ކުރީގެ ނައިބު ރައީސް އަހުމަދު އަދީބުގެ ބަންދަށް ކްރިމިނަލް ކޯޓުން 15 ދުވަސް ޖަހައިފިއެވެ.
އަދީބުގެ ބަންދަށް 15 ދުވަސް ޖެހުމަށް ދައުލަތުން އެދުނީ އެމަނިކުފާނު ގޭބަންދުގައި ހުރިކަމުގައި ވިޔަސް ފިލާފާނެ ކަމުގެ ބިރު އޮތް ކަމަށް ވާތީއެވެ.
އަދީބު ހައްޔަރުކޮށް އެމަނިކުފާނުގެ ބަންދުގެ މުއްދަތު ޖަހައިދިނުމަށް ދައުލަތުގެ ފަރާތުން އާދިއްތަ ދުވަހުގެ ރޭ ދަންވަރު އެދުމުން މުއްދަތު ނުޖަހާ އެމަނިކުފާނު ދޫކޮށްލުމަށް ކޯޓުން އަމުރުކޮށްފައިވަނީ އެމަނިކުފާނު ހައްޔަރު ކުރެވެން ނެތްކަމަށް ބުނެއެވެ. އެހެންކަމުން ފުލުހުން ވަނީ އަނެއްކާވެސް އެމަނިކުފާނު ހައްޔަރު ކުރުމުގެ އަމުރަކަށް ކްރިމިނަލް ކޯޓުގައި އެދިފައެވެ.
އަދީބު ޕާސްޕޯޓް ހިފަހައްޓާފައި ވަނިކޮށް ރާއްޖެއިން ފުރައިގެން ދިޔަ މައްސަލައިގައި އެމަނިކުފާނު ހައްޔަރުކުރުމުގެ އަމުރަކަށް އެދުނީ ކުރިން އަމުރު ނެރެން އެދުނު އިޖުރާއަތްތަކަށް ބަދަލު ގެނައުމަށް ފަހުއެވެ. އަދީބު އަލުން ހައްޔަރުކޮށްފައިވަނީ އެމަނިކުފާނު ދިރިއުޅުއްވާ ގޭގައި ހުންނަވަނިކޮށް ފަތިހު 5:30 ހާއިރުއެވެ.
އަދީބުގެ މައްޗަށް ކްރިމިނަލް ކޯޓުން ކުރި ހުކުމް ހައިކޯޓުން ބާތިލް ކުރުމާއި ގުޅިގެން ދައުލަތުން ވަނީ ސުޕްރީމު ކޯޓުގައި އެމައްސަލަ އިސްތިއުނާފު ކުރުމަށް އެދިފައެވެ.
