު ވަޑައިގެންނެވީ ވަކީލަކާ ނުލައެވެ. އަދީބު ވަނީ ބަންދުގެ އަމުރާއި ގުޅޭގޮތުން ވަކީލަކު އައްޔަން ކުރުމަށް އެއް ދުވަހުގެ މުއްދަތެއް ދިނުމަށް އެދިލައްވާފައެވެ. ނަމަވެސް ދައުލަތުގެ ވަކީލު ވަނީ އެކަމަށް އިއުތިރާޒުކޮށް މިހާރުން މިހާރަށް އަމުރު ނެރެދިނުމަށް އެދިފައެވެ.

އުއްތަމަ ފަނޑިޔާރު ވިދާޅުވީ ބަންދާއި މެދު ގޮތެއް ކަނޑައެޅުމަށް ފަނޑިޔާރުންގެ މަޖިލީހުގައި ބަންދު އަމުރާމެދު މަޝްވަރާ ކުރެއްވުމަށްފަހު ގޮތެއް ކަނޑައަޅުއްވާނެކަމަށެވެ.