މީޑިއާނެޓުގެ ބައެއް ޗެނަލްތައް ފެނުން ދަތިވަނީ ޑައުންލިންކަށް ދިމާވާ އިންޓަފެރެންސެއްގެ ސަބަބުން ކަމަށް އެ ކުންފުނިން ބުނެފިއެވެ.
މީޑިއާނެޓުން އާދިއްތަ ދުވަހު ނެރުނު ނޫސް ބަޔާނެއްގައި ބުނެފައިވަނީ ޖުލައި މަހުގެ 26ން ފެށިގެން މީޑިއާނެޓުގެ ބައެއް ހިދުމަތްތަކަށް ބުރޫ އަރާފައި ވާކަމަށެވެ.
އެ ކުންފުނީގެ ޑައުންލިންކް ސިގްނަލް އަށް ދިމާވާ އިންޓަފެރެންސެއްގެ ސަބަބުން ބައެއް ޗެނަލްތަކުން ދައްކާ މަންޒަރުތައް ގަނޑުވުން ފަދަ ކަންކަން ރާއްޖޭގެ ހުރިހާ ސަރަހައްދަކަށް ދިމާވަމުންދާކަން ފާހަގަ ކުރެވިފައިވާ ކަމަށް މީޑިއާނެޓުން ބުނެފައިވެއެވެ.
މީގެ އިތުރުން، އެ ކުންފުނިން މިހާރު ދަނީ އިންޓަފެރެންސް މެދުވެރިވާން ދިމާވާ ސަބަބު ހޯދާ އެކަމަށް އަވަސް ހައްލެއް ހޯދުމުގެ މަސައްކަތް ކުރަމުން ކަމަށް ވެސް ބަޔާނުގައި ބުނެފައިވެއެވެ.
އެކަމުގެ ސަބަބުން ކަސްޓަމަރުންނަށް ދިމާވާ ދަތިތަކާއިމެދު މީޑިއާނެޓުން މާފަށް އެދިފައިވެއެވެ.
