ހުޅުމާލޭ ބީޗް ސަރަހައްދުގައި ކެފޭ، ރެސްޓޯރެންޓްތައް ހުސްކުރުމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީން) ދީފައިވާ މުހުލަތުގައި ގިނަ ފަރާތްތަކުން އެކަމަށް އިޖާބަ ދީފައިވާ ކަމަށް އެކޯޕްރޭޝަނުން ބުނެފިއެވެ.

އެޗްޑީސީން ބުނީ ހުޅުމާލެ ފުރަތަމަ އަދި ދެވަނަ ދެމެދުގައި ނަރުދަމާގެ ނިޒާމު ގުޅުވާލުމުގެ މަޝްރޫއުގެ ދަށުން ހުޅުމާލެ ބީޗް ސަރަހައްދުގައި ނަރުދަމާ ހޮޅި ވަޅުލުމަށްޓަކައި އެސަރަހައްދުގައި ހިންގަމުންދާ ކެފޭތައް ބަންދުކުރުމަށް މީގެ 1 މަސް ކުރިން ދީފައިވާ ނޯޓިސްއާއި ގުޅިގެން 31 ޖުލައި ގައި ބީޗް ސަރަހައްދު ހުސްކުރުމުގެ މަސައްކަތް ފަށާފައިވާ ކަމަށެވެ.

އެގޮތުން ކެފޭ ހިންގަމުންދިޔަ ފަރާތްތަކަށް 31 ޖުލައިވީ ބުދަ ދުވަހުގެ 15:00 ގެ ނިޔަލަށް ބީޗް ސަރަހައްދު ހުސްކުރުމަށް އެންގުމުން ގިނަ ފަރާތްތަކުން އެކަމަށް އިޖާބަދީ އެސަރަހައްދު ހުސްކޮށްފައިވާ ކަމަށް އެޗްޑީސީން ބުންޏެވެ.

މީގެ އިތުރުން އެޗްޑީސީން ބުނީ ބުދަ ދުވަހުގެ 15:00ގެ ފަހުން ނުނަގާހުރި ތަކެތި ނަގާ އެސަރަހައްދު ހުސްކުރުމުގެ މަސައްކަތް ފަށާފައިވާ ކަމަށެވެ.

އެޗްޑީސީން ބުނީ އެމްޑަބްލިޔުއެސްސީގެ ނަރުދަމާ ހޮޅި ވަޅުލުމުގެ މަޝްރޫއު ކުރިއަށްދާއިރު ރައްކާތެރިކަމުގެ ފިޔަވަޅުތައް އެޅުމަށްފަހު ބީޗް ސަރަހައްދުގައި މޫދަށް އެރިލުމުގެ ފުރުސަތު އާންމުންނަށް ހުޅުވާލާފައިވާ ކަމަށެވެ. މިޕްރޮޖެކްޓް ކުރިއަށް ދިޔަކަމުގައި ވީ ނަމަވެސް ކުރިއެކޭ އެއްފަދައިން ވޯޓަރ ސްޕޯޓްސްގެ ޚިދުމަތް އާންމުނަށް ލިބޭނެ ކަމަށް އެކޯޕްރޭޝަނުން މައުލޫމާތުދެއެވެ.