ރަށު ފަތުރުވެރިކަން ތަރައްޤީކޮށް ފުޅާކުރުމަށް، މީހުން ދިރިއުޅޭ، ބިން ބޮޑެތި ރަށްރަށުގައި، ރަށު ފަތުރުވެރިކަން ތަރައްޤީކުރުމަށްޓަކައި، ބީލަމުގެ އުޞޫލުން ބިންތަކެއް ދޫކުރުމަށް ނިންމައިފި އެވެ.

"ޖަޒީރާ ރާއްޖެ، މަގޭ ރާއްޖެ"ގެ ނަމުގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް އިބްރާހިމް މުހައްމަދު ސޯލިހް ރަށު ފަތުރުވެރިކަން ތަރައްޤީކުރުމަށް ރަށްރަށުން ބީލަމުގެ އުސޫލުން ބިން ދޫކުރުމަށް ސަރުކާރުން ނިންމާފައިވާކަމަށެވެ. އެގޮތުން 11 ރަށަކުން ބިން ދޫކުރުމަށް ނިންމާފައިވާކަމަށް ވިދާޅުވެ ރައީސް ސޯލިހް ވިދާޅުވީ އެ 11 ރަށަކީ ހއ. ފިއްލަދޫ، ދައްޕަރު ސަރަހައްދާއި، ހއ. އުލިގަން އަދި ހއ. ކެލާގެ އިތުރުން އައްޑޫ ސިޓީގެ 6 ރަށަކާއި ލ. ގަމާއި، ފުވައްމުލަކު ތުނޑީ ސަރަހައްދު ކަމަށެވެ.

ރައީސް ވިދާޅުވީ ދުނިޔޭގެ ފަތުރުވެރިކަމުގެ ބާޒާރުގައި ރާއްޖޭގެ ފަތުރުވެރިކަން މިހާރު ވަނީ ވަރަށް މަތީ މަޤާމެއް ޙާޞިލްކޮށްފައި ކަމަށެވެ. އެކަމުގެ ހުރިހާ ފަޚުރަކާއި ޝަރަފެއްގެ ޙައްޤުވެރީންނަކީ، މި ޞިނާޢަތު ކޮޅަށް ޖެހުމުގައި އެކި މަރުޙަލާތަކުގައި މަސައްކަތްކުރި ހުނަރުވެރި ދިވެހިން ކަމަށް އެމަނިކުފާނު ވިދާޅުވި އެވެ. އަދި ރައީސް ވިދާޅުވީ ފަތުރުވެރި މުވައްޒަފުންގެ ދަފްތަރު އެކުލަވައިލުމުގެ މަސައްކަތް ކުރިއަށް އޮތް ހައެއްކަ މަސްތެރޭގައި ނިމިގެންދާނެ ކަމަށާއި އޭރުން ފަތުރުވެރި މުވައްޒަފުންގެ ޙާލަތު ދެނެގަނެވި އެމީހުންގެ ޚިދުމަތުގެ އަގު ވަޒަންކުރުން ވަރަށް ބޮޑަށް ފަސޭހަވެގެންދާނެ ކަމަށެވެ.

ދެމެހެއްޓެނިވި ފަތުރުވެރިކަމަކަށް އަޅުގަނޑުމެން އަމާޒު ހިފާއިރު، އެންމެ ބޮޑު އިސްކަމެއް ދޭންޖެހެނީ ތިމާވެށި ޙިމާޔަތްކުރުމަށް ފާހަގަކުރައްވާ ރައީސް ވިދާޅުވީ ގއ. އޮޑެގައްލާ އަދި ބ. އިންނަފުށީގައި ރިސޯޓް ތަރައްޤީކުރަން ހެދި ލީސް އެގްރީމެންޓް މި ސަރުކާރުން އުވާލަން ނިންމީ މި ސަބަބަށްޓަކައި ކަމަށެވެ.

ރައީސް ވިދާޅުވީ މި ސަރުކާރުން ފަތުރުވެރިކަން ތަރައްްީކުރާނީ ވަކި ސަރަހައްދަކަށް ހާއްސަކޮށްގެން ނޫންކަމަށާއި، ހުރިހާ އަތޮޅެއް ހިމެނޭގޮތަށް ކަމަށެވެ. އަދި އޭރުން މި ސިނާއަތުގެ ފައިދާ ހުރިހާ ރައްޔިތުންނަށް ލިބިގެންދާނެކަމަށް ރައީސް ވިދާޅުވި އެވެ.