ކުރީގެ ރައީސް އަބްދުﷲ ޔާމީންގެ މައްޗަށް ކުރާ މަނީ ލޯންޑްރިންގެ ދައުވާގެ ޝަރީއަތަށް އެންޓި ކޮރަޕްޝަން ކޮމިޝަނުގެ ރައީސް މުއައްވިޒް ރަޝީދް ހެކިބަސް ދެއްވައިފިއެވެ.

ރައީސް ޔާމީނުގެ މައްޗަށްކުރާ ދައުވާގެ ދެވަނަ އަޑުއެހުމުގައި އޮތީ ހެކިންގެ ހެކިބަސް ނެގުމެވެ. އެގޮތުން 9 ސެޕްޓެމްބަރ 2009 އިން ފެށިގެން 4 ޖުލައި 2019 އަށް އޭސީސީގެ ނައިބް ރައީސްކަން މުއައްވިޒް ކުރައްވާފައިވާއިރު، ކޮރަޕްޝަނަށް މަގުފަހިވާގޮތަށް މުއާމަލާތްތައް ކޮށްފައިވާކަން ފާހަގަވީ ކޮންއިރަކުތޯ ދައުލަތުން ކުރި ސުވާލަށް ޖަވާބުދެއްވަމުން މުއައްވިޒް ވިދާޅުވީ، އެކަން ފާހަގަވީ ދައުލަތަށް ލިބެންޖެހޭ ގިނަ ފައިސާ އެސްއޯއެފަށް ޖަމާވިގޮތް ތަހުޤީޤު ކުރަމުން ދަނިކޮށްކަމަށެވެ. އެގޮތުން މުއައްވިޒް ވިދާޅުވީ، އެސްއޯއެފަށް ޖަމާވި ފައިސާގެ 2 ޗެކަކުން 2015 ގެ އޮކްޓޯބަރ މަހުގައި ރައީސް ޔާމީނުގެ އެކައުންޓަށް 1 މިލިއަން ޖަމާވެފައިވާކަން 2016 ވަނަ އަހަރު ގައި ޔަޤީންކުރެވިފައިވާ ކަމަށާއި، އެހިސާބުން އެކަން ވެރިފައި ކުރުމަށް ރައީސް ޔާމީނުގެ އެކައުންޓް ސްޓޭޓްމަންޓެއް ހޯދަން މަސައްކަތް ކުރެއްވި ކަމަށެވެ.

އޭގެ އިތުރުން، މި މައްސަލައިގެ ތަހުޤީޤު ކުރިއަށްގެންގޮސްފައިވާގޮތާއި، ދިމާވި ގޮންޖެހުންތަކާއި، ފާހަގަކުރެވުނު ކަންކަމާ ގުޅޭގޮތުން ދެފަރާތުގެ މުވައްކިލުން ކުރި ސުވާލުތަކަށް މުއައްވިޒް ޖަވާބުދެއްވާފައިވާއިރު، ދައުލަތުން ހުށައަޅާފައިވާ އޭސީސީއާ ގުޅުންހުރި 2 ކިތާބީ ހެއްކެއް ދިފާއީ ވަކީލުންނަށް ލިބިފައިނުވާކަން ދިފާއުން ވަނީ ފާހަގަކޮށްފައެވެ.

އެކަމާ ގުޅިގެން މި މައްސަލަ ބައްލަވާ ފަނޑިޔާރު އަހުމަދު ހައިލަމް ވަނީ އެ ހެކިތައް ދިފާއަށް ފޯރުކޮށްދިނުމަށްފަހު، ހެއްކާއި ގުޅޭގޮތުން ސުވާލު ކުރުމަށް އަލުން މުއައްވިޒް ހާޒިރު ކުރުމަށް ނިންމަވާފައެވެ. ދިފާއަށް ލިބިފައިނުވާކަމަށް ބަޔާންކޮށްފައިވާ ކިތާބީ ހެކިތަކަކީ އޭސީސީގެ ތަހުޤީޤު ރިޕޯރޓަކާއި، މި މައްސަލާގައި ދައުލަތުން ކިތާބީ ހެއްކެއްގެ ގޮތުގައި ހުށައަޅާފައިވާ އެކައުންޓް ސްޓޭޓްމަންޓެކެވެ.