ދައުލަތުގެ ހިސާބުތަކުން ދައްކާ ގޮތުގައި 2018 ވަނަ އަހަރު އެކަނި ރައީސް އަބްދުﷲ ޔާމީން ގެ ސަރުކާރުން 27 މިލިއަން ރުފިޔާ ޚާރިޖީ ދަތުރުތަކަށް ހަރަދުކޮށްފައިވާ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
މިނިސްޓަރ ޝާހިދު މިހެން ވިދާޅުވެފައިވަނީ ބުދަ ދުވަހު ގެ މަޖިލީހަށް ހާޒިރުވެވަޑައިގެން މެދު ހެންވޭރު ދާއިރާގެ މެމްބަރު އަލީ އާޒިމް ކުރިމަތި ކުރުވި ސުވާލަށް ޖަވާބުދެއްވަމުންނެވެ.
މިނިސްޓަރ ޝާހިދު ވިދާޅުވީ ކުރީގެ ސަރުކާރުން މަސައްކަތް ކޮށްފައިވަނީ އޮޅުވާލައިގެން ކަންހިނގާ ގޮތް ނޭނގިތިބެ ކަމަށެވެ. އަދި އެ ސަރުކާރުން ކުރެއްވި މަސައްކަތަކީ ރައްޔިތުން އެކަހެރިކޮށް ބިކަ ކުރުން ކަމަށް ވެސް ޝާހިދު ވިދާޅުވިއެވެ. އެގޮތުން އެ ސަރުކާރުން އެއްވެސް ޚާރިޖީ ދަތުރަކާއި ބެހޭ ގޮތުން މައުލޫމާތު ހިއްސާކޮށްފައި ނުވާތީ އެއްވެސް މަސައްކަތެއް ކުރިކަމަށް ގަބޫލު ނުކުރެވޭ ކަމަށްވެސް ވިދާޅުވިއެވެ.
މި ސަރުކާރުގައި މިހާތަނަށް ފޮރިން މިނިސްޓްރީގެ ބަޖެޓުން 7.5 މިލިއަން ރުފިޔާ އެ މިނިސްޓްރީގެ ދަތުރުތަކަށް ހަރަދު ކުރެވިފައިވާ ކަމަށް މިނިސްޓަރ ވިދާޅުވިއެވެ.
މިއާއި ޚިލާފަށް އެ މަނިކުފާނު ޚާރިޖީ ވަޒީރު ކަމުގައި ހުރެ ކުރައްވާ ހުރިހާ ދަތުރުފުޅުތަކާއި އެ ދަތުރުފުޅުތަކުގައި ބައްދަލު ކުރައްވާ ފަރާތްތަކުގެ މައުލޫމާތު ސާފުކޮށް ދިވެހި ރައްޔިތުންނާއި ހިއްސާ ކުރައްވަމުންދާ ކަމަށް ވިދާޅުވިއެވެ. އަދި ކުރީ ސަރުކާރުގައި ހަތަރު އަހަރު ދުވަހުގެ ތެރޭގައި ލިބުނު 1.9 ބިލިއަން ރުފިޔާގެ ހިލޭ އެހީ މި ސަރުކާރުން ތިން މަސް ދުވަހުގެ ތެރޭގައި ހޯދާފައިވާ ކަމަށް ވެސް ފާހަގަ ކުރެއްވިއެވެ.
ކުރީ ސަރުކާރުން ސިޔާސީ ގުޅުން ކަނޑާލާފައިވާ ގައުމުތަކާއި އަލުން ސިޔާސީ ގުޅުން ބަދަހި ކުރެއްވުމުގެ މަސައްކަތް ކުރައްވަމުން އަންނަ ކަމަށް ވެސް ވިދާޅުވިއެވެ. އެގޮތުން މިނިސްޓަރ ޝާހިދު ވަނީ 19 ގައުމަކަށް ރަސްމީ ދަތުރު ކުރައްވާ، ހަތް ގައުމެއްގެ ރައީސުންނާއި ހަ ގައުމެއްގެ ބޮޑުވަޒީރުންނާއި 33 ގައުމެއްގެ ފޮރިން މިނިސްޓަރުންނާއި 48 ގައުމެއްގެ ސަފީރުންނާ ބައްދަލު ކުރައްވާފައެވެ.
މީގެ އިތުރުން އާއްމު ގޮތެއްގައި މަދު ގައުމުތަކަކަށް އޮން އެރައިވަލް ވިސާދޭ ޤައުމުތަކަށް، ކުރިން ވިސާ ނެގުމެއް ނެތި ދިވެހިންނަށް މިހާރު އޮންއެރައިވަލް ވިސާ ލިބޭނެ އިންތިޒާމް އެގައުމުތަކަށް މިނިސްޓަރ ކުރެއްވި ދަތުރުފުޅުތަކުގައި ވަނީ ހަމަޖައްސާފައެވެ.
މިނިސްޓާރ ޝާހިދު އާއި ސުވާލުކުރެއްވުމަށް މަޖިލީހަށް ހާޒިރުކުރައްވަން ހުށަހަޅުއްވާފައިވަނީ ކާށިދޫ ދާއިރާގެ މެމްބަރު އަބްދުﷲ ޖާބިރެވެ.
